ខេត្តសៀមរាប ៖ ថ្មីៗនេះ ផ្ទុះការចាប់អារម្មណ៍ទៅលើក្មេងស្រីមួយរូប ដែលនាងតូចរូបនេះ មានមាឌល្អិត ការនិយាយស្តីមានសម្លេងរដឺនគួរអោយចាប់អារម្មណ៍ ដោយកាលពីកន្លងទៅ បងប្អូនមហាជនអាចនឹងស្គាល់នាងតូចរូបស្រស់ម្នាក់នេះហើយ ដោយនាងពើបប្រទះនូវការខ្វះខាតជាច្រើន ហើយការដែលកើតមកមានរូបរាងតូចល្អិតនេះ ក៏ដោយសារតែជីវភាពផងដែរ។
ប្រាកដណាស់ នរណាក៏ដោយកើតមកតែងតែប៉ងប្រាថ្នាមានរូបរាងកាយល្អ មានក្លិនក្រអូប មានចរិតល្អ មានការគោរពស្រឡាញ់ពីមនុស្សជុំវិញខ្លួន ដូចជានាងតូច សំណាង ទៀតសោត ទោះបីជានាងមានរូបរាងតូចល្អិតក៏ពិតមែន តែចិត្តគំនិតរបស់នាងមិនចង្អៀតទៅតាមរាងកាយរបស់នាងនោះឡើយ ដោយនាងតូចរូបនេះ ឧស្សាហ៍ព្យាមយាមជាមួយការសិក្សា និងជួយឪពុកម្តាយគ្រប់សព្វបែបយ៉ាងដែលនាងអាចធ្វើទៅបាន ទៅតាមលទ្ធភាពនាងមាន។
គួរបញ្ជាក់ថា នាងតូច សំណាង រូបនេះ កើតមកមានរូបរាងតូច និងមើលទៅដូចជាកូនក្មេងអ៊ីចឹង តែតាមការពិតនាងមិនក្មេងនោះទេ ដោយឆ្នាំនេះនាងមានអាយុ១៧ឆ្នាំ និងរៀនថ្នាក់១០ ហើយថែមទាំងឧស្សាហ៍ព្យាយាមទៀតផង ហើយនាងចង់រៀនបានខ្ពងខ្ពស់ និងចាកឆ្ងាយពីគ្រោះអវិជ្ជាផងដែរ។
តាមរយៈបទសម្ភាសន៍ជាមួយសារព័ត៌មានកោះសន្តិភាព ប្អូនស្រី ទុំ សំណាង ដែលបងប្អូនធ្លាប់ស្គាល់ពីជីវិតរបស់នាងកន្លងមកនោះ នាពេលនេះនាងមានអាយុ១៧ឆ្នាំ និងរៀនថ្នាក់ទី១០ ហើយ នៃវិទ្យាល័យសម្តេចតេជោ ហ៊ុន សែន អង្គរធំ។ ពេលវេលាបានកន្លងផុតទៅជាច្រើនឆ្នាំ ពេលនេះនាងពេញរូបពេញរាង ហើយកាលពីមុនតូចល្អិត និងពេលបច្ចុប្បន្ននេះ នាងរាងទ្រើស ហើយធំធាត់ជាងមុនផងដែរ។
បើតាមការអោយដឹងពីជីវិតរបស់នាងតូច សំណាង ដែលមានស្រុកកំណើតនៅខេត្តសៀមរាបនោះ បានប្រាប់អោយដឹងថា «កាលពីកំណើតរបស់នាង ឪពុកម្តាយមានការខ្វះខាតច្រើន ដូច្នេះពុំបានទៅពិនិត្យសុខភាពអោយបានដិតដល់នោះឡើយ ទើបបានជានាងកើតមកខុសពីប្អូនៗដែលកើតមក ដោយគេគ្រប់គ្នាមានមាឌធម្មតា»។
ចំពោះរូបរាងនេះទៀតសោត នាងតូច ទុំ សំណាង បន្តថា «នាងពិតជាមានការអាក់អន់ចិត្តនឹងខ្លួនឯងខ្លះដែរ ប៉ុន្តែក្រោយៗមក នាងក៏ធម្មតាដូចគេឯង តែអ្វីដែលសំខាន់គឺការសិក្សា ដោយនាងចង់រៀនអោយបានខ្ពងខ្ពស់ដូចជាសិស្សដទៃទៀត និងចាក់ឆ្ងាយពីជីវិតក្រខ្សត់នេះ»។
សម្រាប់ការសិក្សាវិញ នាងតូច ទុំ សំណាង បានប្រាប់ឱ្យដឹងដែរថា «នាងរៀនសូត្ររាល់ថ្ងៃសមរម្យ ហើយអាចចេះចាំបានច្រើន តែជីវិតនាងនឹងគ្រួសារមានការខ្វះខាតច្រើន ដោយឪពុកនាងជាជាងសំណង់ ម្តាយជាអ្នកធ្វើស្រែចម្ការ និងមានបងប្អូនចំនួន៤នាក់ ចំណែកនាងវិញ គឺជាកូនបងគេ ហើយក៏មានរូបរាងកាយខុសពីប្អូនៗផងដែរ»។
គួរបញ្ជាក់ថា នាងតូច ទុំ សំណាង គឺជាក្មេងស្រីម្នាក់ដែលឧស្សាហ៍ មិនថាការរៀនសូត្រ និងជួយធ្វើការរបស់ឪពុកម្តាយនោះទេ។ ខណៈពេលដែលនាងនៅផ្ទះទំនេរពីការសិក្សា នាងតែងតែជួយដាំបាយ ដាំទឹក ស្លរស្លុក លាងចាន បោះសម្អាតផ្ទះ និងដាក់បាយឱ្យមាន់ទាជាដើម ពោលគឺទោះបីជានាងកើតមកមានមាឌល្អិត និងមិនធំធាត់ដូចគេគ្រប់គ្នាក៏ដោយ តែនាងពិតជាឧស្សាហ៍មិនថានៅផ្ទះ ឬនៅសាលាក្តី។
គួរបញ្ជាក់ទៀតថា នាងតូច ទុំ សំណាង គឺជាក្មេងស្រីមា្នក់ដែលរួសរាយ ហើយនាងមានការខ្វះខាតច្រើន ដោយនាងពុំសូវមានសម្ភារៈសិក្សា ខ្វះមធ្យោបាយធ្វើដំណើរ ប៉ុន្តែនាងមិនដែលចុះចាញ់ជាមួយនឹងជោគវាសនារបស់ខ្លួនឯងឡើយ ពោលគឺមានតែការខិតខំប្រឹងប្រែង។ ដូចដែលបងប្អូនពុកម៉ែបានឃើញស្រាប់ហើយ ទោះបីជានាងតូច នាងក្រីក្រ តែក៏មិនបោះការសិក្សាចោលនោះឡើយ ហើយថែមទាំងឧស្សាហ៍ថែមទៀតផង៕ ដោយ ៖ លីហួ គីមឆាយ
ចែករំលែកព័តមាននេះ