រាជធានីភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែង​បន្លំ «ក.ប.ប.» បន្តចុះយុទ្ធនាការត្រួតពិនិត្យសុវត្ថិភាពម្ហូបអាហារ ជូនប្រជាពលរដ្ឋ ក្នុងថ្ងៃទី២ នៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ថ្ងៃទី២៦-២៧-២៨ ខែវិច្ឆិកា ឆ្នាំ២០២៣ ដែលមានទីតាំងនៅមុខបរិវេណសួនច្បារផ្សារចាស់ ផ្សាររាត្រី និងសួនច្បារត្រើយ​ខាងកើត​ជ្រោយចង្វារ លើស្តង់លក់ និងកន្លែងលក់រាយ។

ការត្រួតពិនិត្យនេះ ធ្វើឡើងដោយមាននាយកដ្ឋានមន្ទីរពិសោធន៍ និងសាខា ក.ប.ប. រាជធានីភ្នំពេញ ដឹកនាំដោយលោក ប៊ុន ចំរើន អគ្គនាយករង ក.ប.ប.​ បាននាំយករថយន្តពិសោធន៍​ចល័តរបស់អគ្គនាយកដ្ឋាន ក.ប.ប. ចុៈត្រួតពិនិត្យ និងពិសោធន៍លើរថយន្តចល័តតែម្តង ក្នុងគោលបំណងដើម្បីទប់ស្កាត់ បង្ការ ការលក់ចែកចាយម្ហូបអាហារណា មានផ្ទុកសារធាតុគីមី​ហាមឃាត់ ម្ហូបហួសកាលបរិច្ឆេទប្រើប្រាស់ និងម្ហូបអាហារមិនមានអនុលោមភាព។

ជាលទ្ធផលនៃការត្រួតពិនិត្យ ក្នុងចំណោមគំរូផលិតផលម្ហូបអាហារ ដែលបានវិភាគចំនួន ១៥គំរូ គឺមានអនុលោមទាំងអស់ រួមទាំងការត្រួតពិនិត្យកាលបរិច្ឆេទប្រើប្រាស់ផងដែរ។

ឆ្លៀតក្នុងឱកាសនោះដែរ មន្ត្រីជំនាញ នៃអគ្គនាយកដ្ឋាន ក.ប.ប. ក៏បានពន្យល់ណែនាំអ្នកប្រកប​អាជីវកម្ម លក់រាយ និងតាមស្តង់ ដែលតាំងលក់ម្ហូបអាហារ និងសម្ភារៈប្រើប្រាស់ នៅក្នុងថ្ងៃ​ពិធីនេះ ឱ្យបានយល់ ក្នុងគោលបំណងអប់រំ និងបញ្រ្ជៀបការយល់ដឹង ដើម្បីធានាបាននូវការ​ការពារ​សុខុមាលភាព និងផលប្រយោជន៍អ្នកប្រើប្រាស់៕