ញាក់សាច់! ស្ត្រីមានបំផុតលើលោក កើនទ្រព្យជាង១០ពាន់លានដុល្លារនៅឆ្នាំនេះ
បារាំង ៖ ស្ត្រីដែលមានទ្រព្យសម្បត្តិច្រើនជាងគេបំផុតនៅលើពិភពលោក បានបង្កើនតួលេខទ្រព្យ
បារាំង ៖ ស្ត្រីដែលមានទ្រព្យសម្បត្តិច្រើនជាងគេបំផុតនៅលើពិភពលោក បានបង្កើនតួលេខទ្រព្យសម្បត្តិរបស់ខ្លួន បន្ទាប់ពីបង្កើនប្រាក់ចំណូលប្រមាណ ១១ពាន់លានដុល្លារអាមេរិក នៅក្នុងឆ្នាំនេះ។ នេះបើយោងតាមប្រភពពីគេហទំព័រ LADbible ចេញផ្សាយកាលពីថ្ងៃទី២២ ខែវិច្ឆិកា កន្លងទៅ។
ទ្រព្យសម្បត្តិរបស់លោកស្រី Francoise Bettencourt Meyers ជនជាតិបារាំង កំពុងកើនឡើងជាលំដាប់ ដោយសារតែភាគហ៊ុនរបស់គាត់នៅក្នុងក្រុមហ៊ុនគ្រឿងសំអាងដ៏ជោគជ័យបំផុតមួយរបស់ពិភពលោក។ សេដ្ឋិនីវ័យ៧០ឆ្នាំរូបនេះ គឺជាចៅស្រីរបស់ស្ថាបនិកក្រុមហ៊ុន L’Oreal លោក Eugene Schueller ហើយបច្ចុប្បន្នលោកស្រីគឺជាអនុប្រធានក្រុមហ៊ុនយក្សរបស់បារាំងមួយនេះ។ លោកស្រីបានកាន់កាប់ភាគហ៊ុន ៣៣% នៅក្នុងអាជីវកម្មគ្រួសារមួយនេះ ហើយបានបម្រើការក្នុងក្រុមប្រឹក្សាភិបាលជាន់ខ្ពស់ចាប់តាំងពីឆ្នាំ ១៩៩៧ មកម្ល៉េះ ។
នៅក្នុងនាមជាកូនតែមួយគត់របស់លោក Andre Bettencourt និងលោកស្រី Liliane Bettencourt Meyers ដែលជាកូនតែមួយគត់របស់លោក Eugene Schueller លោកស្រី Francoise Bettencourt Meyers បានទទួលមរតកដ៏មហាសាលពីម្តាយ និងតំណែងជាស្ត្រីមានជាងគេបំផុតរបស់ពិភពលោក នៅពេលម្តាយរបស់គាត់បានទទួលមរណភាពនៅក្នុងឆ្នាំ ២០១៧ ។
យោងតាមទស្សនាវដ្តីពាណិជ្ជកម្មអាមេរិក Forbes ទ្រព្យសម្បត្តិរបស់លោកស្រី Francoise Bettencourt Meyers បានកើនឡើងជាថ្មីម្តងទៀត ចាប់តាំងពីដើមឆ្នាំនេះ រហូតដល់ ៩២.១ពាន់លានដុល្លារ ដែលពីមុនមានត្រឹម ៨០.៥ពាន់លានដុល្លារតែប៉ុណ្ណោះ ខណៈក្រុមហ៊ុន L’Oreal បានបន្តមានប្រៀបជាងគូប្រជែងដោយមើលឃើញថា តម្លៃភាគហ៊ុនកើនឡើងយ៉ាងខ្លាំងដល់ទៅ ២៧.០៨% ឯណោះ។
ម៉ាកផលិតផលថែរក្សាសម្ផស្ស ដែលត្រូវបានទទួលស្គាល់ជាអន្តរជាតិមួយនេះ បានរីករាយនឹងការកើនឡើងការលក់សម្រាប់ត្រីមាសទី៣ ដោយសារតែកំណើនទូទាំងទ្វីបអឺរ៉ុប និងការកើនឡើងប្រជាប្រិយភាពនៅសហរដ្ឋអាមេរិក។ កំណើននៃទ្រព្យសម្បត្តិរបស់លោកស្រី Francoise Bettencourt Meyers ត្រូវបានកំណត់ដោយប្រមូលប្រាក់ចំណូលកាន់តែច្រើន ខណៈដែល L’Oreal បានរំពឹងថា នឹងមានការកើនឡើង ១៤.៤% នៃការលក់នៅទូទាំងប្រទេសចិន ប៉ុន្តែទោះយ៉ាងណា ក្រុមហ៊ុនយក្សបារាំងមួយនេះ បានធ្លាក់ចុះ ៤.៨% នៅទូទាំងអាស៊ីខាងជើង ដែលនេះត្រូវបានស្តីបន្ទោសលើការរឹតបន្តឹងដែលបានអនុវត្តលើអ្នកលក់បន្តដោយរដ្ឋាភិបាលចិន ដែលបានរារាំងអាជីវកម្មលក់រាយរបស់ L’Oreal។ ទោះយ៉ាងណា ពួកគេនៅតែទទួលបានកំណើន ៧.៧% នៅទូទាំងចិនដីគោកក្នុងរយៈពេល៩ខែដំបូងនៃឆ្នាំនេះ។
L’Oreal នៅតែជាមហិច្ឆតាសំខាន់ដើម្បីក្លាយជាអ្នកដឹកនាំទីផ្សារនៅក្នុងប្រទេសចិន ដែលមានទីផ្សារតម្លៃ ៧៨.៩ពាន់លានដុល្លារ ខណៈដែលការលក់នៅអឺរ៉ុប បានកើនឡើង ១៦.២% បូករួមជាមួយការកើនឡើង ១១.៨% នៅអាមេរិកខាងជើង។
ដោយឡែកចំណាត់ថ្នាក់លេខ ២ នៃកំពូលស្ត្រីមានជាងគេនៅលើពិភពលោក គឺជាលោកស្រី Alice Walton ដែលជាអ្នកស្នងមរតករបស់ក្រុមហ៊ុនសាជីវកម្មលក់រាយចម្រុះជាតិសាសន៍របស់អាមេរិក Walmart ដែលមានទ្រព្យសម្បត្តិសរុប ៦០.៦ពាន់លានដុល្លារ។
ចំណាត់ថ្នាក់លេខ ៣ គឺលោកស្រី Julia Koch ជាមួយនឹងទ្រព្យសម្បត្តិ ៥៧.៦ពាន់លានដុល្លារ បន្ទាប់ពីលោកស្រីបានទទួលមរតកភាគហ៊ុននៅក្នុងក្រុមហ៊ុនសាជីវកម្មចម្រុះជាតិសាសន៍អាមេរិក Koch Industries ពីស្វាមីលោកស្រីគឺលោក David Koch ដែលបានទទួលមរណភាពកាលពីឆ្នាំ ២០១៩៕
ចែករំលែកព័តមាននេះ