មីយ៉ាន់ម៉ាក្លាយជាប្រទេសផលិតអាភៀ.នធំជាងគេ វ៉ាដាច់អាហ្វហ្គានីស្ថាន
ប្រទេសមីយ៉ាន់ម៉ា ៖ តាមរបាយការណ៍មួយរបស់អង្គការសហប្រជាជាតិចេញផ្សាយនាថ្ងៃទី១២ ធ្នូថា
ប្រទេសមីយ៉ាន់ម៉ា ៖ តាមរបាយការណ៍មួយរបស់អង្គការសហប្រជាជាតិចេញផ្សាយនាថ្ងៃទី១២ ធ្នូថា ប្រទេសមីយ៉ាន់ម៉ា ពេលនេះក្លាយជាប្រទេសផលិតអាភៀនធំជាងគេបំផុតលើពិភពលោកក្នុងឆ្នាំ២០២៣ ដោយវ៉ាដាច់អាហ្វហ្គានីស្ថានកន្លែងដែលពួកតាលីបង់ហាមឃាត់ការដាំដំណាំនោះ។
របាយការណ៍ចុងក្រោយរបស់ការិយាល័យអង្គការសហប្រជាជាតិប្រឆាំងគ្រឿងញៀននិងឧក្រិដ្ឋកម្មថា អាភៀនដែលប្រើសម្រាប់ផលិតហេរ៉ូអីុនប្រមាណជា១០៨០តោន ត្រូវបានផលិតនៅមីយ៉ាន់ម៉ាក្នុងឆ្នាំ២០២៣ ទល់នឹងត្រឹម៧៩០តោនក្នុងឆ្នាំ២០២២។ នៅអាហ្វហ្គានីស្ថាន មានការធ្លាក់ចុះការផលិតអាភៀនមកនៅត្រឹមតែប្រមាណជា៣៣០តោន ជាការធ្លាក់ចុះដល់៩៥%ក្រោយការហាមឃាត់ដំណាំអាភៀន ដោយពួកតាលីបង់ពីខែមេសាឆ្នាំទៅមិញមក។
តំបន់ត្រីកោណមាសជាតំបន់ព្រំដែនរវាងមីយ៉ាន់ម៉ា ឡាវនិងថៃនៅតែជាកន្លែងផលិតនិងរត់ពន្ធគ្រឿងញៀន ពិសេសមេតំហ្វេតាមីននិងអាភៀន។ របាយការណ៍នោះបន្តថា ការធ្វើអាជីវកម្មអាភៀននៅមីយ៉ាន់ម៉ានាំឲ្យបានចំណូលរវាងពី១ទៅ២,៤ពាន់លានដុល្លារស្មើរវាងពី១,៧%ទៅ៤,១%នៃផលទុនជាតិសរុបរបស់ប្រទេស។
សេដ្ឋកិច្ចមីយ៉ាន់ម៉ារងការបំផ្លាញដោយសារជម្លោះនិងអស្ថេរភាពចាប់តាំងពីពួកយោធាធ្វើរដ្ឋប្រហារដណ្ដើមអំណាចកាលពីឆ្នាំ២០២១មក នាំឲ្យកសិករជាច្រើនងាកទៅរកដំណាំអាភៀន។ នៅប្រទេសនេះជិត៩០%នៃផៃដីដាំអាភៀនប្រមាណជា៤១.៣០០ហិកតា ស្ថិតក្នុងរដ្ឋសានភាគខាងជើងប្រទេស ជាតំបន់មានអស្ថេរភាពដោយសារការប្រយុទ្ធគ្នារយៈពេលប៉ុន្មានសប្ដាហ៍ចុងក្រោយនេះ៕
ចែករំលែកព័តមាននេះ