អ្នកលក់ដូរនៅផ្សារឯកឧត្តម សោម ចិន ត្អួញត្អែរថា លក់យូរទៅអស់ដីផ្សារ
- កំពត
បងប្អូនអ្នកលក់ដូរនៅផ្សារឯកឧត្តម សោម ចិន បាននាំគ្នាត្អួញត្អែរ ដោយនិយាយថា «លក់ដូរយូរៗទៅបាត់ដីផ្សារអស់» ។ ដោយសារតែកើតមានបញ្ហាបែបនេះ
ខេត្តកំពត ៖ បងប្អូនអ្នកលក់ដូរនៅផ្សារឯកឧត្តម សោម ចិន បាននាំគ្នាត្អួញត្អែរ ដោយនិយាយថា «លក់ដូរយូរៗទៅបាត់ដីផ្សារអស់» ។ ដោយសារតែកើតមានបញ្ហាបែបនេះ កាលពីព្រឹកថ្ងៃទី៤ ខែធ្នូ ឆ្នាំ២០២៣ កន្លងទៅ លោកមេភូមិ ក៏បានចុះទៅពិនិត្យទីតាំងផ្សារនេះផ្ទាល់តែម្ដង ដែលទីតាំងស្ថិតនៅកាច់ជ្រុងផ្លូវបំបែកភូមិបឹងធំ ស្ថិតក្នុងឃុំអង្គសុរភី ស្រុកកំពង់ត្រាច ។
ការទៅពិនិត្យខាងលើនេះ គឺបន្ទាប់ពីមានអ្នកលក់ដូរ បាននិយាយថា ពួកគាត់លក់ដូរយូរៗទៅបាត់ដីផ្សារបណ្ដើរៗហើយ ព្រោះអ្នកលក់ដូរខ្លះយកដីផ្សារទំហំ៥ម៉ែត្រទៅ៦ម៉ែត្រតែម្នាក់ឯង ។ រីឯអ្នកខ្លះទៀត សាងសង់ផ្ទះរស់នៅយ៉ាងរំភើយ ធ្វើឱ្យអ្នកលក់ដូរភាគច្រើនរត់ចេញពីផ្សារ ហើយទៅលក់នៅតាមចិញ្ចើមផ្លូវជាតិវិញ ។ សកម្មភាពបែបនេះ កើតមានឡើងដោយសារតែមិនមានការគ្រប់គ្រងច្បាស់លាស់លើផ្សារដែលមានឈ្មោះអតីតអភិបាលខេត្តកំពត ឯកឧត្តម សោម ចិន ក្នុងឆ្នាំ១៩៨០ ។
លុះនៅព្រឹកថ្ងៃទី៤ ខែធ្នូ ឆ្នាំ២០២៣ អ្នកលក់ដូរមានបំណងចង់ជួបអាជ្ញាធរស្រុកកំពង់ត្រាច តែមិនឃើញវត្តមានលោកអភិបាលស្រុកទេ គឺឃើញតែលោក អ៊ុង ស៊ង មេភូមិបឹងធំ និងមន្ត្រីថ្នាក់ឃុំមកដល់ផ្សារតែប៉ុណ្ណោះ ។
លោកមេភូមិ បាននិយាយប្រាប់ឱ្យដឹងថា «អាជ្ញាធរមានគម្រោងចាក់ដីឱ្យពលរដ្ឋងាយស្រួលលក់ដូរក្នុងផ្សារឡើងវិញ កុំឱ្យនាំគ្នាទៅលក់នៅខាងក្រៅ ដែលប្រឈមនឹងហានិភ័យអាចកើតឡើងជាយថាហេតុ» ។
ទោះបីជាយ៉ាងណា លោកមេភូមិ មិនបាននិយាយអំពីរឿងគេរំលោ.ភសាងសង់ផ្ទះនោះទេ ប៉ុន្តែការទាមទាររបស់អ្នកលក់ដូរ គឺបើអាជ្ញាធរមិនមកពិនិត្យដីផ្សារផ្ទាល់ទេ ថ្ងៃក្រោយពិតជាបាត់បង់អស់ហើយ ព្រោះថា បើនៅតែមិនមានអ្នកណាហ៊ាននិយាយពីរឿងនេះ គេយកដីផ្សារធ្វើផ្ទះនោះអស់ហើយ៕
ចែករំលែកព័តមាននេះ