ADផ្ទាំងផ្សព្វផ្សាយពាណិជ្ជកម្ម

Picture

ខ្លា​ខាំ​ស្លា.ប់​មនុស្សបី​នាក់​នៅ​ម៉ាឡេ​ស៊ី​, ​អាជ្ញា​ធរ​​សម្រេច​ប្រើ​វិធាន​ការ​ក្ដៅ

2 ខែ មុន

គូឡាឡាំពួរ៖ ប្រទេស​ម៉ាឡេស៊ី​ចាប់​ផ្ដើម​ចាត់​វិធាន​ការ​ក្ដៅ​ហើយ​ពេល​នេះ។​ បណ្ដោយ​ត​ទៅទៀត​មិន​បាន​​ទេ​​បន្ទាប់​ពី​ខ្លា​​ខាំ​សម្លាប់​មនុស្ស​អស់​៣​នាក់​ត្រឹម​តែ​រយៈ​ពេល​២​ខែ​ប៉ុណ្ណោះ​។​ ជា​ជំហាន​ដំបូង អាជ្ញាធរ​ចាប់​ផ្ដើម​ដាក់​ពង្រាយ​អន្ទាក់​ចំនួន​១១​ និង​កាមេរ៉ា​២០​គ្រឿង​បង្កប់​នៅ​​​​​​ក្នុង​តំបន់​ព្រៃ​ស្រោង​នៃ​ស្រុក​គួរមូសាង (Gua Musang) រដ្ឋ​កេឡាន់តាន់ (Kelantan)។…

គូឡាឡាំពួរ៖ ប្រទេស​ម៉ាឡេស៊ី​ចាប់​ផ្ដើម​ចាត់​វិធាន​ការ​ក្ដៅ​ហើយ​ពេល​នេះ។​ បណ្ដោយ​ត​ទៅទៀត​មិន​បាន​​ទេ​​បន្ទាប់​ពី​ខ្លា​​ខាំ​សម្លាប់​មនុស្ស​អស់​៣​នាក់​ត្រឹម​តែ​រយៈ​ពេល​២​ខែ​ប៉ុណ្ណោះ​។​ ជា​ជំហាន​ដំបូង អាជ្ញាធរ​ចាប់​ផ្ដើម​ដាក់​ពង្រាយ​អន្ទាក់​ចំនួន​១១​ និង​កាមេរ៉ា​២០​គ្រឿង​បង្កប់​នៅ​​​​​​ក្នុង​តំបន់​ព្រៃ​ស្រោង​នៃ​ស្រុក​គួរមូសាង (Gua Musang) រដ្ឋ​កេឡាន់តាន់ (Kelantan)។ នៅ​ទី​នេះ​ហើយ​ដែល​កើត​មាន​ការ​ខាំ​សម្លាប់​មនុស្ស​ស្រស់​ៗ​អស់​បី​នាក់​។

បើ​គិត​ទាំង​លើក​នេះ​ទៀត ​សត្វ​ខ្លា​ខាំ​​មនុស្ស​ចំនួន​៥​ករណី និង​ស្លាប់​មនុស្ស​៤​នាក់​នៅ​ស្រុក​ខាង​លើ​នេះ​ចាប់​តាំង​ពី​ឆ្នាំ​២០២១​។ នេះ​បើ​យោង​តាម​ការ​បង្ហើប​ឱ្យ​ដឹង​ពី​លោក​មហាម៉ាត់ ហាហ៊្វីត រ៉ូហានី (Mohamad Hafid Rohani) ជា​ប្រធាន​​នាយក​​​ដ្ឋាន​សត្វ​ព្រៃ និង​សួន​ឧទ្យាន​ជាតិ​នៃ​រដ្ឋ​កេឡាន់តាន់។ ករណីស្លាប់​មនុស្ស​៣​នាក់​កើត​ឡើង​នៅ​ខែ​តុលា​ និង​ខែ​កញ្ញា​ ឆ្នាំ​២០២៣​។​

​លោក​កំពុង​បារម្ភ​យ៉ាង​ខ្លាំង​ចំពោះ​បញ្ហា​នេះ​។ បើ​និយាយ​ទៅ​​, រយៈ​ពេល​ជា​ច្រើន​ទស​វត្ស​មក​ហើយ​ទើប​តែ​ពេល​នេះ​ទេ​ដែល​មាន​ករណី​ខ្លា​ខាំ​សម្លាប់​មនុស្ស​​​ញឹក​ញាប់​បំផុត​។ លើក​នេះ គេ​​យក​​​អន្ទាក់​រាង​ចតុកោណ​​​ដែល​គ្រប​ជុំវិញ​ដោយ​​ស្លឹក​ដូង​ប្រេង​​ទៅ​ដាក់​នៅ​ទី​កន្លែង​ដែល​កើត​មាន​ការ​ខាំ​សម្លាប់​មនុស្ស​។ អន្ទាក់​មួយ​ត្រូវ​គេ​បង្កប់​នៅ​ក្នុង​ចម្ការ​ដូង​ប្រេង​។​​

​គេ​បាន​ដាក់​សត្វ​ពពែ​រស់ជា​ច្រើន​ក្បាល​នៅ​ក្នុង​ទ្រុង​បិទ​ជិត​ដើម្បី​បោក​បញ្ឆោត​ឱ្យ​សត្វ​ខ្លា​ដើរ​ចូល​ទៅ​ក្នុង​អន្ទាក់​។ សត្វ​ខ្លា​ម៉ាឡេ​ដែល​គេ​​សង្ស័យ​ថា​​ជា​អ្នក​​ខាំ​​សម្លាប់​មនុស្ស​​ខាង​លើ​នោះ​​​ជា​​ប្រភេទ​សត្វ​កម្រ​​។​ គេ​​គិត​​ថា​សត្វ​នេះ​នៅ​សេស​សល់​​មិន​ដល់​១៥០​ក្បាល​ទេ​នៅ​ទូទាំង​ពិភពលោក​។ លោក​ហាហ៊្វីត​ប្រាប់​ឱ្យ​ដឹង​ថា​​​នៅ​​រដ្ឋ​កេឡាន់​តាន់​មានខ្លា​ប្រភេទនេះ​៣៥​ក្បាល​។​

​ជា​ទូទៅ​ សត្វ​ខ្លា​កម្រ​ខាំ​មនុស្ស​ណាស់់ ប៉ុន្តែ​ករណី​នេះ​ក៏​ធ្លាប់​កើត​មាន​ម្ដង​ម្កាល​ផង​ដែរ​នៅ​ក្នុង​តំបន់​អភិវឌ្ឍ​។ ពោល​គឺ​តំបន់​ដែល​ធ្លាប់​ជា​ដែន​ជម្រក​សត្វ​ព្រៃ​ ហើយ​ត្រូវ​មនុស្ស​ចូល​ទៅ​កាប់​ទន្ទ្រាន​ដើម្បី​យក​ដី​​ធ្វើ​ជា​គម្រោង​អភិវឌ្ឍ​អ្វី​មួយ​។ កាល​ពី​ខែ​វិច្ឆិកា គេ​ដាក់​អន្ទាក់​ជាប់​​ខ្លា​ញី​មួយ​ក្បាល​ ហើយ​ដឹក​យក​ទៅដាក់​នៅ​តំបន់​អភិរក្ស​សត្វ​ព្រៃ​។ ប៉ុន្តែ​គេ​មិន​​ទាន់​ដឹង​​តើ​សត្វ​ខ្លា​ជាប់​អន្ទាក់​ហ្នឹង​បាន​ខាំ​មនុស្ស​របួស​ ឬ​ស្លាប់​នៅ​ឡើយ​ទេ​​​​។

នៅ​ក្នុង​ចំណោម​អ្នក​ស្លាប់​២​នាក់​​តាំង​ពី​ឆ្នាំ​២០២១ ម្នាក់​ជា​កម្ម​ករ​ធ្វើ​ការ​នៅ​ក្នុង​ចម្ការ​ធំៗ​នៃ​ប្រទេស​ម៉ាឡេស៊ី​។ ចំណែកជន​រង​គ្រោះ​ពីរ​នាក់​ទៀត​​​ជា​អ្នក​ស្រុក​រស់​នៅ​តំបន់​នោះ​ផ្ទាល់​តែ​ម្ដង​​​។ ខ្លា​ញី​មួយ​ក្បាល​​ដែល​ខាំ​បុរស​ម្នាក់​បណ្ដាល​ឱ្យ​របួស​ធ្ងន់​កាល​ពី​ខែ​កក្កដា ឆ្នាំ​២០២១​​ត្រូវ​គេ​ចាប់​បាន​ហើយ​ ហើយ​​យក​ទៅ​លែង​នៅ​ក្នុង​តំបន់​អភិរក្ស​សត្វ​ព្រៃ​។ ​​​ខ្លា​ដែល​ខាំ​​​សម្លាប់​​មនុស្ស​ម្នាក់​កាល​ពី​ខែ​មករា​ ឆ្នាំ​២០២២​ត្រូវ​​គេ​បាញ់​សម្លាប់​ចោល​តែ​ម្ដង​ព្រោះ​ទុក​វា​មិន​បាន​ទេ​។ ពេល​នោះ ​វា​ប្រុង​ស្ទុះ​ទៅ​​ខាំ​​អ្នក​អភិ​រក្ស​សត្វ​​ព្រៃ​​។​​ អាជ្ញាធរ​ប្រាប់​ឱ្យ​អ្នក​ស្រុក​ប្រុង​ប្រយ័ត្ន​ខ្លួន​​។ បើ​ត្រូវ​ធ្វើ​​ដំណើរ​ចេញ​ទៅ​ក្រៅ​ផ្ទះគួរ​មាន​គ្នា​អម​ដំណើរ​ទៅ​ជា​មួយ​ផង​៕​

ប្រភព៖ Channel News Asia
https://www.channelnewsasia.com/asia/malaysia-trapping-tigers-after-three-people-killed-3972496

អត្ថបទសរសេរ ដោយ

កែសម្រួលដោយ