សហភាពអឺរ៉ុបដាក់ទណ្ឌកម្មថ្មីលើពេជ្ររុស្ស៊ី
សង្គ្រាមអ៊ុយក្រែន ៖ ក្នុងសេចក្ដីប្រកាសមួយកាលពីថ្ងៃទី១៤ធ្នូ សហភាពអឺរ៉ុបគូសបញ្ជាក់ថា ប្រទេស
សង្គ្រាមអ៊ុយក្រែន ៖ ក្នុងសេចក្ដីប្រកាសមួយកាលពីថ្ងៃទី១៤ធ្នូ សហភាពអឺរ៉ុបគូសបញ្ជាក់ថា ប្រទេសទាំង២៧ជាសមាជិកប្លុកនេះ បានអនុម័តកញ្ចប់ទណ្ឌកម្មថ្មីប្រឆាំងរុស្ស៊ី ដែលរួមមានជាពិសេសការហាមឃាត់នាំចូលពេជ្ររុស្ស៊ីក្នុងសហភាពអឹរ៉ុប។
បណ្ដាមេដឹកនាំអឹរ៉ុបដែលរួមប្រជុំកំពូលនៅក្រុងព្រុចសែល បានសម្ដែងការពេញចិត្តចំពោះការអនុម័តកញ្ចប់ទណ្ឌកម្មថ្មីនោះ ដែលជាកញ្ចប់ទណ្ឌកម្មទី១២របស់សហភាពអឺរ៉ុប ចាប់តាំងពីរុស្ស៊ីលុកលុយចូលអ៊ុយក្រែនមក។ សហភាពអឹរ៉ុបក៏នឹងចាត់វិធានការនានាផងដែរ ដើម្បីកែលម្អប្រសិទ្ធភាពនៃបណ្ដាទណ្ឌកម្មទាក់ទិននឹងប្រេងកាតរុស្ស៊ី។
ក្រុងមូស្គូត្រូវបានគេលើកឡើងថា បានលក់ពេជ្រដែលតំណាងឲ្យតួលេខពាណិជ្ជកម្មប្រមាណពី៤ទៅ៥ពាន់លានដុល្លារក្នុង១ឆ្នាំ យកទៅផ្កត់ផ្គង់សង្គ្រាមនៅអ៊ុយក្រែន។ ការហាមឃាត់នោះមានពេជ្រធម្ម ជាតិ ពេជ្រសំយោគឬគ្រឿងអលង្ការជាពេជ្រ ចាប់ពីខែមករាខាងមុខនេះទៅ និងហាមឃាត់នាំចូលពេជ្ររុស្ស៊ីកែច្នៃក្នុងប្រទេសនានាចាប់ពីខែកញ្ញាឆ្នាំ២០២៤។
ក្នុងកិច្ចប្រជុំកំពូលនោះដែរ មេដឹកនាំបណ្ដាប្រទេសជាសមាជិកសហភាពអឺរ៉ុប បានសម្រេច បើកការចរចាពីការចូលរបស់អ៊ុយក្រែនជាសមាជិកប្លុកនេះ។ ប្រធានាធិបតីអ៊ុយក្រែនបានសម្ដែងការអបអរសាទរយ៉ាងខ្លាំងចំពោះការសម្រេចនេះដែលលោកថា ជាជ័យជម្នះធំមួយរបស់ប្រទេសលោក។
ទោះបីយ៉ាងណាបណ្ដាមេដឹកនាំអឺរ៉ុបបានបរាជ័យនាយប់ថ្ងៃទី១៤មក១៥ធ្នូ ក្នុងការបញ្ចុះបញ្ចូលហុងគ្រី ឲ្យលុបចោលវេតូលើជំនួយថ្មីរបស់ប្លុកនោះមានទឹកប្រាក់៥០ពាន់លានអឺរ៉ូដល់អ៊ុយក្រែនដែរ ខណៈមុននេះហុងគ្រីគ្រាន់តែបោះឆ្នោតអនុប្បវាទលើការបើកការចរចាឲ្យអ៊ុយក្រែនចូលជាសមាជិកសហភាពអឺរ៉ុប៕
ចែករំលែកព័តមាននេះ