ខេត្តពោធិ៍សាត់ ៖ អ្នកជួញដូរគ្រឿងញៀន២នាក់ឪពុក និងកូនស្រី និងអ្នកជក់ម្នាក់ទៀតបានត្រូវសមត្ថកិច្ចឃាត់ខ្លួនរួមនឹងវត្ថុតាងជាក់ស្តែងកាលពីរសៀលថ្ងៃទី២១ ឧសភា ។
លោកវរសេនីយ៍ត្រី ស៊ី សាវិន នាយការិយា ល័យនគរបាលប្រឆាំងគ្រឿងញៀ.នឱ្យដឹងថា នៅ វេលាម៉ោង១និង៣០នាទីរសៀលថ្ងៃទី២១ ឧសភា បណ្តាញឃ្លាំមើលរបស់យើងបានផ្តល់ព័ត៌មានមកថា
ខេត្តពោធិ៍សាត់ ៖ អ្នកជួញដូរគ្រឿងញៀន២នាក់ឪពុក និងកូនស្រី និងអ្នកជក់ម្នាក់ទៀតបានត្រូវសមត្ថកិច្ចឃាត់ខ្លួនរួមនឹងវត្ថុតាងជាក់ស្តែងកាលពីរសៀលថ្ងៃទី២១ ឧសភា ។
លោកវរសេនីយ៍ត្រី ស៊ី សាវិន នាយការិយា ល័យនគរបាលប្រឆាំងគ្រឿងញៀនឱ្យដឹងថា នៅ វេលាម៉ោង១និង៣០នាទីរសៀលថ្ងៃទី២១ ឧសភា បណ្តាញឃ្លាំមើលរបស់យើងបានផ្តល់ព័ត៌មានមកថា មានមនុស្សមួយក្រុមកំពុងសំងំជក់ថ្នាំញៀនក្នុងផ្ទះមួយស្ថិតក្នុងភូមិពាលញែក១ សង្កាត់ផ្ទះព្រៃ ក្រុងពោធិ៍សាត់ ។ ភ្លាមៗនោះលោកបានរាយការណ៍ជូនទៅលោកស្នងការ និងលោកព្រះរាជអាជ្ញា ហើយសហការជាមួយនគរបាលព្រហ្មទណ្ឌកម្រិតស្រាល បច្ចេកទេស អធិការនគរបាលក្រុង និងនគរបាលប៉ុស្តិ៍ ដឹកនាំដោយលោកប៉ង់ ច័ន្ទសុយុទ្ធារ៉ា ព្រះរាជអាជ្ញារង ចុះទៅធ្វើការបង្ក្រាបជាបន្ទាន់ ។
លោកវរសេនីយ៍ត្រី ស៊ី សាវិន បានបន្តថា ពេលទៅដល់អ្នកជក់៣នាក់បានហក់តាមរបងរត់គេចខ្លួន ហើយកម្លាំងយើងឃាត់ខ្លួនបានម្នាក់ឈ្មោះញឹប ហូវ ភេទប្រុស អាយុ៣០ឆ្នាំ ទីលំនៅឃុំអូរសោម ស្រុកវាលវែង ។ បន្ទាប់មកយើងឱ្យឈ្មោះញឹប ហូវ អ្នកញៀនថ្នាំរូបនេះទូរស័ព្ទទៅអ្នកលក់ ដើម្បីទិញយកមកជក់ទៀត ហើយឈ្មោះញឹប ហូវ បានទូរស័ព្ទទៅម៉ូយឈ្មោះវង្ស ស៊ីណាត ភេទស្រី អាយុ១៨ឆ្នាំ នៅកោះតៃវ៉ាន់ ភូមិបាក់រទេះ សង្កាត់ព្រៃញី ក្រុងពោធិ៍សាត់ ។ ពេលវង្ស ស៊ីណាត ផ្តល់ភ្លើងខៀវថា មានថ្នាំញៀនឱ្យញឹប ហូវ ទៅយកនោះ យើងក៏ឱ្យកងកម្លាំងម្នាក់ស្លៀកពាក់ស៊ីវិលឌុបឈ្មោះ ញឹប ហូវ ទៅទិញ ឯកម្លាំងចម្រុះទាំងអស់ក៏ទៅតាមក្រោយត្រៀមចាំស្រេចដែរ។ ពេលទៅដល់ វង្ស ស៊ីណាត ជាកូនម្ចាស់ផ្ទះបានប្រើល្បិចដាក់ថ្នាំញៀនក្នុងសំបកស្ករគ្រាប់ និងសំបកស្ករកៅស៊ូយកមកហុចឱ្យញឹប ហូវ ។ ភ្លាមៗនោះ កងកម្លាំងស្លៀកពាក់ស៊ីវិលបានឆែកមើលឃើញច្បាស់នឹងភ្នែកហើយ ក៏ឱ្យសញ្ញាទៅកម្លាំងចម្រុះទៅសង្គ្រប់តែម្តង ។
ពេលឃើញកងកម្លាំងព្រោងព្រាតព័ទ្ធផ្ទះឆែកឆរ វង្ស ស៊ីណាត បានធ្វើជាសន្លប់បាត់ស្មារតី ឯឪពុកឈ្មោះលី ដារ៉ា ហៅអូន អាយុ៤០ឆ្នាំ បម្រុងផ្លោះរបងចេញក្រៅ តែកម្លាំងយើងក្របួចជាប់វាយខ្នោះហើយឱ្យជូនដើរឆែកឆេរក្នុងផ្ទះ ចំណែកភរិយាឈ្មោះភួង ម៉ាឡៃ អាយុ៣៨ឆ្នាំ រត់គេចខ្លួនរួច ។ ក្នុងការឆែកឆេរក្នុងផ្ទះ សមត្ថកិច្ចយើងរកឃើញថ្នាំញៀនប្រភេទម៉ាទឹកកកពណ៌សចំនួន២៨កញ្ចប់លាក់ក្រោមកន្ទេល និងថតទូ ។ មិនតែប៉ុណ្ណោះ រកឃើញលុយបានពីការលក់ថ្នាំញៀននេះចំនួន៣.៣០២.០០០រៀល ៤៤ដុល្លារ និង២០បាតទៀត ។ ជនជួញដូរថ្នាំញៀនជាឪពុក និងកូនស្រី រួមនឹងវត្ថុតាង ព្រមទាំងអ្នកជក់ថ្នាំញៀនបានត្រូវកសាងសំណុំរឿងបញ្ជូនទៅសាលាដំបូងនាព្រឹកថ្ងៃទី២២ ឧសភា ឆ្នាំ២០១១ ដើម្បីផ្តន្ទាទោសទៅតាមច្បាប់ ។
មន្ត្រីរាជការ និងប្រជាពលរដ្ឋ អបអរសាទរចំពោះការចាប់ខ្លួនជនជួញដូរថ្នាំញៀនឪពុក និងកូនស្រីនេះ ហើយសូមឱ្យសមត្ថកិច្ចបន្តស្រាវជ្រាវទៀត ដើម្បីកម្ចាត់ឱ្យអស់ ។ គេបានវាយតម្លៃថា សព្វថ្ងៃនេះ នៅខេត្តពោធិ៍សាត់បទល្មើសព្រៃឈើទី១ គ្រឿងញៀនទី២ ឯករណីឃាតកម្មចោរកម្មថយចុះវិញ៕
ចែករំលែកព័តមាននេះ