រាជធានីភ្នំពេញ ៖ រថយន្តឡិចស៊ីសមួយគ្រឿង ស៊េរី RX300 ពណ៌ខ្មៅ ពាក់ស្លាកលេខ ភ្នំពេញ 2P-1990 ដែលសមត្ថកិច្ចអះអាងថា អ្នកបើកបរស្រវឹងធ្លាក់ភ្នែកបានបុកស្លាកសញ្ញាបង្ហាញផ្លូវបាក់រាបដល់ដីនៅចំណុចកែងមហាវិថីព្រះនរោត្តម និងផ្លូវលេខ១៨៤ ស្ថិតក្នុងសង្កាត់ផ្សារថ្មីទី៣ ខណ្ឌដូនពេញ កាលពីវេលាម៉ោង១១និង១៥នាទីយប់ថ្ងៃទី២៣ ឧសភា ២០១១
រាជធានីភ្នំពេញ ៖ រថយន្តឡិចស៊ីសមួយគ្រឿង ស៊េរី RX300 ពណ៌ខ្មៅ ពាក់ស្លាកលេខ ភ្នំពេញ 2P-1990 ដែលសមត្ថកិច្ចអះអាងថា អ្នកបើកបរស្រវឹងធ្លាក់ភ្នែកបានបុកស្លាកសញ្ញាបង្ហាញផ្លូវបាក់រាបដល់ដីនៅចំណុចកែងមហាវិថីព្រះនរោត្តម និងផ្លូវលេខ១៨៤ ស្ថិតក្នុងសង្កាត់ផ្សារថ្មីទី៣ ខណ្ឌដូនពេញ កាលពីវេលាម៉ោង១១និង១៥នាទីយប់ថ្ងៃទី២៣ ឧសភា ២០១១ ហើយជ្រុលបុករបងដែកធ្លាយចូលក្នុងធនាគារខេមកូ បង្កឱ្យមានការភ្ញាក់ផ្អើលជាខ្លាំង។
សាក្សីបាននិយាយឱ្យសមត្ថកិច្ចឱ្យដឹងថា មុនពេលកើតហេតុ មានរថយន្តមួយគ្រឿងម៉ាកឡិចស៊ីស ស៊េរី RX 300 ពណ៌ខ្មៅ បានបើកក្នុងល្បឿនលឿនលើកំណាត់មហាវិថីព្រះនរោត្តម ឆ្ពោះទៅទិសខាងត្បូង (វិមានឯករាជ្យ) ហើយរេពេញផ្លូវដែលត្រូវបានគេអះអាងថា ម្ចាស់រថយន្តស្រវឹងធ្លាក់ភ្នែក លុះមកដល់កែងផ្លូវលេខ១៨៤ ស្ថិតក្នុងសង្កាត់ផ្សារថ្មីទី៣ ខណ្ឌដូនពេញ រថយន្តចាក់កួរបត់ស្តាំ គោលបំណងទៅទិសខាងលិច ក៏ប៉ុន្តែជ្រុលឡើងលើចិញ្ចើមផ្លូវបុកស្លាកសញ្ញាបង្ហាញផ្លូវមួយដើមបាក់រាបដល់ដី ។
រថយន្តមិនបានឈប់នោះទេ ហើយបោលបុករបងដែកប៉ើង និងចូលដល់ក្នុងធនាគារខេមកូ ទៅមុខលែងរួច និងបានធ្វើឱ្យកងសន្តិសុខយាមធនាគារខាងលើរត់ជាន់ជើងគ្នា ទាំងព្រលឹងចុងសក់ ។ បន្ទាប់ពីចងកំហឹងនឹងស្លាកសញ្ញាបង្ហាញផ្លូវ និងបោលបំបុករបងដែករហូតដល់ក្នុងធនាគារទៅមុខលែងរួចនោះ គេឃើញយុវជនម្នាក់ស្រវឹងធ្លាក់ភ្នែកបានបើកទ្វាររថយន្តចេញមកខាងក្រៅ ប៉ុន្តែត្រូវកងសន្តិសុខយាមធនាគារឃាត់ខ្លួនមួយរយៈខ្លីប៉ុណ្ណោះ ។
សមត្ថកិច្ចបានឱ្យដឹងថា ម្ចាស់រថយន្តឡិចស៊ីសបង្កគ្រោះថ្នាក់នេះត្រូវគេស្គាល់ឈ្មោះស៊ុត ឧត្តម ភេទប្រុស អាយុ២០ឆ្នាំ ជានិស្សិត ស្នាក់នៅផ្ទះលេខ២០១ ផ្លូវលេខ២៧៤ សង្កាត់វាលវង់ ខណ្ឌ៧មករា ។ ម្ចាស់រថយន្តមានសំណាងមិនត្រូវបាននគរបាលជំនាញឃាត់ខ្លួននោះទេ ទុកឱ្យគេចខ្លួនដោយសុវត្ថិភាព ហើយនៅក្នុងហេតុការណ៍ខាងលើមិនមានមនុស្សណាម្នាក់ស្លាប់ និងរបួសទេ ។ រថយន្តត្រូវបានស្ទូចយកទៅទុកនៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ៕
ចែករំលែកព័តមាននេះ