សភាអាមេរិកបើកការស៊ើបអង្កេតដកតំណែងលោកចូបៃដិន
សហរដ្ឋអាមេរិក ៖ សភាអាមេរិកបានអនុម័តកាលពីថ្ងៃទី១៣ ធ្នូ ឲ្យបើកការស៊ើបអង្កេតជាផ្លូវការ
សហរដ្ឋអាមេរិក ៖ សភាអាមេរិកបានអនុម័តកាលពីថ្ងៃទី១៣ ធ្នូ ឲ្យបើកការស៊ើបអង្កេតជាផ្លូវការ ដកតំណែងលោកចូ បៃដិន ដោយលើកពីរឿងចម្រូងចម្រាស់់របស់កូនប្រុសប្រធានាធិបតីរូបនោះនៅបរទេស ប៉ុន្តែរឿងទាំងនោះត្រូវបានពួកអ្នកប្រជាធិបតេយ្យក្នុងសភាយល់ថាគ្មានមូលដ្ឋានទាំងស្រុង។
នីតិវិធីនោះពិតណាស់ហាក់ដូចជាមិនអាចទៅរួចឡើយ តែវាអាចជះឥទ្ធិពលមិនល្អខណៈការបោះឆ្នោតប្រធានាធិតីឆ្នាំ២០២៤កាន់តែជិតមកដល់ ដោយលោកបៃដិនជាបេក្ខជន។ ក្រុមអ្នកសាធារណដ្ឋដែលមានសំឡេងភាគច្រើនក្នុងសភា ចាប់តាំងពីខែមករាមកបានចោទប្រកាន់ប្រធានាធិបតីជាអ្នកប្រជាធិបតេយ្យថា បានប្រើឥទ្ធិពលលោកពេលលោកជាអនុប្រធានាធិបតីរបស់លោកបារ៉ាក់អូបាម៉ា ដើម្បីអាចឲ្យកូនប្រុសលោកធ្វើជំនួញគួរឲ្យសង្ស័យនៅចិននិងនៅអ៊ុយក្រែន។
ប្រធានគណៈកម្មាធិការស៊ើបអង្កេតរបស់សភា លោកJAMES COMER បានចោទប្រកាន់ថា លោកចូ បៃដិន បានភូតកុហកផ្ទួនៗដល់ប្រជាជនអាមេរិក។ ទាំងប្រធានាធិបតីទាំងកូនប្រុសលោក ទាំងអ្នកប្រជាធិបតេយ្យក្នុងសភា សុទ្ធតែបដិសេធទាំងស្រុងការចោទប្រកាន់នោះ។
លោកចូ បៃដិន ថ្លែងថា ពួកអ្នកសាធារណរដ្ឋបានជ្រើសរើសយកការខាតពេលឥតប្រយោជន៍ ជាមួយការចោទប្រកាន់ទាក់ទិននយោបាយដោយគ្មានមូលដ្ឋាន។ លោកមានប្រតិកម្មបែបនេះបន្ទាប់ពីការបើកជាផ្លូវការ នូវការស៊ើបអង្កេតដកតំណែងលោក។ លោកថាដោយមិនគិតធ្វើការដើម្បីឲ្យជីវភាពប្រជាជនអាមេរិកកាន់តែប្រសើរ ពួកគេបែរជាប្រកាន់យកអាទិភាពវាយប្រហារខ្ញុំជាមួយពាក្យភូតកុហក។
ចំណែកកូនប្រុសរបស់លោកបៃដិន គឹលោកហ៊ុនធ័រ បៃដិន បានអះអាងថា បិតាលោកមិនដែលលូកដៃខាងហិរញ្ញវត្ថុក្នុងការរកស៊ីធ្វើជំនួញរបស់ខ្ញុំឡើយ៕
ចែករំលែកព័តមាននេះ