រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់ថា រាជរដ្ឋាភិបាលកម្ពុជា មិនដែលទុកប្រជាពលរដ្ឋណាម្នាក់ចោលនៅក្នុងគ្រាលំបាកឡើយ…
រាជធានីភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់ថា រាជរដ្ឋាភិបាលកម្ពុជា មិនដែលទុកប្រជាពលរដ្ឋណាម្នាក់ចោលនៅក្នុងគ្រាលំបាកឡើយ ហើយរាជរដ្ឋាភិបាល មិនមែនធ្វើសកម្មភាពតែពេលល្អ ហើយពេលលំបាកទុកពលរដ្ឋចោលនោះទេ ។
នាឱកាសអញ្ជើញជាអធិបតី ក្នុងពិធីប្រកាសដាក់ឱ្យអនុវត្តជាផ្លូវការ “គោលការណ៍ណែនាំ ស្ដីពីក្របខ័ណ្ឌកម្មវិធីជាតិជំនួយសង្គមក្នុងកញ្ចប់គ្រួសារ និងគោលការណ៍ណែនាំស្ដីពីក្របខណ្ឌកិច្ចគាំពារសង្គមឆ្លើយតបនឹងគ្រោះអាសន្ន” ដែលរៀបចំឡើងនៅសណ្ឋាគាររ៉េស៊ីដង់ សុខាភ្នំពេញ នៅថ្ងៃទី៥ ខែធ្នូ ឆ្នាំ២០២៣ សម្ដេចធិបតី នាយករដ្ឋមន្ត្រី បានថ្លែងថា សមិទ្ធផល នៃគោលការណ៍ជំនួយគាំពារសង្គមនេះ គឺកើតមានឡើងដោយសារកម្ពុជាមូលដ្ឋានដ៏រឹងមាំ នៃសុខសន្តិភាព ស្ថិរភាពនយោបាយ សង្គម និងសេដ្ឋកិច្ច។ គោលនយោបាយជាតិ គាំពារសង្គម ដែលបានដាក់ឲ្យអនុវត្តន៍ គឺជាការចាំបាច់ ដើម្បីធានាប្រសិទ្ធភាពរយៈពេលវែង ។
បើតាមសម្ដេចធិបតី ការដាក់ចេញគោលនយោបាយកិច្ចគាំពារសង្គម ដើម្បីឆ្លើយតបនឹងគ្រោះអាសន្ន ដែលកើតឡើងជាយថាហេតុនាពេលខាងមុខ។ ជាមួយគ្នានេះ រាជរដ្ឋាភិបាល កំពុងបន្តរៀបចំសេចក្តីព្រាងគោលនយោបាយប្រព័ន្ធគាំពារសង្គម ដែលមានចក្ខុវិស័យឆ្នាំ២០៣០ ទៅមុខទៀត។ ក្នុងរយៈពេលត្រឹមជាង៣ខែ នយោបាយអាទិភាពទាំង៦ ដែលរាជរដ្ឋាភិបាលនី តិកាលទី៧ ដាក់ចេញ ត្រូវបានដាក់ឱ្យអនុវត្តន៍អស់ហើយ ។
ជាមួយគ្នានោះដែរ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ថា កម្មវិធីជាតិជំនួយសង្គមក្នុងកញ្ចប់គ្រួសារ រៀបចំឡើងដើម្បីកែទម្រង់ប្រព័ន្ធគាំពារសង្គម លើកកម្ពស់ប្រសិទ្ធភាព និងស័ក្តិសិទ្ធិភាពជួយដល់ប្រជាពលរដ្ឋក្រីក្រ និងងាយរងគ្រោះនៅក្នុងសង្គម ។
សម្ដេចធិបតី បានបញ្ជាក់ថា ការដោះស្រាយក្នុងរយៈពេលខ្លី មិនអាចជួយប្រជាពលរដ្ឋឱ្យមានភាពរឹងមាំងបានទេ ដូច្នេះហើយទើបរាជរដ្ឋាភិបាលដាក់ចេញកម្មវិធីជាតិជំនួយសង្គមក្នុងកញ្ចប់គ្រួសារ ដើម្បីជួយប្រជាពលរដ្ឋឱ្យបានត្រឹមត្រូវ និង ជាពិសេស ដើម្បីបង្ហាញទៅដល់អ្នកដែលនិយាយថា រាជរដ្ឋាភិបាលមិនបានធ្វើអ្វីសោះ ។
សម្តេចបានលើកឡើងថា រដ្ឋាភិបាលបានចំណាយថវិកាជាង១ពាន់លានដុល្លារ កាលពីឆ្នាំ២០២១ និងប្រមាណ៦០០លានដុល្លារក្នុងឆ្នាំ២០២២ ដើម្បីដោះស្រាយផលប៉ះពាល់ នៃវិបត្តិសង្គម-សេដ្ឋកិច្ច ព្រមទាំងធានាលំនឹងជីវភាពប្រជាពលរដ្ឋ នៅអំឡុងពេលដែលពិភពលោកប្រឈមជួបនឹងវិបត្តិកូវីដ និងវិបត្តិនានា៕
ចែករំលែកព័តមាននេះ