ខេត្តបាត់ដំបង ៖ រយៈពេល០២ថ្ងៃកន្លងមកហើយ គិតត្រឹមថ្ងៃទី១៥ ធ្នូ នេះ សមត្ថកិច្ចមិនទាន់បង្ក្រាបបានក្រុមចោរណាម្នាក់ ក្នុងចំណោមបក្សពួក០៣នាក់ ដែលបាននាំគ្នាចូលផឹកស៊ីច្រៀងខារ៉ាអូខេយ៉ាងសប្បាយ ហើយប្រើល្បិចរំដោះគ្នាម្ដងម្នាក់រត់គេចខ្លួន…
ខេត្តបាត់ដំបង ៖ រយៈពេល០២ថ្ងៃកន្លងមកហើយ គិតត្រឹមថ្ងៃទី១៥ ធ្នូ នេះ សមត្ថកិច្ចមិនទាន់បង្ក្រាបបានក្រុមចោរណាម្នាក់ ក្នុងចំណោមបក្សពួក០៣នាក់ ដែលបាននាំគ្នាចូលផឹកស៊ីច្រៀងខារ៉ាអូខេយ៉ាងសប្បាយ ហើយប្រើល្បិចរំដោះគ្នាម្ដងម្នាក់រត់គេចខ្លួន ដោយមិនបានឲ្យលុយ បន្សល់ទុកនារីម្នាក់ឲ្យប្រឈមមុខនឹងម្ចាស់ហាង។ មិនតែប៉ុណ្ណោះ មានជនម្នាក់បានឆក់ឱកាសលួចយកទូរស័ព្ទស៊េរីទំនើបរបស់បុគ្គលិកក្នុងហាងអស់មួយគ្រឿងថែមទៀត។
បើតាមប្រភពពីសមត្ថកិច្ចបានឲ្យដឹងថា ហេតុការណ៏នេះបានកើតឡើង កាលពីវេលាម៉ោងជិត១រំលងអធ្រាត្រឈានចូលថ្ងៃទី១៣ ធ្នូ នៅចំណុចអាហារដ្ឋានមួយកន្លែង ស្ថិតក្នុងភូមិជ្រៃកោង សង្កាត់ស្លាកែត ក្រុងបាត់ដំបង ។ សកម្មភាពក្រុមចោរនេះដែលព្យាយាមរំដោះគ្នារត់ផ្លោះចេញពីក្នុងហាង និងសកម្មភាពលួចទូរស័ព្ទ ត្រូវបានថតជាប់ដោយកាមេរ៉ាសុវត្ថិភាព។
ប្រភពដដែលបានបញ្ជាក់ថា ជនសង្ស័យមានចំនួន០៣នាក់ ក្នុងនោះ មាននារីម្នាក់ ដែលនាងអះអាងថា នាងជាអ្នករកស៊ីកញ្ឆក់កណ្ដៀតពេលរាត្រី នៅតាមសួនច្បារនានា ក្នុងក្រុងបាត់ដំបង។ ក្រុមនេះ បានចូលផឹកស៊ីនៅក្នុងបន្ទប់ខារ៉ាអូខេនៅហាងខាងលើ ហើយបានរំដោះគ្នាចេញមិនបានឲ្យលុយម្ចាស់ហាងទេ ថែមទាំងលួចយកទូរស័ព្ទម្ចាស់ហាងអស់មួយគ្រឿងទៀត ។
ម្ចាស់អាហារដ្ឋាន ដែលសុំមិនប្រាប់ឈ្មោះ និង យីហោរហាង បាននិយាយថា ដំបូងក្រុមជនសង្ស័យទាំង០៣នាក់ខាងលើនេះ បានជិះម៉ូតូឌុបគ្នាមកចូលផឹកស៊ី ក្នុងហាងខ្លួននៅម៉ោងប្រមាណ១០យប់ថ្ងៃទី១២ ធ្នូ ។ ប៉ុន្តែពេលចូលផឹកបានបន្តិច ស្រាប់តែមានម្នាក់ជិះម៉ូតូចេញទៅវិញបាត់ នៅតែនារីម្នាក់និងប្រុសម្នាក់ ។
ម្ចាស់ហាងបាននិយាយថា ជន០២នាក់នេះ បានកុម្ម៉ង់ម្ហូបជាច្រើនមុខ ផឹកស៊ីនិងច្រៀងលែងយ៉ាងសប្បាយ រហូតដល់ម៉ោងជិត១រំលងអធ្រាត្រឈានចូលថ្ងៃទី ១៣ ធ្នូ ស្រាប់បុរសនោះចាប់ផ្ដើមប្រើល្បិចចេញចូលបន្ទប់ច្រៀង ដែលមើលទៅគួរឲ្យសង្ស័យ ។ ពេលនេះ គេឃើញបុរសនោះបានដើរចេញមកខាងក្រៅបន្ទប់ ចុះមកខាងក្រោមមើលឆ្វែង មើលស្ដាំ ហើយបុគ្គលិកហាងឃើញសកម្មភាពមិនល្អ ក៏ហៅភ្ញៀវម្នាក់នេះឡើងទៅបន្ទប់ច្រៀងវិញ តែជននេះប្រាប់ឲ្យបុគ្គលិកហាងឡើងទៅមុន ។
គាត់បញ្ជាក់ថា ពេលបុគ្គលិកឡើងទៅលើផុត ស្រាប់តែជននោះ បានឱកាសដើរចេញទៅខាងក្រោយហាង ផ្លោះរបងរត់គេចបាត់ ទាំងមិនគិតលុយផង បន្សល់ទុកនារីម្នាក់ឲ្យទទូលខុសត្រូវ។ ម្ចាស់ដដែលនេះ បានរៀបរាប់ថា ក្រោយដឹងថា ជនម្នាក់នោះបានរត់ផ្លោះរបងហាងគេចខ្លួន គាត់បានឆែកកាមេរ៉ាសុវត្តិភាព ក៏ឃើញសកម្មភាពជនម្នាក់នោះដើរឡេមឡឺម ដែលមានពាក់មួយផង បានលូកដៃលួយចយកទូរស័ព្ទស៊េរីទំនើបមួយគ្រឿងរបស់បុគ្គិលដែលទុកកន្លែងគិតលុយ រួចដើរទៅខាងក្រោយហាងផ្លោះរបងរត់ទៅបាត់ ដែលទំនងមានបក្ខពួកជិះម៉ូតូមកចាំទទួល។
ចំណែកនារីម្នាក់ ដែលមកផឹកស៊ីជាមួយគ្នា បើតាមម្ចាស់ហាងបានប្រាប់ថា នារីម្នាក់នេះឈ្មោះ លីន ស្នាក់នៅផ្ទះជួលម្ដុំ ភូមិកាប់គោថ្មី សង្កាត់អូរចា ក្រុងបាត់ដំបង។ នារីម្នាក់នេះបានឆ្លើយប្រាប់ថា ក្នុងចំណោមបុរស០២នាក់នោះ គឺនាងស្គាល់ម្នាក់ដែលជិះម៉ូតូទៅមុនគឺឈ្មោះម៉ាប់ តែម្នាក់ពាក់មួយអង្គុយផឹកស៊ី ហើយរត់ចោលនាងគឺទើបស្គាល់គ្នាទេ ។ នាងបាននិយាយថា នាងមិនដឹងអីទេ។ នាងជាអ្នករកស៊ីរកលុយពេលយប់នៅតាមសួន ហើយពួកគេបានបបូលនាងមកផឹកស៊ីជាមួយ។
ប៉ុន្តែនាងបានធ្លោយពាក្យថា «ពួកគេទាំង០២នាក់នេះ ធ្លាប់នាំនាងទៅធ្វើអញ្ចឹងលក់មុខនាងច្រើនលើកហើយ»។ ដូច្នេះបានន័យថា នារីម្នាក់នេះ និង បុរស០២នាក់នោះ គឺជាក្រុមចោរ ឬ ក្រុមឆបោកតែមួយ។ ម្ចាស់ហាងខាងលើ បានអះអាងថា ក្រោយពីសួរនាំនាងត្រូសៗ គាត់បានទាក់ទងទៅកាន់មន្ត្រីការិយាល័យព្រហ្មទណ្ឌកំរិតស្រាល នៃស្នងការខេត្ត ដើម្បីរាយការពីរឿងនេះ តែដោយឃើញស្ថានភាពនារីម្នាក់នេះ គ្មានលទ្ធភាពដោះស្រាយសំណង គាត់ក៏ស្នើសមត្ថកិច្ចឲ្យដោះលែងនាង តែគាត់បានដាក់ពាក្យបណ្ដាងសុំឲ្យសមត្ថកិច្ច តាមស្រាវជ្រាវចាប់ខ្លួនបុរស០២នាក់ ដែលបានរត់គេចខ្លួនមិនព្រមសងលុយនិងលួចទូរស័ព្ទ។
បើតាមម្ចាស់ហាងរូបនេះ បានបញ្ជាក់ថា បើគិតតំលៃផឹកស៊ី នៅក្នុងបន្ទប់ខារ៉ាអូខេ បូកសរុបអស់ចំនួនជាង៣០ម៉ឺនរៀល។ យ៉ាងណាក្ដី បើតាមមន្ត្រីនគរបាលការិយាល័យជំនាញ បានប្រាប់ថា បើតាមប្រវត្តិ ជនមួយក្រុមនេះជាមុខសញ្ញាចាស់ ដែលតែងដើរប្រព្រឹត្តបែបនេះនៅតាមអាហារដ្ឋាន ឬ តាមក្លិបខារ៉ាអូខេនានា ច្រើនលើកច្រើនសារហើយ។ ហើយពេលនេះមន្ត្រីជំនាញកំពុងបន្តតាមដានសកម្មភាពក្រុមនេះ តែមិនទាន់មានតម្រុយនៅឡើយទេ។
មានព័ត៌មានបន្ថែម កោះសន្តិភាពផ្សាយជូនបន្ត ។
ចែករំលែកព័តមាននេះ