ប្រាក់រៀលកម្ពុជាដែលជារូបិយវត្ថុជាតិត្រូវបានគេដឹងថា បានចាប់កំណើតឡើងពីរដង ខុសពី រូបិយវត្ថុរបស់ប្រទេសនានាដែលកំពុងតែចរាចរណ៍នៅពេលបច្ចុប្បន្ន ។ នៅក្រោមរបបអាណានិគមនិយមបារាំង កម្ពុជាត្រូវបានបារាំងបោះពុម្ពអោយចាយប្រាក់ ឥណ្ឌូចិនរួមគ្នាជាមួយនឹង វៀតណាម និង…
ប្រាក់រៀលកម្ពុជាដែលជារូបិយវត្ថុជាតិត្រូវបានគេដឹងថា បានចាប់កំណើតឡើងពីរដង ខុសពី រូបិយវត្ថុរបស់ប្រទេសនានាដែលកំពុងតែចរាចរណ៍នៅពេលបច្ចុប្បន្ន ។
នៅក្រោមរបបអាណានិគមនិយមបារាំង កម្ពុជាត្រូវបានបារាំងបោះពុម្ពអោយចាយប្រាក់ ឥណ្ឌូចិនរួមគ្នាជាមួយនឹង វៀតណាម និង ឡាវ ប៉ុន្តែក្រោយពេលដែលដណ្តើមឯករាជ្យ នៅថ្ងៃទី០៩ ខែ វិច្ឆិកា ឆ្នាំ១៩៥៣ មក កម្ពុជាក៏បានបង្កើតធនាគារជាតិនៃកម្ពុជា ហើយក៏ បានបង្កើត និងបោះពុម្ពប្រាក់រៀលរបស់ខ្លួន ហើយបានដាក់ចរាចរណ៍ដោះដូរទំនិញ ជាបន្ត បន្ទាប់រហូតដល់ថ្ងៃទី១៧ ខែមេសា ឆ្នាំ១៩៧៥ ប្រាក់រៀលក៏បានស្លាប់ ។
ស្ថិតនៅក្រោមការគ្រប់គ្រងរបស់របបខ្មែរក្រហម ពលរដ្ឋគ្មានសិទ្ធិកាន់ប្រាក់រៀល ឫ រូបិយវត្ថុ នានាដើម្បីដោះដូរទំនិញនិងជីវភាពរស់នៅប្រចាំថ្ងៃបានឡើយ ដោយរស់ជាមួយនឹងសេដ្ឋកិច្ច តាមបែបផែនការធ្វើការដោយកម្លាំងដូរអាហារបន្តិចបន្តួចដើម្បីរស់ ។
លុះក្រោយពេលដែលរបៀបខ្មែរក្រហមដួលរលំទៅនៅថ្ងៃទី ៧ ខែ មករា ឆ្នាំ១៩៧៩ រដ្ឋា ភិបាលកម្ពុជាសម័យនោះក៏បានបង្កើតធនាគារនិងរៀបចំបោះពុម្ពក៏ដូចជាដាក់ដំណើរការប្រាក់រៀលឡើងវិញ ។
ប្រាក់រៀលកម្ពុជាបានចាប់កំណើតជាថ្មី ដែលអាចនិយាយថា កំណើតទី២ នៅថ្ងៃទី ២០ ខែមីនា ឆ្នាំ១៩៨០ ហើយមកដល់ពេលនេះ ធនាគារជាតិនៃកម្ពុជា ដែលជាអ្នកគ្រប់ គ្រង ការបោះពុម្ភ និង គ្រប់គ្រងលុយរៀល តែងតែយកថ្ងៃនេះរៀបចំ ព្រឹត្តិការណ៍ ផ្សេងៗ ដើម្បីរំលឹកការចងចាំ និង ក៏ដូចជាជំរុញដំណើរការពង្រឹងប្រាក់រៀល ។
តាមធនាគារជាតិនៃកម្ពុជា នៅពេលនេះ ក្រដាសលុយដែលមានតម្លៃនឹងត្រូវបាន ប្រើប្រាស់ មាន ប្រមាណជា ១៣ ប្រភេទ ដោយរាប់ចាប់តាំងពី១០០រៀល, ២០០រៀល,៥០០រៀល, ១០០០រៀល, ២០០០រៀល, ៥០០០រៀល, ១០០០០រៀល, ២០០០០រៀល,៥០០០០រៀល ដោយឡែកក្រដាសប្រាក់រៀលដែលគេឃើញនៅចរាចរណ៍ម្តងម្កាល គឺមាន ៥០រៀល, ១៥០០០រៀល ៣០០០០រៀល និង ១០០០០០រៀល ។ ដោយ៖ ស ផាត់
ចែករំលែកព័តមាននេះ