ខេត្តបាត់ដំបង ៖ បុរសម្នាក់ត្រូវអ្នកភូមិប្រទះឃើញដេកស្លា.ប់យ៉ាងអាណោចអាធ័មក្នុងស្ថានភាពស្គមស្គាំងគួរអនិច្ចា កាលពីព្រឹកថ្ងៃទី១៩ ឧសភា នៅក្បែរស្ពានមួយកន្លែងក្នុងភូមិក្រពើខាងជើង ឃុំភ្នំសំពៅ ស្រុកបាណន់ ដែលក្រោយពីស្រាវជ្រាវ សមត្ថកិច្ចបានសន្និដ្ឋានថា បុរសនេះស្លា.ប់ដោយសារដាច់អាហារ ព្រោះគាត់ជាមនុស្សមានសតិមិនប្រក្រតី
ខេត្តបាត់ដំបង ៖ បុរសម្នាក់ត្រូវអ្នកភូមិប្រទះឃើញដេកស្លាប់យ៉ាងអាណោចអាធ័មក្នុងស្ថានភាពស្គមស្គាំងគួរអនិច្ចា កាលពីព្រឹកថ្ងៃទី១៩ ឧសភា នៅក្បែរស្ពានមួយកន្លែងក្នុងភូមិក្រពើខាងជើង ឃុំភ្នំសំពៅ ស្រុកបាណន់ ដែលក្រោយពីស្រាវជ្រាវ សមត្ថកិច្ចបានសន្និដ្ឋានថា បុរសនេះស្លាប់ដោយសារដាច់អាហារ ព្រោះគាត់ជាមនុស្សមានសតិមិនប្រក្រតី ។
តាមព័ត៌មានពីមន្ត្រីនគរបាលមូលដ្ឋានបានឱ្យដឹងថា សាកសពបុរសនោះទំនងស្លាប់តាំងពីពេលយប់ លុះព្រឹកឡើងទើបអ្នកភូមិប្រទះឃើញ ព្រោះស្ថានភាពនៃសាកសពរឹងស្តូកទៅហើយ ។ សាកសពនោះឈ្មោះសុខ លី អាយុ៤៧ឆ្នាំ មានប្រពន្ធឈ្មោះងឹម តិ អាយុ៣៩ឆ្នាំ រស់នៅភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ។ ភរិយារបស់សព អ្នកស្រីងឹម តិ បានប្រាប់សមត្ថកិច្ចថា ប្តីរបស់គាត់ជាមនុស្សមានសតិមិនប្រក្រតី ដោយសារតែគាត់ស្រវឹង ហើយត្រូវពួកក្មេងពាលវាយកាលពីឆ្នាំ២០០៩កន្លងទៅ ហើយប្តីរបស់គាត់បានដើរចេញបាត់ពីផ្ទះតាំងពី ពេលនោះមក ដោយមិនដឹងទៅណាមកណា លុះពេលមានដំណឹងស្រាប់តែសមត្ថកិច្ចប្រាប់ថា គេប្រទះឃើញគាត់ដេកស្លាប់ទៅហើយ។
សមត្ថកិច្ចប៉ូលិសនិយាយថា នៅលើរាងកាយសាកសពគេមិនឃើញមានស្លាកស្នាមអ្វីទេ ។ នៅមុនពេលកើតហេតុ គេតែងប្រទះឃើញបុរសនេះដើរត្រេចចរតាមដងផ្លូវគ្មានគោលដៅ ក្នុងស្ថានភាពស្គមស្គាំង ដូច្នេះទើបគេសង្ស័យថា បុរសនេះស្លាប់ដោយសារដាច់អាហារ ។ ក្រោយពីពិនិត្យរួច សមត្ថកិច្ចបានធ្វើកំណត់ហេតុប្រគល់សាកសពបុរសនោះឱ្យទៅក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ