ខេត្តពោធិ៍សាត់ ៖ ក្រុមប្រតិបត្តិការចល័ត ដឹកនាំ ដោយលោកវរសេនីយ៍ត្រីខូយ កុសល នាយការិយាល័យនគរបាលប្រឆាំងបទល្មើសសេដ្ឋកិច្ច ក្រោមការចង្អុលបង្ហាញពីលោកឧត្តមសេនីយ៍៍ត្រីសារុន ចាន់ធី ស្នងការនគរបាលខេត្តពោធិ៍សាត់ កាលពីថ្ងៃទី២១ ឧសភា ២០១១ បានរឹបអូសរថយន្តដឹកបទល្មើសព្រៃឈើចំនួន២គ្រឿង
ខេត្តពោធិ៍សាត់ ៖ ក្រុមប្រតិបត្តិការចល័ត ដឹកនាំ ដោយលោកវរសេនីយ៍ត្រីខូយ កុសល នាយការិយាល័យនគរបាលប្រឆាំងបទល្មើសសេដ្ឋកិច្ច ក្រោមការចង្អុលបង្ហាញពីលោកឧត្តមសេនីយ៍៍ត្រីសារុន ចាន់ធី ស្នងការនគរបាលខេត្តពោធិ៍សាត់ កាលពីថ្ងៃទី២១ ឧសភា ២០១១ បានរឹបអូសរថយន្តដឹកបទល្មើសព្រៃឈើចំនួន២គ្រឿង ដែលឈ្មួញទុច្ចរិតប្លុងចោលនៅក្បែរផ្ទះប្រជាពលរដ្ឋស្ថិតក្នុងភូមិអារ៉ង់ព្រួច ឃុំអន្សារចំបក់ ស្រុកក្រគរ ។
តាមព័ត៌មានពីមន្ត្រីប្រតិបត្តិការបានឱ្យដឹងថា នៅថ្ងៃនោះ វេលាម៉ោង៧និង៣០នាទីយប់ ប្រជាជនបានរាយការណ៍មកថា មានរថយន្ត២គ្រឿងបើកមកឈប់ក្នុងភូមិអារ៉ង់ព្រួច ហើយមានមនុស្ស២-៣នាក់ចេញពីរថយន្តមកនិយាយទូរស័ព្ទដើរចុះដើរឡើងមួយសន្ទុះធំ ហើយមិនឃើញទៅណាសោះ សង្ស័យថា រថយន្តដឹកបទល្មើសព្រៃឈើ។ ភ្លាមនោះ សមត្ថកិច្ចបានទៅដល់ទីនោះ ឃើញរថយន្តទាំង២គ្រឿងចតក្នុងភូមិកៀនផ្ទះប្រជាពលរដ្ឋនោះមែន ប៉ុន្តែមិនឃើញមនុស្សទេ ទំនងជាពួកគេដឹងថា សមត្ថកិច្ចមក ទើបនាំគ្នារត់គេចខ្លួន ។ ដោយឃ្លាំមើលមិនឃើញម្ចាស់ សមត្ថកិច្ចបានទៅពិនិត្យមើលរថយន្តទាំង២គ្រឿងនោះ ស្រាប់តែឃើញផ្ទុកសុទ្ធតែឈើប្រណីតប្រភេទគ្រញូងក៏បញ្ជូនមករក្សាទុកនៅស្នងការដ្ឋាននគរបាលខេត្តទាំងយប់ ។ លុះព្រឹកឡើងទម្លាក់ឈើ ហើយវាស់វែងសរុបមានចំនួន១៤០ដុំ ទម្ងន់១.០៨៤គីឡូក្រាម ស្មើនឹង០,៨០២ម៉ែត្រគូប ប្រគល់ឱ្យខណ្ឌរដ្ឋបាលព្រៃឈើតែម្តង ។ រថយន្តទាំង២គ្រឿងនេះម៉ាកកាមរីចង្កូតស្តាំ ពណ៌ខ្មៅ ស៊េរី៩៣ ពាក់ស្លាកលេខ បាត់ដំបង 2A-0140 និងមួយគ្រឿងទៀតពណ៌ស ស៊េរី៨៧ ពាក់ស្លាកលេខ ក-០៨៣៧ ភព២ ។
គេមានការងឿងឆ្ងល់ថា រថយន្តដឹកឈើដែលចរាចរលើផ្លូវជាតិលេខ៥ ភ្លូកទឹក ភ្លូកដី ទាំងយប់ទាំងថ្ងៃនោះ មន្ត្រីជំនាញ ឬសមត្ថកិច្ចមិនដែលចាប់ឃាត់បានទេ ទាល់តែរថយន្តទាំងនោះជួបគ្រោះថ្នាក់ចរាចរណ៍ទើបដឹង ។ រថយន្តទាំង២គ្រឿងនេះប្រហែលជាដឹកឈើគ្រញូងពីខេត្តពោធិ៍សាត់ ហើយការឈប់នៅទីនោះទំនងជារង់ចាំការផ្តល់ភ្លើងខៀវពីអ្នករត់ផ្លូវនៅខេត្តកំពង់ឆ្នាំង ហើយក៏ជួបគ្រោះស៊យបែបនេះទៅ ៕
ចែករំលែកព័តមាននេះ