បណ្តាំទៅអ្នកក្រ ៖ លុយមិនមែនបានមកពីសំណាង ឬលេងឆ្នោតទេ
- ភ្នំពេញ
ហេតុអ្វីមានអ្នកខ្លះមានលុយយ៉ាងច្រើនលានដុល្លារ ខណៈដែលអ្នកខ្លះស្ទើរតែមិនមាន១០០ដុល្លារសល់ក្នុងកុងធនាគារ?
ហេតុអ្វីមានអ្នកខ្លះមានលុយយ៉ាងច្រើនលានដុល្លារ ខណៈដែលអ្នកខ្លះស្ទើរតែមិនមាន១០០ដុល្លារសល់ក្នុងកុងធនាគារ?
ដូច្នេះ អ្នកខ្លះក៏គិតថាគេមាន គឺដោយសារសំណាងរបស់ពួកគេដែលបានមកពីការធ្វើបុណ្យពីជាតិមុនជាដើម។ ប៉ុន្តែការពិតគ្មានអ្នកមានណាដែលខ្ជិលនោះទេ។ ដូច្នេះ គេមានបាន គឺដោយសារតែកិច្ចប្រឹងប្រែង និងចំណេះវិទ្យារបស់ពួកគេ ការសន្សំ និងទស្សនៈរបស់ពួកគេអំពីលុយ។
លុយនរណាក៏ត្រូវការ ប៉ុន្តែទស្សនៈ និងការគិតអំពីលុយ គឺខុសៗគ្នា។ មកដល់ពេលនេះ ក្រុម អ្នកមាន ឬក្រុមសេដ្ឋីមើលបញ្ហាលុយផ្អែកលើហេតុផល។ ចំណែកក្រុមមនុស្សសាមញ្ញមើលលុយតាមអារម្មណ៍ ហើយក្រុមអ្នកក្រីក្រខ្លះអស់សង្ឃឹម ហើយបែរទៅជាគិតថា ខ្លួនក្រ ដោយសារតែគ្មានសំណាង។ នេះជាការគិតខុសអំពីលុយ ក្នុងចំណោមប្រជាជនក្រីក្រមួយចំនួន។
ប៉ុន្តែ ក្រុមអ្នកមាន មានភ្នែកមុត ហើយអាចកែច្នៃគ្រប់ស្ថានការណ៍ និងរូបភាពនានាបង្កើតជាលុយបាន ខណៈដែលក្រុមមនុស្សសាមញ្ញដែលមានកម្រិតជីវភាពមធ្យម គឺប្រឹងប្រែងគ្រប់មធ្យោបាយទាំងភាពឆ្លាតវៃ ការអប់រំល្អ ដើម្បីរត់តាមលុយ ស្របពេលដែលអ្នកក្រីក្រភាគច្រើន គឺមានឱកាសបានត្រឹមតែលេបទឹកមាត់ ហើយស្រមៃថា តើនៅពេលណាខ្លួននឹងក្លាយជាម្ចាស់លុយដូចគេ? ។ មិនតែប៉ុណ្ណោះ មានអ្នកក្រជាច្រើនបាននាំគ្នាលេងឆ្នោត ឬទិញផលិតផល ដែលមានការផ្តល់រង្វាន់ ដោយសង្ឃឹមថា ពួកគេនឹងអាចមានលាភធំ ហើយទទួលបានរង្វាន់ធំ ឬត្រូវឆ្នោតធំបានលុយច្រើនដោយមិនប្រឹងធ្វើការ។ នេះជាការគិតខុស ហើយរុញច្រានអ្នកក្រអោយកាន់តែក្រ។
មហាសេដ្ឋីកម្ពុជាម្នាក់ និយាយថា គ្រប់បញ្ហា គឺគេអាចច្នៃជាឱកាស ដើម្បីរកលុយបាន ដោយបង្កើតដំណោះស្រាយចំពោះបញ្ហានោះ។ ឧទាហរណ៍ មនុស្សមានបញ្ហាសុខភាព ដូច្នេះគេអាចបង្កើតថ្នាំ ដើម្បីដោះស្រាយបញ្ហាសុខភាពនោះ។ ម្យ៉ាងទៀត ការមានបានមិនមែនពឹងផ្អែកលើសំណាងទេ។ វាបានមកពីការខិតខំប្រឹងប្រែង។
នេះគឺជាការគិតអំពីលុយ ប៉ុន្តែទោះបីជាយ៉ាងណាក៏ដោយ គេដឹងថា លុយគឺជាឧបករណ៍សំខាន់ដែលបង្ហាញពីជម្រើស និងឱកាសរបស់មនុស្សគ្រប់ៗរូបនៅក្នុងសង្គម ។ គ្រប់ៗគ្នាគិតថា លុយគឺជាឧបករណ៍ ដែលអាចនឹងផ្តល់នូវសេរីភាព ឱកាស លទ្ធភាព និងភាពសំបូរបែប។ ដូច្នេះហើយ នៅលើពិភពលោកនេះ មនុស្សសឹងតែគ្រប់ៗរូបមិនខ្លាចក្នុងការប្រើប្រាស់គ្រប់វិធីសាស្ត្រ ដើម្បីចាប់យកលុយមកទុកអោយបាន ។
ក្រៅពីក្រុមមនុស្សដែលចាត់ទុកលុយជាវត្ថុទិព្វដែលអាចជប់សុភមង្គល ភាពមានបាន ភាពហ៊ឺហារ សំបូរបែប ក៏មានក្រុមមនុស្សខ្លះបានចាត់ទុកលុយជាសត្រូវទៅវិញ ពីព្រោះតែពួកគេគិតថា ដោយសារតែគ្រប់គ្នាអោយតម្លៃលើលុយនេះពេក ដូច្នេះហើយបានជាមនុស្សសុខចិត្តលះបង់អ្វីៗគ្រប់យ៉ាង ដើម្បីតែលុយ ។
ដើម្បីកុំអោយលុយវាសំខាន់ខ្លាំងពេក ក្រុមមនុស្សមួយចំនួនបានព្យាយាមបង្វែរការគិត និង អោយតម្លៃទៅលើគុណធម៌ និងសេចក្តីស្រលាញ់ជំនួសវិញ។
ក្រុមអ្នកដែលមានទស្សនៈសំយោគបានគិតថា លុយ គឺជាវត្ថុដែលបង្កបញ្ហានៅក្នុងសង្គមទៅវិញទេ ដោយសារតែវាពិបាករក ហើយនៅពេលដែលរកបាន ក៏វាពិបាកទុក ។ ក្រៅពីនោះ ក៏មានប្រភេទលុយខ្លះជួបបញ្ហាពិបាកចាយផងដែរ ជាពិសេសលុយដែលបានមកពីអំពើដែលផ្ទុយនឹងច្បាប់ ។
ដើម្បីកុំអោយយើងទាំងអស់គ្នាក្លាយជាកញ្ជះលុយ សូមប្តូរទស្សនៈ និងការគិតថា លុយជាម្ចាស់ ហើយគ្រប់មនុស្សដែលជាសមាជិកនៃសង្គម សូមព្យាយាមពិចារណា និងមើលលុយប្រកបដោយហេតុ និងផល ក៏ដូចជាវិចារណញាណ ។ លុយត្រូវតែបម្រើមនុស្ស ប៉ុន្តែមនុស្សដាច់ខាតមិនត្រូវក្លាយជាទាសកររបស់លុយទេ។
ទន្ទឹមជាមួយគ្នានោះ ក្រុមមនុស្សអ្នកមានក៏គួរតែធ្វើសកម្មភាពមនុស្សធម៌អោយបានច្រើន ដើម្បីជួយដល់អ្នកក្រ។ សកម្មភាពមនុស្សធម៌នឹងមិនត្រឹមតែធ្វើអោយសង្គមមានភាពសុខដុមរមនាទេ វាថែមទាំងជួយអោយអ្នកមានកាន់តែរកស៊ីមានបានផងដែរ នៅពេលអ្នកមានមានការគាំទ្រពីអ្នកក្រ៕
ចែករំលែកព័តមាននេះ