ADផ្ទាំងផ្សព្វផ្សាយពាណិជ្ជកម្ម

Picture

១​ករណី​ទៀត​នៅ​ខេត្តកំពត កុមារី​ឆ្លង​ជំងឺផ្តាសាយបក្សី ក្រោយ​កាន់​មាន់​ងាប់

2 ខែ មុន

រាជធានី​ភ្នំពេញ ៖ ក្រសួងសុខាភិបាល នៃ​ព្រះរាជាណាចក្រ​កម្ពុជា នៅ​ថ្ងៃ​ទី​២៥ ខែ​វិ​ច្ចិ​កា ឆ្នាំ​២០២៣​នេះ បាន​ប្រកាស​រក​ឃើញ​ករណី​ទី​២ នៃ​ជំងឺផ្តាសាយបក្សី H5N1…

រាជធានី​ភ្នំពេញ ៖ ក្រសួងសុខាភិបាល នៃ​ព្រះរាជាណាចក្រ​កម្ពុជា នៅ​ថ្ងៃ​ទី​២៥ ខែ​វិ​ច្ចិ​កា ឆ្នាំ​២០២៣​នេះ បាន​ប្រកាស​រក​ឃើញ​ករណី​ទី​២ នៃ​ជំងឺផ្តាសាយបក្សី H5N1 កើត​លើ​កុមារី អាយុ​០៤​ឆ្នាំ​ម្នាក់​ទៀត ដែល​រស់នៅ​ក្នុងភូមិ​ជាមួយគ្នា ក្បែរផ្ទះជាមួយ​ស្ត្រី​អាយុ​២១​ឆ្នាំ​ម្នាក់ នៅ​ខេត្តកំពត ។

យោង​តាម​សេចក្តី​ប្រកាស​ព័ត៌មាន​របស់​ក្រសួងសុខាភិបាល បាន​ឲ្យ​ដឹង​ថា មាន​អ្នក​ជំងឺផ្តាសាយបក្សី ចំនួន​០១​ករណី​ទៀត កើត​លើ​ក្មេង​ស្រី​អាយុ​៤​ឆ្នាំ និង​ត្រូវ​បាន​បញ្ជាក់​ថា វិជ្ជមាន​វីរុស​ផ្តាសាយ​បក្សី ប្រភេទ​ហាស់​៥ អ៊ិ​ន​១ (H5N1) ពី​វិទ្យាស្ថាន​ជាតិ​សុខភាព​សាធារណៈ និង​វិទ្យាស្ថាន​ប៉ាស្ទ័រ​កម្ពុជា កាលពី​ថ្ងៃ​ទី​២៤ ខែវិច្ឆិកា ឆ្នាំ​២០២៣ ដែល​មាន​ទីលំនៅ​ក្នុងភូមិ​ត្រពាំង​ឬ​ស្សី ឃុំ​ដំណាក់​សុ​ក្រំ ស្រុក​ដងទង់ ខេត្តកំពត ។

ក្រសួង​បាន​បន្ត​ថា ករណី​ក្មេង​ស្រី​ខាងលើ​នេះ មានផ្ទះ​នៅ​ក្បែរ ករណី​ស្ត្រី​អាយុ​២១​ឆ្នាំ ដែល​បាន​ចេញ​សេចក្ដី​ប្រកាស​ព័ត៌មាន​កាលពី​ថ្ងៃ​ទី​២៤ ខែវិច្ឆិកា ឆ្នាំ​២០២៣ ដែល​បាន​រក​ឃើញ​តាម​រយៈ​ការ​ស្វែងរក​សកម្ម នៅ​ភូមិ​កើតហេតុ ដោយ​ក្រុម​ឆ្លើយ​តប​បន្ទាន់​ចម្រុះ​ពី​ថ្នាក់​ជាតិ និង​ថ្នាក់​ក្រោម​ជាតិ នៃ​ក្រសួងសុខាភិបាល ក្រសួងកសិកម្ម រុក្ខា​ប្រមាញ់ និង​នេសាទ និង​ក្រសួងបរិស្ថាន អាជ្ញាធរ​មូលដ្ឋាន​គ្រប់​លំដាប់ថ្នាក់ និង​ប៉ូលិស ។

ក្រសួង​បាន​ឲ្យ​ដឹង​ទៀត​ថា តាម​ការ​សាកសួរ បង្ហាញ​ថា នាង​បាន​កាន់​មាន់​ងាប់ និង​ចាប់ផ្ដើម​ឈឺ​នៅ​ថ្ងៃ​ទី​២៣ ខែវិច្ឆិកា ឆ្នាំ​២០២៣ ដោយ​មាន​រោគ​សញ្ញា​ផ្លូវដង្ហើម រួម​មាន​គ្រុនក្តៅ ក្អក និង​ចេញ​កន្ទួល​ក្រហម កុមារ​ទទួល​ការ​ព្យាបាល​ដោយ​ផ្ដល់​ឱសថ តា​មី​ប្លូ (Tamiflu) និង​ត្រូវ​បាន​បញ្ជូន​មក​ពិនិត្យ​ព្យាបាល និង​ថែទាំ​បន្ត​នៅ​មន្ទីរពេទ្យ​ខេត្តកំពត នៅ​ថ្ងៃ​ទី​២៥ ខែវិច្ឆិកា ឆ្នាំ​២០២៣​។ បច្ចុប្បន្ន​អ្នកជំងឺ​កំពុង​ទទួល​បានការ​ថែទាំ យ៉ាង​យកចិត្តទុកដាក់​ពី​សំណាក់​ក្រុម​គ្រូពេទ្យ ។

ជាមួយ​គ្នា​នោះ​ដែរ ក្រុម​ឆ្លើយ​តប​បន្ទាន់​របស់​ក្រសួងសុខាភិបាល​ថ្នាក់​ជាតិ និង​ថ្នាក់​ក្រោម​ជាតិ បាន​និង​កំពុង​សហការ​ជាមួយ​ក្រុមការងារ​នៃ​ក្រសួងកសិកម្ម រុក្ខា​ប្រមាញ់ និង​នេសាទ និង​ក្រសួងបរិស្ថាន អាជ្ញាធរ​មូលដ្ឋាន​គ្រប់​លំដាប់ថ្នាក់ ប៉ូលិស និង​អង្គការ​ដៃគូ​ខាងលើ បន្ត​អង្កេត​ស្រាវជ្រាវ​យ៉ាង​សកម្ម លើ​ការ​កើតឡើង នូវ​ជំងឺផ្តាសាយបក្សី​ប្រភេទ​ទាំង​២ ដែល​បាន​កើតឡើង និង​ធ្វើការ​ឆ្លើយ​តប​ទៅ​តាម​វិធីសាស្ត្រ និង​ពិធីសារ​បច្ចេកទេស​បន្ត​ការ​ស្វែងរក​ប្រភព​ចម្លង ទាំង​លើ​សត្វ និង​មនុស្ស និង​បន្ត​ស្វែងរក​ករណី​សង្ស័យ និង​អ្នក​ប៉ះពាល់ ដើម្បី​ទប់ស្កាត់​ការ​ឆ្លង​បន្ត​ទៅ​អ្នក​ដទៃ​ទៀត​ក្នុង​សហគមន៍ ព្រមទាំង​ចែក​ជូន​ឱសថ​តា​មី​ប្លូ (Tamiflu) ដល់​អ្នក​ប៉ះពាល់ ជិត​ស្និទ្ធ និង​ធ្វើ​យុទ្ធនាការ​អប់រំ​សុខភាព​ប្រជាពលរដ្ឋ នៅ​ក្នុងភូមិ ដែល​កើតហេតុ​ខាងលើ ។

ក្រសួងសុខាភិបាល សូម​ក្រើនរំលឹក​សារ​ជា​ថ្មី​ម្តងទៀត ដល់​បងប្អូន​ប្រជាពលរដ្ឋ​ទាំងអស់ សូម​យកចិត្តទុកដាក់​ប្រុង​ប្រយ័ត្ន​លើ​ជំងឺផ្តាសាយបក្សី​ជា​និច្ច ពីព្រោះ​ជំងឺផ្តាសាយបក្សី H5N1 នៅ​តែ​បន្ត​គំរាមកំហែង​ដល់​សុខភាព​ប្រជាពលរដ្ឋ​យើង ហើយ​ក៏​សូម​ជម្រាប​ដល់​បងប្អូន ប្រសិនបើ​មាន​អាកា​រៈ​ក្តៅខ្លួន ក្អក ហៀរ​សំបោរ ឬ​ពិបាក​ដកដង្ហើម និង​មាន​ប្រវត្តិ​ធ្លាប់​បាន​ប៉ះពាល់​ជាមួយ​មាន់​ទា​ឈឺ ឬ​ស្លាប់​ក្នុង​អំឡុង​១៤​ថ្ងៃមុន​ថ្ងៃ ចាប់ផ្តើម​មាន​រោគ​សញ្ញា សូម​មេត្តា​កុំទៅ​ជួបជុំ ឬ​ទៅ​ទីប្រជុំជន ដែល​មាន​មនុស្ស​ច្រើន និង​ត្រូវ​ស្វែងរក​ការពិគ្រោះ​យោបល់ និង​ការ​ពិនិត្យ​ព្យាបាល នៅ​តាម​មូលដ្ឋាន​សុខាភិបាល ដែល​នៅ​ជិត​លោក​អ្នក​បំផុត​ឱ្យ​បាន​ឆាប់​ទាន់​ពេលវេលា ។

ក្រសួង​ក៏​បាន​លើក​ឡើង​ពី​របៀប​ចម្លង ៖ ជំងឺផ្តាសាយបក្សី H5N1 គឺជា​ជំងឺ​ផ្ដាសាយ​មួយ ដែល​ជា​ធម្មតា​ចម្លង​រវាង​សត្វ​បក្សីឈឺ ទៅ​បក្សី​ផ្សេង​ទៀត ប៉ុន្តែ​ជួនកាល​វា​អាច​ចម្លង​ពី​បក្សី​ទៅ​មនុស្ស តាម​ការ​ប៉ះពាល់​ជិត​ស្និទ្ធ​ជាមួយ​បក្សី ដែល​ឈឺ​ឬ​ស្លាប់​។ ជំងឺផ្តាសាយបក្សី​លើ​មនុស្ស​ជា​ជំងឺ​ធ្ងន់ធ្ងរ ដែល​តម្រូវ​ឱ្យ​មានការ​ធ្វើការ​ព្យាបាល​នៅ​មន្ទីរពេទ្យ​ទាន់​ពេលវេលា​។ ទោះបីជា​វា​មិន​ងាយ​ឆ្លង​ពី​មនុស្ស​ទៅ​មនុស្ស ប៉ុន្តែ​បើ​វា​អាច​បំប្លែង​ខ្លួន​អាច​ឆ្លង​ដូចនឹង​ជំងឺ​ផ្ដាសាយ​តាម​រដូវ​កាល​ផង​ដែរ​។

ចំណែកឯ​វិធានការ​បង្ការ ៖ សារ​អប់រំ​របស់​រាជរដ្ឋាភិបាល រួម​មាន ៖ លាងដៃ​អោយ​បាន​ញឹកញាប់ ជាមួយ​សាប៊ូ និង​ទឹក​មុន​ពេល​បរិភោគ និង​បន្ទាប់​ពី​ប៉ះពាល់​ជាមួយ​បក្សី ដាក់​កុមារ​នៅ​ឆ្ងាយ​ពី​សត្វ​បក្សី និង​ដាក់​សត្វ​បក្សី នៅ​ឱ្យ​ឆ្ងាយ​ពី​កន្លែង​រស់នៅ កុំ​បរិភោគ​សត្វ​បក្សី​ឈឺ ឬ​ងាប់ និង​រាល់​សត្វ​បក្សី ដែល​ធ្វើ​សម្រាប់​បរិភោគ​ត្រូវ​ចំអិន​ឱ្យ​ឆ្អិន​ល្អ ៕

អត្ថបទសរសេរ ដោយ

កែសម្រួលដោយ