ប្រធានាធិបតីអាមេរិក លោកបារ៉ាក់ អូបាម៉ា កាលពីថ្ងៃទី២២ ឧសភា ក្នុងសុន្ទរកថានៅមុខ AIPAC ជាកន្លែងធ្វើឡូប៊ីស្និទ្ធអ៊ីស្រាអែលសំខាន់របស់សហរដ្ឋអាមេរិកបានអះអាងជាថ្មីពីការគាំទ្ររបស់លោកចំពោះការបង្កើតរដ្ឋប៉ាឡេស្ទីនមួយផ្អែកលើព្រំដែនមុនសង្គ្រាមឆ្នាំ១៩៦៧។ កាលពីថ្ងៃទី១៩ ឧសភា កន្លងមកនេះ ប្រធានាធិបតីអាមេរិកធ្លាប់បានថ្លែងរួចហើយនៅ ក្នុងក្រសួងការបរទេស ដោយលើកឡើងពីរដ្ឋប៉ាឡេស្ទីនមួយជាមួយព្រំដែនមុនឆ្នាំ១៩៦៧។ សំណើនេះបានញ៉ាំងឱ្យមានភាពតានតឹងនៃទំនាក់ទំនងរវាងសម្ព័ន្ធមិត្តទាំង២ ដោយនាយករដ្ឋមន្ត្រីអ៊ីស្រាអែលលោកបេន ចាមីនណេតាន់យ៉ាហ៊ូ បានបដិសេធរាល់ការពិភាក្សាអំពីបញ្ហានេះដែលតម្រូវឱ្យលោកអូបាម៉ា ទទួលស្គាល់ពីទំនាស់មួយរវាងអ៊ីស្រាអែល និងសហរដ្ឋអាមេរិក។
នៅមុខ AIPAC លោកអូបាម៉ាថ្លែងថា ទោះបីជាយើងជួនកាលមានការខ្វែងគំនិតគ្នាដូចជាបណ្តាមិត្តយើងក៏ទំនាក់ទំនងរវាងសហរដ្ឋអាមេរិក និងអ៊ីស្រាអែលមិនអាចបំផ្លាញបានឡើយ ហើយកិច្ចសន្យារបស់សហរដ្ឋអាមេរិកចំពោះសន្តិសុខអ៊ីស្រាអែលមិនអាចរង្គោះរង្គើឡើយ។
ចំពោះសុន្ទរកថានេះរបស់លោកអូបាម៉ា ហាក់ដូចជាទទួលការវាយតម្លៃពីនាយករដ្ឋមន្ត្រីអ៊ីស្រាអែល។ ក្នុងអត្ថាធិប្បាយដែលប្រហែលជាចង់សម្រាលការយល់គ្នាមិនច្បាស់ជាមួយលោកអូបាម៉ាលើសំណុំរឿងអ៊ីស្រាអែល-ប៉ាឡេស្ទីន លោកណេតាន់យ៉ាហ៊ូមានប្រសាសន៍ថា ខ្ញុំយល់ស្របជាមួយបំណងរបស់លោកប្រធានាធីបតីអូបាម៉ា ដែលលើកទឹកចិត្តដល់សន្តិភាព ហើយខ្ញុំវាយតម្លៃខ្ពស់ដល់ការខិតខំប្រឹងប្រែងទាំងឡាយកន្លងមក និងនាពេលបច្ចុប្បន្នដើម្បីឱ្យសំរេចបានទិសដៅនេះ។ ជំហររបស់លោកអូបាម៉ាមានន័យថា ភាគីអីុស្រាអែល និងប៉ាឡេស្ទីនខ្លួនឯងនឹងត្រូវធ្វើការចរចាគ្នាពីរឿងនេះ ៕
ចែករំលែកព័តមាននេះ