រាជធានីភ្នំពេញ ៖ បុរសចិនដីគោកម្នាក់មានសំណាងមិនប្រឈមមុខនឹងផ្លូវច្បាប់ ដោយសារនគរបាលផ្នែកចរាចរណ៍ខណ្ឌដូនពេញ សហការជាមួយនគរបាលប៉ុស្តិ៍រដ្ឋបាលបឹងរាំងជួយដោះស្រាយបញ្ចប់រឿងដោយគ្រាន់តែចំណាយប្រាក់អស់៥០០ដុល្លារ។ ហេតុការណ៍នេះកើតឡើងក្រោយពីជននោះស្រវឹងធ្លាក់ភ្នែក ហើយបើករថយន្ត
រាជធានីភ្នំពេញ ៖ បុរសចិនដីគោកម្នាក់មានសំណាងមិនប្រឈមមុខនឹងផ្លូវច្បាប់ ដោយសារនគរបាលផ្នែកចរាចរណ៍ខណ្ឌដូនពេញ សហការជាមួយនគរបាលប៉ុស្តិ៍រដ្ឋបាលបឹងរាំងជួយដោះស្រាយបញ្ចប់រឿងដោយគ្រាន់តែចំណាយប្រាក់អស់៥០០ដុល្លារ។ ហេតុការណ៍នេះកើតឡើងក្រោយពីជននោះស្រវឹងធ្លាក់ភ្នែក ហើយបើករថយន្តម៉ាកកាមរីឆ្លាមពណ៌ខ្មៅ ពាក់ស្លាកលេខភ្នំពេញ 2I-9273 បុកម៉ូតូសេ១០០ មួយគ្រឿងនិងមនុស្សម្នាក់ បណ្តាលឲ្យរបួសកាលពីវេលាម៉ោង៤និង៣០នាទីទៀបភ្លឺ ថ្ងៃទី២៣ ឧសភា ឆ្នាំ២០១១ នៅមុខផ្សារប៊ីកអេ មហាវិថីព្រះមុនីវង្ស ស្ថិតក្នុងសង្កាត់បឹងរាំង ខណ្ឌដូនពេញ ដោយមិនរំខានលោកអធិការនោះទេ។
សាក្សីដែលឃើញហេតុការណ៍បាននិយាយក្នុងន័យរិះគន់នគរបាលប៉ុស្តិ៍និងនគរបាលផ្នែកចរាចរណ៍ខណ្ឌដូនពេញថា មុនពេលកើតហេតុមានរថយន្តមួយគ្រឿងម៉ាកកាមរីឆ្លាមពណ៌ខ្មៅ បើកក្នុងល្បឿនលឿនប្រណាំងគ្នាជាមួយរថយន្តកាមរីបាឡែនពណ៌ទឹកប្រាក់ តាមបណ្តោយមហាវិថីព្រះមុនីវង្សឆ្នោះទៅទិសខាងជើង។ លុះមកដល់មុខផ្សារប៊ីកអេ រថយន្តនោះបានចាក់គួរបត់តាមផ្លូវលេខ៨០ ស្រាប់តែជ្រុលចង្កូតទៅបុកម៉ូតូ និងបុរសម្នាក់ដែលឈរលើចិញ្ចើមផ្លូវទាំងកំរោល បណ្តាលឲ្យបុរសនោះដួលបែកក្បាល និងខូចម៉ូតូ ហើយបន្តទៅបុកបង្គោលដែក បណ្តាលឲ្យបែកកង់រថយន្តខាងមុខផ្នែកខាងឆ្វេង ទើបទៅមុខលែងរួច។ ពេលបុកមនុស្ស និងម៉ូតូហើយអ្នកបើករថយន្តដែលគេដឹងថាជាជនជាតិចិនដីគោកនោះ មិនព្រមបើកទ្វាររថយន្តចេញមកនិយាយជាមួយនគរបាលប៉ុស្តិ៍ទេ គេបែរជាទូរស័ព្ទតែមិនដឹងទូរស័ព្ទទៅកាន់នរណាទេ ។ បន្តិចក្រោយមកឃើញមានស្រ្តីម្នាក់ចេះខ្មែរបានមកចរចាជាមួយជនរងគ្រោះជាម្ចាស់ម៉ូតូ ដោយមាននគរបាលចរាចរខណ្ឌដូនពេញ និងនគរបាលប៉ុស្តិ៍ជួយសម្របសម្រួលដោយមិនសួរនាំពីអត្តសញ្ញាណនិងប័ណ្ណបើកបរពីបុរសចិនដីគោកនោះទេ ទោះបីដឹងថា ជននោះស្រវឹងធ្លាក់ភ្នែករហូតមិនហ៊ានចេញពីក្នុងរថយន្តក៏ដោយ។
ប្រជាពលរដ្ឋដែលចោមរោមមើលបាននិយាយថា ជនរងគ្រោះត្រូវអ្នកបើកបរបង្កហេតុចេញសំណងចំនួន៥០០ដុល្លារដើម្បីបញ្ចប់រឿងនៅនឹងកន្លែង មិនរំខានដល់លោកអធិការនគរបាលខណ្ឌដូនពេញនោះទេ បើទោះបីជាជននោះល្មើសក្នុងការបើកបរហូបគ្រឿងស្រវឹងក៏ដោយ។ គេមិនដឹងថា ទាំងនគរបាលប៉ុស្តិ៍រដ្ឋបាលបឹងរាំង និងនគរបាលចរាចរខណ្ឌដូនពេញបានកំរៃជើងសាពីជនរងគ្រោះជាម្ចាស់ម៉ូតូប៉ុន្មាននោះទេ ។
គួររំលឹកថា កាលពីថ្ងៃទី១ មីនា ឆ្នាំ២០១១ ទីស្តីការគណៈរដ្ឋមន្រ្តីបានចេញលិខិតលេខ២៣៧ សជណ ជម្រាបអភិបាលរាជធានីភ្នំពេញថា រាជរដ្ឋាភិបាលបានសម្រេចជាគោលការណ៍ឲ្យសាលារាជធានីភ្នំពេញបញ្ជូនរថយន្តដែលយកទ្រូងផ្លូវជាកន្លែងប្រណាំង និងរថយន្តបង្កការខូចខាតទ្រព្យសម្បត្តិសាធារណៈ និងអាយុជីវិតមនុស្ស ទៅស្ថាប័នតុលាការដើម្បីធានាការគោរពច្បាប់ចរាចរណ៍ ។ ដោយឡែកករណីគ្រោះថ្នាក់ចរាចរណ៍នៅចំណុចខាងលើត្រូវបាននគរបាលប៉ុស្តិ៍រដ្ឋបាលបឹងរាំង និងនគរបាលចរាចរខណ្ឌដូនពេញធ្វើការដោះលែងដោយគ្រាន់តែសម្អាងថា ភាគីជនរងគ្រោះបានទទួលសំណងរួចហើយប៉ុណ្ណោះ៕
ចែករំលែកព័តមាននេះ