បាងកក៖ អាជ្ញាធរនៅប្រទេសថៃបានស្នើសុំឱ្យមន្ទីរពេទ្យឯកជនក្នុងស្រុកគិតគូរយកថ្លៃថ្នាំពេទ្យ និងថ្លៃសេវាព្យាបាលធូរថ្លៃ។ បើមិនដូច្នេះទេ ប្រជាពលរដ្ឋត្រូវរ៉ាប់រងថ្លៃចំណាយច្រើនណាស់ទៅលើជីវភាពរស់នៅប្រចាំថ្ងៃ។ លោកវឌ្ឍនាសាក់ ស៊ូរៀម (Wattanasak Suriam) ប្រធាននាយកដ្ឋានពាណិជ្ជកម្មក្នុងស្រុក…
បាងកក៖ អាជ្ញាធរនៅប្រទេសថៃបានស្នើសុំឱ្យមន្ទីរពេទ្យឯកជនក្នុងស្រុកគិតគូរយកថ្លៃថ្នាំពេទ្យ និងថ្លៃសេវាព្យាបាលធូរថ្លៃ។ បើមិនដូច្នេះទេ ប្រជាពលរដ្ឋត្រូវរ៉ាប់រងថ្លៃចំណាយច្រើនណាស់ទៅលើជីវភាពរស់នៅប្រចាំថ្ងៃ។ លោកវឌ្ឍនាសាក់ ស៊ូរៀម (Wattanasak Suriam) ប្រធាននាយកដ្ឋានពាណិជ្ជកម្មក្នុងស្រុក ថ្លែងថាលោកបានពិគ្រោះជាមួយសមាគមពេទ្យឯកជនដើម្បីស្វះស្វែងរកកិច្ចសហការពីមន្ទីរពេទ្យឯកជនជាង៣រយកន្លែង សំដៅធានាការប្រតិបត្តិស្របទៅតាមផ្លូវច្បាប់។
អាជ្ញាធរតម្រូវឱ្យមន្ទីរពេទ្យឯកជនបង្ហាញឃ្យូអ័រកូដ (QR code) ឱ្យបានច្បាស់លាស់ដើម្បីឱ្យសាធារណជនងាយស្រួលឆែកមើលតម្លៃថ្នាំពេទ្យ និងតម្លៃសេវាព្យាបាល។ បើអតិថិជនយល់ថាមន្ទីរពេទ្យបម្រើសេវាមិនសូវល្អ ឬមានចំណុចខ្វះខាតណាមួយ ពួកគេអាចរាយការណ៍ទៅនាយកដ្ឋានតាមរយៈលេខទូរស័ព្ទពិសេស។ នាយកដ្ឋាននឹងបើកការស៊ើបអង្កេតនៅពេលទទួលបានសេចក្ដីរាយការណ៍ និងចាត់វិធានការទៅតាមផ្លូវច្បាប់បើមានករណីរំលោភទៅលើគោលការណ៍ទាំងនេះ។
លោកវឌ្ឍនាសាក់ថ្លែងបន្តទៀតថានាយកដ្ឋានរបស់លោកស្នើសុំឱ្យមន្ទីរពេទ្យឯកជនធ្វើឱ្យមានតម្លាភាពនូវតម្លៃទិញចូល និងលក់ចេញនៃថ្នាំពេទ្យចំនួន២រយមុខ រួមជាមួយគ្រឿងបរិក្ខារពេទ្យ ថ្លៃសេវាព្យាបាល និងសេវាដទៃទៀតដូចដែលមានចែងនៅក្នុង «កម្មវិធីជាតិស្ដីពីថ្លៃថ្នាំ និងសេវាព្យាបាលអ្នកជំងឺ»។ កម្មវិធីនេះតម្រូវឱ្យមន្ទីរនៅទូទាំងប្រទេសថៃជួយសង្គ្រោះអ្នកជំងឺសិនកុំទាន់អាលគិតរឿងមានលុយ ឬអត់លុយនៅក្នុងរង្វង់៧២ម៉ោងដំបូង។
វិធានការនេះត្រូវតែអនុវត្តទោះបីមន្ទីរពេទ្យមិនបានចុះកិច្ចព្រមព្រៀងដើម្បីទទួលបានប្រាក់ឧបត្ថម្ភពីរដ្ឋក៏ដោយ។ នៅក្នុងឱកាសជួបគ្នានោះ នាយកដ្ឋានស្នើសុំឱ្យមន្ទីរពេទ្យឯកជនសហការជាមួយអាជ្ញាធរដើម្បីរក្សាតម្លៃថ្នាំពេទ្យ គ្រឿងបរិក្ខារពេទ្យ សេវាព្យាបាល និងសេវាដទៃទៀតឱ្យនៅដដែល។ នាយកដ្ឋានស្នើសុំឱ្យពួកគេបញ្ចុះតម្លៃនៅអំឡុងពេលចូលឆ្នាំសាកល។
សាធារណជនអាចឆែកមើលតម្លៃថ្នាំនៅលើគេហទំព័ររបស់នាយកដ្ឋានដែលមានរាយនាមមុខទំនិញជាង៣ម៉ឺនប្រភេទ។ នៅពេលអាជ្ញាធរបង្ហោះទិន្នន័យទាំងនេះនៅលើវេបសាយរបស់ខ្លួន សាធារណជនបញ្ចេញមតិបែបវិជ្ជាមាន។ ពួកគេងាយស្រួលប្រៀបធៀបតម្លៃគ្នារវាងមន្ទីរពេទ្យមួយ និងមន្ទីរពេទ្យមួយទៀត មុននឹងសម្រេចចិត្តថាទៅរកសេវាព្យាបាលនៅមន្ទីរពេទ្យណាដែលជាជម្រើសល្អជាងគេ៕
ប្រភព៖ Bangkok Post
https://www.bangkokpost.com/business/general/2701746/private-hospitals-urged-to-cap-prices
ចែករំលែកព័តមាននេះ