រដ្ឋមន្ត្រីក្រសួងរ៉ែ ៖ រដ្ឋាភិបាលរក្សាជំហរបញ្ចុះតម្លៃថាមពលអគ្គិសនី ជូនប្រជាពលរដ្ឋ
រាជធានីភ្នំពេញ ៖ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានបញ្ជាក់ថា រដ្ឋាភិបាលកម្ពុជា បានរក្សាជំហរ…
រាជធានីភ្នំពេញ ៖ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានបញ្ជាក់ថា រដ្ឋាភិបាលកម្ពុជា បានរក្សាជំហរ ក្នុងការបញ្ចុះតម្លៃថាមពលអគ្គិសនី ជូនប្រជាពលរដ្ឋទៀត ខណៈវិស័យរ៉ែ កំពុងតែរីកចម្រើន ។
ក្នុងវេទិការពិភាក្សាស្តីពី «គោលនយោបាយរ៉ែ និងថាមពល នៅកម្ពុជា» នាព្រឹកថ្ងៃទី២១ ខែវិច្ឆិកា ឆ្នាំ២០២៣ នៅសណ្ឋាការសុខាភ្នំពេញ ឯកឧត្តម កែវ រតនៈ ថ្លែងថា ដើម្បីជួយជំរុញ ផ្នែកទេសចរណ៍ឲ្យងើបឡើងវិញ ក្រោយជំងឺកូវីដ រាជរដ្ឋាភិបាល បានរុញការបញ្ចុះថ្លៃអគ្គិសនីរយៈពេល៣ខែទៀត គឺនៅខែធ្នូ ឆ្នាំ២០២៣ និងខែមករា កុម្ភៈ ឆ្នាំ២០២៤ ខាងមុខ ។
ឯកឧត្តម លើកឡើងថា រដ្ឋាភិបាលបានលើកទឹកចិត្តដល់វិស័យទេសចរណ៍ ដូចជាផ្នែកសណ្ឋាគារ ផ្ទះសំណាក់ ភោជនីយដ្ឋានធំៗ និងអគារពាណិជ្ជកម្មធំៗ ឲ្យខិតខំប្រឹងប្រែង ក្នុងការទាក់ទាញភ្ញៀវទេចរណ៍ ដែលចំណុចនេះ ធ្វើឲ្យគាត់ទទួលបានការបញ្ចុះថ្លៃ ១៥%ទៀត ចំពោះតម្លៃអគ្គិសនី។ ចំណែកអ្នក ដែលមិនបានប្រឹងប្រែង ដោយរក្សាការប្រើប្រាស់ចំនួនអគ្គិសនី នៅដដែល គឺមិនបានទទួលការបញ្ចុះតម្លៃទេ ។
ឯកឧត្តម បញ្ជាក់ថា ៖ «អ្នកដែលប្រឹងប្រែង គឺបាន អ្នកដែលមិនប្រឹងប្រែង គឺអត់បានទេ។ ចំពោះគោលនយោបាយនេះ អាជ្ញាធឬអគ្គិសនី បាននិងកំពុងតែដាក់ចេញ នូវគោលការណ៍ប្រតិបត្តិហើយ» ។
ជាមួយគ្នានោះដែរ ឯកឧត្តមរដ្ឋមន្ត្រី បានឲ្យដឹងថា ការជួយជំរុញលើវិស័យទេសចរណ៍នេះដែរ ធ្វើឲ្យរដ្ឋាភិបាលជួយចេញខាតថវិការជំនួសប្រជាពលរដ្ឋ ចាប់ពីឆ្នាំ២០១២ ដល់ឆ្នាំ២០២២ អស់ថវិការប្រមាណ ៦២៩លានដុល្លារអាមេរិក។ តាមរយៈអគ្គិសនីនៅជនបទ រាជរដ្ឋាភិបាលបានជួយពង្រឹងបណ្តាញនៅជនបទ ក្នុងតម្លៃថវិការ ជាង១០២លានដុល្លារផងដែរ ដោយមិនទាន់រាប់បញ្ចូលនឹងការចំណាយផ្សេងៗទៀតនោះទេ។ មិនត្រឹមតែប៉ុណ្ណោះ រដ្ឋាភិបាល ក៏បានដាក់ប្រព័ន្ធសូឡាជូនប្រជាពលរដ្ឋ ដែលមិនទាន់មានអគ្គិសនីទៅដល់ផងដែរ។ ក្រៅពីនេះ រាជរដ្ឋាភិបាលបានជូន នូវបន្ទះសូឡា ស្រូបពន្លឺព្រះអាទិត្យ ផងដែរ ។
ឯកឧត្តមថា អ្វីដែលរដ្ឋលក់តម្លៃអគ្គិសនី ក្នុងតម្លៃមួយគីឡូតម្លៃ ៣៨០រៀល ឬ៤៨០រៀល ឬ៦៨០រៀល គឺជាការចេញខាតជំនួសទៅកាន់សេវាករ ។
បើតាមឯកឧត្តម កែវ រតនៈ បានអះអាងថា រាជរដ្ឋាភិបាល នៅតែប្រកាន់ជំហរក្នុងការមិនតម្លើងថ្លៃអគ្គិសនីនោះទេ។ ហើយមិនត្រឹមតែមិនតម្លើង គឺកំពុងតែគិតគូរក្នុងការបញ្ចុះតម្លៃឲ្យថែមទៀត ក្នុងវិសូយមួយចំនួន ដូចឧស្សាហកម្មកាត់ដេរ និងទេសចរណ៍ ។
ឯកឧត្តម គូសបញ្ជាក់ថា ៖ «បងប្អូនដឹងទេ បន្ទាប់ពីចូលកាន់តំណែងជានាយករដ្ឋមន្ត្រីមក សម្តេចធិបតី បានខំប្រឹងទាំងយប់ ទាំងថ្ងៃ ដើម្បីបំពេញការសន្យា និងក៏បានធ្វើលើសផងដេរ។ អ៊ីចឹង តាមការប្តេជ្ញារបស់សម្តេចធិបតី ហ៊ុន ម៉ាណែត ត្រូវយ៉ាងណាឲ្យតម្លៃអគ្គិសនី រក្សានៅតម្លៃដដែល ហើយបន្តចុះ ដើម្បីធ្វើយ៉ាងណា ជួយដល់សេដ្ឋកិច្ចជាតិ» ។
ឯកឧត្តមរដ្ឋមន្ត្រី បានបន្ថែមថា គោលដៅរបស់សម្តេចធិបតី ហ៊ុន ម៉ាណែត គឺធ្វើយ៉ាងណាស្តាយសេដ្ឋកិច្ចឡើងវិញ បន្ទាប់ពីកម្ពុជា បានរងប៉ះពាល់ដោយសារជំងឺកូវីដ-១៩ ហើយប៉ះពាល់ដោយសារសង្គ្រាមរុស្ស៊ី-អ៊ុយក្រែន ៕
ចែករំលែកព័តមាននេះ