ស្របពេលអាកាសធាតុប្រែប្រូល ធ្លាក់ខ្យល់ចុះត្រជាក់បន្តិច គេសង្កេតឃើញថា រយៈពេលជិតមួយសប្ដាហ៍កន្លងមកនេះ ស្ថានភាពត្រីក្នុងដងស្ទឹងសង្កែ ហាក់មានសន្ទុះចុះខ្លាំង ដែលនាំឲ្យមានបទល្មើសនេសាទ(អ៊ុយ)យ៉ាងច្រើនស្អែកស្កះ បានកើតមានឡើងពាសពេញតាមដងស្ទឹងសង្កែ នៅប៉ែកខាងក្រោម
ខេត្តបាត់ដំបង៖ ស្របពេលអាកាសធាតុប្រែប្រូល ធ្លាក់ខ្យល់ចុះត្រជាក់បន្តិច គេសង្កេតឃើញថា រយៈពេលជិតមួយសប្ដាហ៍កន្លងមកនេះ ស្ថានភាពត្រីក្នុងដងស្ទឹងសង្កែ ហាក់មានសន្ទុះចុះខ្លាំង ដែលនាំឲ្យមានបទល្មើសនេសាទ(អ៊ុយ)យ៉ាងច្រើនស្អែកស្កះ បានកើតមានឡើងពាសពេញតាមដងស្ទឹងសង្កែ នៅប៉ែកខាងក្រោម «ទំនប់ស្គាក់ទឹកសាលាតាអន» ស្ថិតក្នុងស្រុកឯកភ្នំ ខណៈគេមិនឃើញមន្ត្រីជំនាញ ឬអាជ្ញាធរមានវិធានការចុះទប់ស្កាត់ឡើយ។
មន្ត្រីមូលដ្ឋានបានរាយការណ៍ជិតមួយសប្ដាហ៏កន្លងមកហើយ ដែលស្ថានភាពត្រីនៅតាមសងស្ទឹងសង្កែមានសន្ទុះចុះខ្លាំង ហើយគេក៏ចាប់ផ្ដើមប្រទះឃើញបទល្មើសនេសាទ ស្រាប់តែកើតឡើងយ៉ាងព្រោងព្រាតពាសពេញដងស្ទឹងផងដែរ នៅប៉ែកខាងក្រោម «ទំនប់ស្គាក់ទឹកសាលាតាអន»។
បើតាមប្រភពបានឲ្យដឹងថា បទល្មើសនេសាទដែលកំពុងកើតឡើងស្អេកស្កះពេញស្ទឹងនៅពេលនេះ ភាគច្រើន «អ៊ុយ» ដាក់យកត្រីល្អិតៗ និងការប្រើសំណាញ់ហ៊ុមព័ទ្ធសំរាស់ឈើយកត្រី។
បើតាមការសួរនាំ និងសង្កេតមើលជាក់ស្ដែង អ្នកប្រព្រឹត្តបទល្មើសនេសាទទាំងនេះ ភាគច្រើនមិនមែនពលរដ្ឋនៅក្នុងមូលដ្ឋានទេ គឺពួកគេមកពីភូមិ-ឃុំ-ស្រុកផ្សេងៗគ្នា។ នេះបើតាមប្រភពព័ត៌មានដែលមន្ត្រីបានសួរនាំ។
ហើយត្រីដែលជាប់ក្នុង «អ៊ុយ» សុទ្ធតែជាប្រភេទកូនត្រីតូចៗ ដែលគេប្រមូលបានរាប់រយគីឡូក្រាម សម្រាប់ «អ៊ុយ» មួយកន្លែង ក្នុងមួយថ្ងៃ។ ចំណែកក្រុមអ្នកនេសាទត្រីនៅទីនោះ ហាក់ព្យាយាមលាក់លៀមក្នុងការផ្ដល់ចម្លើយនៅពេលសួរនាំ។ ដោយពួកគេបានប្រាប់ដោយស្ទាក់ស្ទើរថា «ពួកគេមិនមែនជាអ្នកភូមិនៅទីនោះទេ។ ពួកគេខ្លះបានដាក់ «អ៊ុយ» ចាប់ត្រីផង រាយមងផង និងបង់សំណាញ់ផង ព្រោះពេលនេះ ត្រីចុះខ្លាំងប្រហែលជិតមួយសប្ដាហ៍មកហើយ»។
នៅពេលសួរនាំថា «ការប្រើប្រាស់ឧបករណ៍ «អ៊ុយ» ដាក់ព្រោងព្រាតពេញដងស្ទឹងបែបនេះ តើមានអាជ្ញាធរ ឬមន្ត្រីជលផលចុះសួរនាំ ឬក៏ហាមឃាត់ ឬមួយយកលុយខ្លះដែរទេ?»។
ពួកគេហាក់រារែកបន្តិច តែបានបង្ហើបថា «មានគេចុះមកសួរនាំដែរ ហើយមានអ្នកខ្លះក៏លុយ តែអ្នកខ្លះទៀតដាក់មងបង់សំណាញ់តិចតួចមិនបានឲ្យទេ»។
កោះសន្តិភាព មិនអាចទំនាក់ទំនងសុំការបំភ្លឺពីមន្ត្រីជលផលស្រុកឯកភ្នំបានទេ នៅព្រឹកថ្ងៃទី ២៦ ខែវិច្ឆិកា ឆ្នាំ២០២៣ ពាក់ព័ន្ធនឹងការកើតឡើងព្រោងព្រាតនូវបទល្មើសនេសាទ តាមដងស្ទឹងសង្កែ ខាងលើនេះ។
ជុំវិញបញ្ហានេះ ប្រជាពលរដ្ឋ ក៏ដូចជាមន្ត្រីមូលដ្ឋាន បានលើកឡើងថា អាជ្ញាធរក្ដី មន្ត្រីជលផលក្ដី គួរតែមានចំណាត់ការខ្លះចំពោះអ្នកបង្កើតបទល្មើសនេសាទខាងលើនេះ ជាពិសេសការប្រើប្រាស «អ៊ុយ» ធំៗ ដាក់ពង្រាយពាសពេញស្ទឹងសង្កែ។
ពួកគេនិយាយថា គ្រាន់តែ «អ៊ុយ» មួយកន្លែង ក្នុងមួយថ្ងៃ ចាប់យកកូនត្រីគ្រប់ប្រភេទរាប់រយគីឡូក្រាម។ ចុះទម្រាំ «អ៊ុយ» រាប់សិបកន្លែងបែបនេះ តើត្រូវចាប់យកកូនត្រីប៉ុន្មានតោនក្នុងមួយថ្ងៃ? ដូច្នេះអាជ្ញាធរ ឬមន្ត្រីជំនាញ គួរណាមានសកម្មភាពទប់ស្កាត់ខ្លះផង បើយល់ថា ការប្រើប្រាសឧបករណ៍ប្រភេទ «អ៊ុយ» នេះ ជាឧបករណ៍នេសាទខុសច្បាប់ មិនគួរសម្ងំស្ងៀមឈឹងបែបនេះទេ៕
ចែករំលែកព័តមាននេះ