ADផ្ទាំងផ្សព្វផ្សាយពាណិជ្ជកម្ម

Picture

កម្ពុជា​បង្ហាញ​លើ​ឆាក​អន្តរជាតិ ក្នុង​ការ​រួមចំណែក​ឆ្លើយ​តប​នឹង​ការ​ប្រែប្រួល​អាកាសធាតុ

2 ខែ មុន

រាជធានី​ភ្នំពេញ ៖ រដ្ឋមន្ត្រីក្រសួង​បរិស្ថាន​កម្ពុជា បាន​បង្ហាញ​លើ​ឆាក​អន្តរជាតិ ក្នុង​ការ​រួមចំណែក ឆ្លើយ​តប​នឹង​ការ​ប្រែប្រួល​អាកាសធាតុ ក្នុង​នោះ​មាន​ដាក់​ចេញ​យុទ្ធនាការ កាត់​បន្ថយ​ការ​ប្រើប្រាស់​ថង់​ប្លា​ស្ទិ​ក និង​ការ​បណ្តុះ​ដើមឈើ​ជាង ១​លាន​ក្នុង​១​ឆ្នាំ…

រាជធានី​ភ្នំពេញ ៖ រដ្ឋមន្ត្រីក្រសួង​បរិស្ថាន​កម្ពុជា បាន​បង្ហាញ​លើ​ឆាក​អន្តរជាតិ ក្នុង​ការ​រួមចំណែក ឆ្លើយ​តប​នឹង​ការ​ប្រែប្រួល​អាកាសធាតុ ក្នុង​នោះ​មាន​ដាក់​ចេញ​យុទ្ធនាការ កាត់​បន្ថយ​ការ​ប្រើប្រាស់​ថង់​ប្លា​ស្ទិ​ក និង​ការ​បណ្តុះ​ដើមឈើ​ជាង ១​លាន​ក្នុង​១​ឆ្នាំ សំដៅ​បង្កើន​គម្រប​ព្រៃឈើ ឲ្យ​បាន​៦០% ត្រឹម​ឆ្នាំ​២០៥០ ។

នៅ​ទីក្រុង​ឌូ​បៃ ប្រទេស​អេ​មី​រ៉ាត​អា​រ៉ាប់​រួម នា​ថ្ងៃ​ទី​១០ ខែធ្នូ ឆ្នាំ​២០២៣ កម្ពុជា​មាន​កិត្តិយស​គួរ​ជាទី​មោ​ទ​ន នៅ​លើ​ឆាក​អន្តរជាតិ ពី​សន្និសីទ​កំពូល​បណ្តា​ភាគី នៃ​អនុសញ្ញា​ក្របខ័ណ្ឌ​សហប្រជាជាតិ ស្តី​ពី ការ​ប្រែប្រួល​អាកាសធាតុ លើក​ទី​២៨(COP28) ដោយ​ទទួល​បានការ​ចុះហត្ថលេខា ក្នុង​នាម​រាជរដ្ឋាភិបាល​កម្ពុជា លើ​ឯកសារ​របស់​ក្រុមប្រឹក្សា​ស្ការ​អភិវឌ្ឍន៍​វិស័យ​កសិកម្ម និង​ជនបទ ស្តី​ពី​តួនាទី និង​ភារកិច្ច​សម្រាប់​សហ​ស្ថាបនិក និង​សមាជិក ក្រោម​ប្រធានបទ ស្តី​ពី សម្ព័ន្ធភាព​ជើងឯក​សម្រាប់​ការ​ផ្លាស់​ប្តូរ​ប្រព័ន្ធ​ស្បៀង ។

បន្ថែម​ពី​នេះ កម្ពុជា​ទទួល​ការ​អញ្ជើញ​ពី​សន្និសីទ​កំពូល​នេះ ឱ្យ​ថ្លែង​សុន្ទរកថា គន្លឹះ ស្តី​ពី​ការ​ព​ន្លឿ​ន​ការ​ផ្លាស់​ប្តូរ​នៅ​បណ្តាញ​អាកាសធាតុ និង​អាហារូបត្ថម្ភ (Nutrition-Climate Nexus) ។

ក្នុង​នាម​កម្ពុជា ឯកឧត្តម​បណ្ឌិត អ៊ា​ង សុ​ផល្លែ​ត អះអាង និង​គូស​បញ្ចា​ក់លើ​ការងារ​អាទិភាព​ថា ដើម្បី​ឆ្លើយ​តប នឹង​ប្រធានបទ​នេះ ក្រសួងបរិស្ថាន បាន​ដាក់​ចេញ​នូវ​ការងារ​អាទិភាព​រួច​ទៅ​ហើយ នៅ​ក្នុង​យុទ្ធនាការ​កាត់​បន្ថយ​ការ​ប្រើប្រាស់​ថង់​ប្លា​ស្ទិ​ក និង​ការ​បណ្តុះ​ដើមឈើ​ជាង​១​លាន ក្នុង​១​ឆ្នាំ សំដៅ​បង្កើន​គម្រប​ព្រៃឈើ​ឱ្យ​បាន​៦០% ត្រឹម​ឆ្នាំ​២០៥០ និង​ចូលរួម​កែប្រែ​គុណភាព​ដី សម្រាប់​ដំណាំ​កសិកម្ម ។

លទ្ធផល​គួរ​ទី​មោ​ទ​ន​មួយទៀត នៅ​ថ្ងៃ​ដដែល​នេះ កម្ពុជា​នឹង​ត្រៀម​ដាក់​ក្រុមប្រឹក្សា​ជាតិ​អភិវឌ្ឍន៍ ដោយ​ចី​រ​ភា​ទៅ​ជា​អង្គភាព​ទទួលស្គាល់ ដែល​មាន​លក្ខណៈ​ឯករាជ្យ​ភាព អធិបតេយ្យភាព​កម្ពុជា និង​ភាព​ជា​ម្ចាស់ (Accredited Entity) ដោយ​មានការ​គាំទ្រ និង​សន្យា​ជួយ​សម្របសម្រួល​ពី​លោកស្រី Nonhlanhla Zindela អគ្គ​នាយិកា​រង និង​ជា​ប្រធាន​កម្មវិធី​មូលនិធិ​បរិស្ថាន​បៃតង Green Climate Fund (GCF) ឱ្យ​បាន​ក្នុង​រយៈពេល​២​ឆ្នាំ ខាង​មុខ​នេះ ហើយនឹង​ឱ្យ​កាន់តែ​មាន​ប្រសិទ្ធភាព​បំផុត ។

សូម​រម្លឹក​ជូន​ថា សន្និសីទ​កំពូល​បណ្តា​ភាគី នៃ​អនុសញ្ញា​ក្របខ័ណ្ឌ​សហប្រជាជាតិ ស្តី​ពី ការ​ប្រែប្រួល​អាកាសធាតុ លើក​ទី​២៨ (COP28) នៅ​ទីក្រុង​ឌូ​បៃ ប្រទេស​អេ​មី​រ៉ាត​អា​រ៉ាប់​រួម នា​ឆ្នាំ​នេះ មាន​រយៈពេល ១២​ថ្ងៃ ចាប់ពី​ថ្ងៃ​ទី​៣០ ខែវិច្ឆិកា រហូត​ដល់​ថ្ងៃ​ទី​១២ ខែធ្នូ ឆ្នាំ​២០២៣ ៕

អត្ថបទសរសេរ ដោយ

កែសម្រួលដោយ