លោកតាឡេប អ៊ីប្រា ហ៊ីម អ្នកវិភាគស៊ីរី ថ្លែងកាលពីថ្ងៃទី២៣ ឧសភា ថា សមាជិកកម្លាំងសន្តិសុខស៊ីរីប្រមាណជា៥០០នាក់បានត្រូវស្លាប់ក្នុងបាតុកម្មនានាក្នុងប្រទេសនេះចាប់តាំងពី៩សបា្តហ៍មកហើយ ។
លោកអ៊ីប្រាហ៊ីម ក្នុងបទសំភាសន៍តាមទូរស័ព្ទមួយជាមួយស៊ីន ហួ ឱ្យដឹងថា ពួកទាហាន បានត្រូវសម្លាប់ដោយបណ្តាក្រុមឧក្រិដ្ឋជនប្រដាប់អាវុធដែលវាយប្រហារទាំងទៅលើកងយោធា ទាំងទៅលើបណ្តាជនស៊ីវិល ។ លោកបន្តថា ទាហាន២.៥០០នាក់ទៀតបានត្រូវរបួស ។
កាលពីពាក់កណ្តាលខែមីនា ការតវ៉ាប្រជាជនពុំធ្លាប់មានពីមុនមកនានាបានផ្ទុះឡើងក្នុងទីក្រុង DERAA ភាគខាងត្បូងប្រទេស បន្ទាប់ពីអាជ្ញាធរចាប់ខ្លួនក្មេងជំទង់១៥នាក់ដោយសារធ្វើសកម្មភាពគូរូបភាពនានាប្រឆាំងរដ្ឋាភិបាល នៅតាមជញ្ជាំងសាលាពួកគេ ។ ជាបន្តបន្ទាប់បាតុកម្មបានរីករាលដាលដល់កន្លែងជាច្រើនក្នុងដែនដីស៊ីរី ក្នុងនោះមានក្នុងរដ្ឋធានីដាម៉ាស់ផង។
បណ្តាក្រុមការពារសិទ្ធិមនុស្សបានចោទប្រកាន់កងទ័ពរដ្ឋាភិបាលថាបានសម្លាប់ពលរដ្ឋយ៉ាងតិច៩៦០នាក់ ហើយចាប់ខ្លួនមនុស្សប្រមាណជា១០០០នាក់ ។ អាជ្ញាធរស៊ីរីបានទម្លាក់ការទទួលខុសត្រូវចំពោះអំពើហិង្សាទាំងឡាយទៅលើបណ្តាសាខាភេរវកម្មដែលទទួលការទ្រទ្រង់ពីប្រទេសក្រៅ ដើម្បីសាបព្រោះភាពចលាចលក្នុងប្រទេស។
សហរដ្ឋអាមេរិក និងសហភាពអឺរ៉ុបបានថ្កោលទោសការបង្ក្រាបរបស់ក្រុងដាម៉ាស់ប្រឆាំងបាតុកម្មដោយសន្តិវិធី ហើយបានដាក់ទណ្ឌកម្មប្រឆាំងនឹងលោកប្រធានាធិបតីបាចារអាល់អាសាដ និងបណ្តាមនុស្សនៅជុំវិញលោកពីបទរំលោភបំពានសិទ្ធិមនុស្ស៕
ចែករំលែកព័តមាននេះ