ភ្នំពេញ៖ តាមប្រតិទិន ដែលបានគ្រោងទុក នៅថ្ងៃចន្ទ ទី១១ធ្នូស្អែកនេះ ជាថ្ងៃចុងក្រោយ ដែលគ.ជ.ប ទទួលចុះបញ្ជីគណបក្ស និងបញ្ជីបេក្ខជន​ ឈរឈ្មោះបោះឆ្នោតព្រឹទ្ធសភា នីតិកាលទី៥ ឆ្នាំ២០២៤។

គិតត្រឹមថ្ងៃទី១០ធ្នូ គ.ជ.ប ប្រកាសថា មានគណបក្ស ៤ហើយ បានចុះបញ្ជី ដាក់បេក្ខជនចូលរួម​ប្រកួតប្រជែង​ការបោះឆ្នោតព្រឹទ្ធសភា។ ក្នុងនោះ គ.ជ.ប បានសម្រេចទទួលស្គាល់ផ្លូវការនូវ​បញ្ជីឈ្មោះបេក្ខជនរបស់គណបក្សប្រជាជនកម្ពុជា ខណៈដែលគណបក្ស ៣ទៀត កំពុងពិនិត្យផ្ទៀងផ្ទាត់ រួមមាន គណបក្សឆន្ទៈខ្មែរ គណបក្សកម្លាំងជាតិ និងគណបក្សហ៊្វុនស៊ិនប៉ិច។

គណបក្ស​ហ៊្វុនស៊ិនប៉ិច បានដាក់ពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ កាលពីព្រឹកថ្ងៃទី៩ ខែធ្នូ ឆ្នាំ២០២៣។

ការបោះឆ្នោតព្រឹទ្ធសភា នីតិកាលទី៥ នឹងធ្វើឡើង នៅថ្ងៃអាទិត្យ ទី២៥ ខែកុម្ភៈ ឆ្នាំ២០២៤ ដែលជាការបោះឆ្នោតអសកល ដោយមានតែសមាជិកក្រុមប្រឹក្សាឃុំសង្កាត់ ក្នុងតំណែង និងអ្នកតំណាងរាស្ត្រ ក្នុងតំណែងប៉ុណ្ណោះ ជាអ្នកបោះឆ្នោត។

លទ្ធផលនៃការបោះឆ្នោតឃុំសង្កាត់ អាណត្តិទី៥ ឆ្នាំ២០២២ បង្ហាញថា មានគណបក្ស ៩ បាន​ជាប់ឆ្នោត ដែលមានសមាសភាពសរុប ១១៦២២រូប​។ ក្នុងនោះ គណបក្សប្រជាជនកម្ពុជា ឈ្នះឆ្នោតច្រើនជាងគេ ជាង ៨០ភាគរយ ដោយមានសមាសភាពជាក្រុមប្រឹក្សាឃុំសង្កាត់ ចំនួន ៩៣៧៦រូប។ គណបក្សភ្លើងទៀន មាន ២១៩៨រូប។ គណបក្សហ៊្វុនស៊ិនប៉ិច ១៩រូប។ គណបក្សរួបរួមជាតិ ១៣រូប។ គណបក្សប្រជាធិបតេយ្យមូលដ្ឋាន ៦រូប។ គណបក្សខ្មែរ​ស្រឡាញ់ជាតិ ៥រូប។ គណបក្សយុវជនកម្ពុជា ៣រូប។ គណបក្សកម្ពុជានិយម ១រូប។ គណបក្សសំបុកឃ្មុំសង្គមប្រជាធិបតេយ្យ ១រូប។

ដោយឡែក លទ្ធផលនៃការបោះឆ្នោតតំណាងរាស្ត្រ នីតិកាលទី៧ នាខែកក្កដា ឆ្នាំ២០២៣ គឺក្នុងចំណោមអាសនៈរដ្ឋសភា សរុប ១២៥រូប មានគណបក្សប្រជាជនកម្ពុជា ១២០រូប និងគណបក្សហ៊្វុនស៊ិនប៉ិច ៥រូប៕