មហាជនឆ្ងល់ថា ហេតុអ្វីអ្នកមានជំនឿទៅលើព្រះអង្គ ច័ន្ទ មុនី បែរជាភ្លេចយករបស់មួយនេះទៅវិញ? ក្រោយពីនាំគ្នាជីកទាំងស្មៅ ដងទាំងទឹក និងបេះទាំងស្លឹកដើមទឹកដោះជាដើម
រាជធានីភ្នំពេញ ៖ មហាជនឆ្ងល់ថា ហេតុអ្វីអ្នកមានជំនឿទៅលើព្រះអង្គ ច័ន្ទ មុនី បែរជាភ្លេចយករបស់មួយនេះទៅវិញ? ក្រោយពីនាំគ្នាជីកទាំងស្មៅ ដងទាំងទឹក និងបេះទាំងស្លឹកដើមទឹកដោះជាដើម។
ប្រាកដណាស់ វីដេអូថ្មីមួយ ដែលមានរយៈពេលជាង១នាទី បានក្លាយជាប្រធានបទដ៏ក្តៅ កំពុងតែផ្ទុះការវែកញែកពាសពេញបណ្តាញសង្គម ជុំវិញទិដ្ឋភាពក្រោយពីការនិមន្តរបស់ព្រះអង្គ ច័ន្ទ មុនី មកកាន់ខេត្តត្បូងឃ្មុំ ត្រូវបានបញ្ចប់។
តាមរយៈវីដេអូនោះ បងប្រុសម្នាក់ បានរៀបរាប់ដោយហួសចិត្តយ៉ាងដូច្នេះថា ៖ « លោកគ្រូច័ន្ទ មុនី បាននិមន្តទៅវិញហើយ ប៉ុន្តែបងប្អូនដែលគាត់មកចូលរួម ឥឡូវនេះ គាត់ភ្លេចរបស់ម្យ៉ាងបងប្អូន។ របស់ដែលគាត់យកមកម្នាក់បន្តិចៗ ឥឡូវក្លាយជាច្រើនបណ្តោយ»។
តាមរយៈវីដេអូខាងលើនេះបានបង្ហាញឱ្យថា របស់ម្យ៉ាងដែលបងប្អូនភ្លេចនោះ គឺសំរាម។ កាកសំណល់សំរាម ត្រូវបានរាយប៉ាយពាសពេញដងផ្លូវ និងសួនច្បារសាធារណៈ ហើយភាគច្រើន គឺជាថង់ប្លាស្ទិក ដែលបន្សល់ទុកដោយក្រុមប្រជាពលរដ្ឋនាំគ្នាសម្រុកមកកាន់ទីនេះ ដើម្បីបានជួបព្រះភ័ក្រព្រះអង្គ ច័ន្ទ មុនី ដោយផ្ទាល់តាមជំនឿ.តៗគ្នា។
ក្រោយពីឃើញនូវសកម្មភាពមិនគួរគប្បី គ្មានភាពថ្លៃថ្នូររបស់ប្រជាពលរដ្ឋ ដែលបង្កឡើងពីក្រុមអ្នកគាំទ្រព្រះអង្គ ច័ន្ទ មុនី បែបនេះ មហាជននៅក្នុងបណ្តាញសង្គមបានរិះគន់ដោយចំៗថា «ចង់គោរពអីគោរពទៅ ជឿអីក៏ជឿទៅមិនហាមទេ ប៉ុន្តែសូមចិត្តរឿងសំរាមនឹងមួយ ស៊ីហើយ ផឹកហើយ សូមប្រមូលយកទៅវិញផងលោកព្រះ!»។ មហាជនម្នាក់ទៀតក៏លើកឡើងដែរថា «ក្រែងមកជួបអ្នកមានបុណ្យ ដើម្បីរំដោះទុក្ខ ដើម្បីបានសុខចម្រើន តែបើមួយៗសុទ្ធតែធុនហ្នឹង គឺមកយកបាបទៅផ្ទះវិញទេ!»។
ស្របគ្នានឹងរឿងរ៉ាវខាងលើនេះដែរ មហាជនបានចោទជាចម្ងល់ថា ហេតុអ្វីប្រជាពលរដ្ឋដែលមានជំនឿលើព្រះអង្គ ច័ន្ទ មុនី ដែលកន្លងមក នាំគ្នាជីកទាំងស្មៅ ដងទាំងទឹកស្ទឹង និងបេះទាំងស្លឹកដើមទឹកដោះជាដើម ម្តេចមិនប្រមូលយកកាកសំណល់សំរាមទៅវិញផង?។ ទោះបីជាសំរាមទាំងនោះយកទៅដាំទឹកផឹកមិនបាន ប៉ុន្តែសំរាមទាំងនោះ ក៏មានវត្តមាននៅក្នុងពិធីដែលអ្នកមានបុណ្យនិមន្តមកដល់ដូចគ្នាដែរទេតាស?
សូមរម្លឹកផងដែរថា រាល់ការនិមន្តរបស់ព្រះអង្គ ច័ន្ទ មុនី ទៅកាន់ទីណា គឺតែងតែមានអ្នកមានជំនឿមកប្រមូលម្តុំគ្នាជាច្រើន។ ជាក់ស្តែង រឿងអ្នកមានជំនឿលើព្រះអង្គ ដែលចោលសំរាមផ្តេសផ្តាស់បែបនេះ មិនមែនទើបតែកើតមានលើកទី១នោះទេ។
ហើយគេនៅចាំបានថា កាលពីថ្ងៃទី២៩ ខែតុលា ឆ្នាំ២០២៣ កន្លងទៅនេះ មនុស្សម្នាជាច្រើនមកពីគ្រប់ទិសទី បានទៅកាន់តំបន់អង្គរវត្ត ដើម្បីស្ដាប់ព្រះធម៌ទេសនារបស់ព្រះអង្គ ច័ន្ទ មុនី ព្រះសង្ឃធុតង្គ ដែលការប៉ាន់ស្មានពីខាងគ្រឹះស្ថានអង្គរថា មានភ្ញៀវទេសចរប្រមាណ១៥ម៉ឺននាក់ បានទៅដល់អង្គរវត្ត ។ ប៉ុន្តែអ្វីដែលមិនគួរកើតឡើងនោះ គឺក្រោយការចាកចេញពីភ្ញៀវទេសចរ បានបន្សល់ទុកនូវសំរាមយ៉ាងច្រើន សម្រាប់បង្អួតភ្នែកភ្ញៀវទេសចរជាតិ និងអន្តរជាតិ។
តើពេលណាទើបខ្មែរចេះភ្ញាក់រលឹក និងចេះទុកដាក់សំរាមឱ្យបានត្រឹមត្រូវ? គ្រប់យ៉ាង គឺផ្តើមចេញពីយើងគ្រប់គ្នា ចូលរួមទុកដាក់សំរាមឱ្យបានត្រឹមត្រូវ។ អត្ថបទដោយ ៖ អោម ចែតច័ន្ទណារ៉ា
ចែករំលែកព័តមាននេះ