ព្រះវិហារដ៏ប្រណីតស្រស់ស្អាតនៅវត្តភូមិស្ទឹង សម្រេចបាន៩៥%ហើយ
- ពោធិ៍សាត់
ព្រះវិហារដ៏ប្រណីតនៅវត្តភូមិស្ទឹង ស្រុកកណ្ដៀង ជាអំណោយដ៏ថ្លៃថ្លារបស់ឯកឧត្តម ស៊ុយ សែម និងលោកជំទាវ ជា ខេង សម្រេចបាន៩៥%ហើយ នឹងត្រៀម
ខេត្តពោធិ៍សាត់ ៖ ព្រះវិហារដ៏ប្រណីតនៅវត្តភូមិស្ទឹង ស្រុកកណ្ដៀង ជាអំណោយដ៏ថ្លៃថ្លារបស់ឯកឧត្តម ស៊ុយ សែម និងលោកជំទាវ ជា ខេង សម្រេចបាន៩៥%ហើយ នឹងត្រៀមកាត់ឬសសីមា សម្ពោធដាក់ឲ្យប្រើប្រាស់ជាផ្លូវការ នៅចុងខែធ្នូ ឆ្នាំ២០២៣ខាងមុខនេះ។
សមិទ្ធផលថ្មីនៅវត្តពុទ្ធារាម ហៅវត្តភូមិស្ទឹង ខាងលើនេះ ស្ថិតក្នុងឃុំកណ្ដៀង ស្រុកកណ្ដៀង ខេត្តពោធិ៍សាត់ រួមមានព្រះវិហារដ៏ធំស្កឹមស្កៃ របង ខ្លោងទ្វារ ដងទង់ និងផ្លូវការ៉ូឡា ដែលកសាងឡើងដោយឯកឧត្តម ស៊ុយ សែម អ្នកតំណាងរាស្ត្រមណ្ឌលពោធិ៍សាត់ និងលោកជំទាវ ជា ខេង ដែលបានដំណើរការសាងសង់អស់រយៈពេល០៩ខែមកហើយ។ លុះមកដល់ពេលនេះ គឺសម្រេចបានប្រមាណ៩៥%ហើយ នឹងត្រៀមធ្វើពិធីកាត់ឬសសីមា សម្ពោធដាក់ឲ្យប្រើប្រាស់ជាផ្លូវការ នៅថ្ងៃទី២៧ ថ្ងៃ២៨ និងថ្ងៃ២៩ ខែធ្នូ ឆ្នាំ២០២៣ខាងមុខនេះ។
សូមបញ្ជាក់ថា ដោយមានសំណូមពរដ៏ទទួចពីព្រះសង្ឃ និងពុទ្ធបរិស័ទចំណុះជើងវត្តភូមិស្ទឹង ទើបឯកឧត្តម ស៊ុយ សែម និងលោកជំទាវទទួលយក ដោយរុះរើព្រះវិហារចាស់ទ្រុឌទ្រោមចោល រួចសាងសង់ថ្មីទាំងស្រុងឡើងវិញ។ ប៉ុន្តែរក្សាទំហំ និងក្បាច់រចនាតាមលំនាំព្រះវិហារចាស់ដដែល គឺមិនឲ្យខុសពីទ្រង់ទ្រាយដើមណាមួយនោះឡើយ។
ព្រះវិហារ រូបគំនូរ ដងទង់ចំនួន០២ ខ្លោងទ្វារចំនួន០២ របង និងផ្លូវក្រាលការ៉ូឡា នៅក្នុងបរិវេណវត្ត ជាជំហរកសាងដោយឯកឧត្តម ស៊ុយ សែម និងលោកជំទាវ ជា ខេង ដោយមានការចូលរួមពីសប្បុរសជនមួយចំនួនទៀត សម្រេចបានប្រមាណ៩៥%ហើយ នៅសល់តែលាបថ្នាំ ដាក់ត្រចៀកទ្វារ បង្អួច និងដាក់ឈ្មោះសប្បុរសជនតាមរបងតែប៉ុណ្ណោះ។
សមិទ្ធផលថ្មីទាំងអស់នេះ បានកសាងឡើងដោយផ្ចិតផ្ចង់បំផុត ប្រកបដោយរចនាបថខ្មែរយ៉ាងរស់រវើក ធានាទាំងគុណភាព និងសោភ័ណភាព ក្រោមការមើលខុសត្រូវរបស់លោកជំទាវ ជា ខេង ស៊ុយ សែម ផ្ទាល់តែម្ដង ដែលចំណាយថវិកាសរុបប្រមាណជាងកន្លះលានដុល្លាសហរដ្ឋអាមេរិកឯណោះ។ ចំណែកសាលាឆាន់ និងកុដិ ក្នុងវត្តភូមិស្ទឹងនេះ ដែលឯកឧត្តម និងលោកជំទាវ កសាងពីមុនមក ក៏បានលាបថ្នាំឡើងវិញ ស្របពេលជាមួយគ្នានេះផងដែរ។
គួររំលឹកថា មកដល់ពេលនេះ ឯកឧត្តម ស៊ុយ សែម និងលោកជំទាវ ជា ខេង បានកសាងសមិទ្ធផលច្រើនណាស់ទុកជាចំណងដៃសម្រាប់ប្រជាពលរដ្ឋខេត្តពោធិ៍សាត់ ទាំងពុទ្ធចក្រ និងអាណាចក្រ មានដូចជា កោះសំពៅមាស អគារសិក្សា មន្ទីរពេទ្យ ព្រះវិហារ សាលាឆាន់ កុដិ ផ្លូវក្រួសក្រហម ផ្លូវដី.ស ស្ពាន លូ ប្រឡាយទឹក អណ្ដូងទឹក ស្រះទឹក ជួយសង់ផ្ទះជូនចាស់ជរាគ្មានទីពឹង ធ្វើបុណ្យឲ្យមនុស្សចាស់។
ហើយសព្វថ្ងៃ ក្រៅពីព្រះវិហារនៅវត្តភូមិស្ទឹងនេះ ឯកឧត្តម និងលោកជំទាវ បាននិងកំពុងតែកសាងរូបព្រះពុទ្ធបដិមា កម្ពស់ជិត៣០ម៉ែត្រ នៅវត្តរំលេចស្រុកបាកានផងដែរ។ អំពើល្អរបស់ឯកឧត្តម ស៊ុយ សែម និងលោកជំទាវ ជា ខេង បានធ្វើឲ្យព្រះសង្ឃ មន្ត្រីរាជការ និងប្រជាពលរដ្ឋខេត្តពោធិ៍សាត់ គោរពស្រលាញ់គ្រប់ៗគ្នា ដិតជាប់ក្នុងក្រអៅបេះដូង ព្រមទាំងបានជូនពរដល់ឯកឧត្តម និងលោកជំទាវ មានសុខភាពល្អ ដើម្បីបន្តជីវិ.តរស់នៅឲ្យកាន់តែយូរអង្វែងថែមទៀត៕
ចែករំលែកព័តមាននេះ