រាជធានីភ្នំពេញ ៖ នារីម្នាក់បានរងរបួសជាទម្ងន់ដោយសារជនមិនស្គាល់មុខ២នាក់វាយប្រហារដោយទឹកអាស៊ីត ខណៈនាងកំពុងជិះម៉ូតូជាមួយបុរសម្នាក់ចេញពីហាងស៊ុបមួយកន្លែងស្ថិតនៅម្តុំផ្សារដើមគ ខណ្ឌទួលគោក។ ករណីនេះបានកើតឡើងកាលពីវេលាម៉ោង៨និង៣០នាទីយប់ ថ្ងៃទី២១ ឧសភា នៅមុខរោងចក្រកាត់ដេរគង់ ហុង ក្បែរវិហារចិន
រាជធានីភ្នំពេញ ៖ នារីម្នាក់បានរងរបួសជាទម្ងន់ដោយសារជនមិនស្គាល់មុខ២នាក់វាយប្រហារដោយទឹកអាស៊ីត ខណៈនាងកំពុងជិះម៉ូតូជាមួយបុរសម្នាក់ចេញពីហាងស៊ុបមួយកន្លែងស្ថិតនៅម្តុំផ្សារដើមគ ខណ្ឌទួលគោក។ ករណីនេះបានកើតឡើងកាលពីវេលាម៉ោង៨និង៣០នាទីយប់ ថ្ងៃទី២១ ឧសភា នៅមុខរោងចក្រកាត់ដេរគង់ ហុង ក្បែរវិហារចិន (តាកំប៉ោង) តាមមហាវិថីសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ។
តាមព័ត៌មានពីមន្ត្រីប៉ូលិសខណ្ឌសែនសុខដែលបានទៅដល់កន្លែងកើតហេតុឱ្យដឹងថា កម្មការិនីរងគ្រោះបានជិះម៉ូតូម៉ាកវ៉េវអ៊ី ពណ៌ខ្មៅ ជាមួយបុរសម្នាក់ចេញពីហាងស៊ុបមួយកន្លែងនៅម្តុំផ្សារដើមគ ខណ្ឌទួលគោក។ ស្ត្រីរងគ្រោះនេះត្រូវបានគេឱ្យដឹងថា ជាកម្មការិនីរោងចក្រមិថុនា ចំណែកបុរសដែលឌុបនាងត្រូវបានគេអះអាងថា ជាប្រុសស្នេហ៍។ ពេលនាងជិះម៉ូតូជាមួយបុរសនោះមកដល់ចំណុចខាងលើ ក៏បានឈប់ម៉ូតូ ហើយបុរសនោះបានចូលបត់ជើងតូច ឯនាងអង្គុយចាំលើម៉ូតូ។ លុះពេលបត់ជើងតូចរួចបុរសនោះបានឌុបនាងបន្តទៀត ប៉ុន្តែពេលចេញដំណើរបន្តបានប្រមាណ១០ម៉ែត្រ ស្រាប់តែមានជន២នាក់ជិះម៉ូតូវីវ៉ាមកក្បែរហើយធ្វើសកម្មភាពជះទឹកអាស៊ីតទៅលើនាងកម្មការិនី រួចជិះម៉ូតូគេចខ្លួនបាត់ទៅ។
មន្ត្រីប៉ូលិសបន្តទៀតថា នៅកន្លែងកើតហេតុប៉ូលិសបានរកឃើញកាដងទឹក១ដែលប្រហែលជាជនល្មើសដាក់ទឹកអាស៊ីតក្នុងកាទឹកនោះជះទៅលើជនរងគ្រោះ។ ចំពោះជនរងគ្រោះជាកម្មការិនីវិញបានរងរបួសធ្ងន់លើផ្ទៃមុខ និងដើមទ្រូង ចំណែកឯបុរសដែលបើកម៉ូតូរងរបួសស្រាល ដោយទឹកអាស៊ីតជះត្រូវដៃតិចតួចបំផុត។ តាមប្រភពពីកន្លែងកើតហេតុនិយាយថា នារីរងគ្រោះកុំតែបានអាវជួយ និងអ្នកជិតខាងជួយជះទឹកលាងកុំអីរងរបួសកាន់តែធ្ងន់ធ្ងរ។
មន្ត្រីប៉ូលិសឱ្យដឹងថា កម្មការិនីរងគ្រោះឈ្មោះអ៊ាង សុភាច អាយុ២៩ឆ្នាំ មានស្រុកកំណើតនៅស្រុកស្ទោង ខេត្តកំពង់ធំ បច្ចុប្បន្នធ្វើការនៅរោងចក្រមិថុនា សង្កាត់ទឹកថ្លា ខណ្ឌសែនសុខ។ ចំណែកបុរសដែលនាងជិះម៉ូតូជាមួយឈ្មោះសោម សុផល អាយុ៤០ឆ្នាំ មានស្រុកកំណើតនៅស្រុកពាមជរ ខេត្តព្រៃវែង មានប្រពន្ធ និងកូនរួចទៅហើយ តែបានមកទាក់ទងជាមួយនាងរយៈពេលជាង១ឆ្នាំហើយ។ ប៉ូលិសបានសន្និដ្ឋានថា បញ្ហាខាងលើអាចកើតឡើងដោយសារស្នេហាត្រីកោណ ហើយកំពុងស្រាវជ្រាវរកជនដៃដល់ដើម្បីនាំខ្លួនមកផ្ទន្ទាទោស៕
ចែករំលែកព័តមាននេះ