ភ្នំពេញ៖ សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់​ព្រះមហាក្សត្រ ​និងជាប្រធាន​គណប្រជាជនកម្ពុជា កាលពីល្ងាចថ្ងៃទី២០ ខែវិច្ឆិកានេះ បានអនុញ្ញាតឱ្យ​ប្រតិភូនៃសមាគម​អ្នកនិពន្ធខ្មែរ ចំនួន ១០រូប ដឹកនាំដោយលោក ជ័យ ចាប ចូលជួបសម្តែងការគួរសម និងពិភាក្សា​ការងារ​ នៅវិមាន ៧មករា ក្នុងរាជធានីភ្នំពេញ។ ក្នុងកិច្ចប្រជុំនេះ សម្តេចតេជោ ហ៊ុន សែន បាន​ណែនាំ​ឲ្យសមាគមអ្នកនិពន្ធខ្មែរ ចូលរួមពិនិត្យ​ការតែងនិពន្ធរឿងអប់រំខ្លីៗ ​ក្នុងបណ្តាញសង្គម រឺក្នុង Tik Tok។

លោក ព្រីង ប្រណិត ប្រធានសមាគមអ្នកនិពន្ធខ្មែរ បានជម្រាបជូនសម្តេចតេជោ ពីសកម្មភាព​ការងារ​របស់សមាគមអ្នកនិពន្ធខ្មែរ នាពេលកន្លងទៅ លើការប្រមូលផ្តុំអ្នកស្រាវជ្រាវ ការចងក្រង​តែងនិពន្ធ លើអ្វីដែលរាជរដ្ឋាភិបាល សម្រេចបាន។

លោកប្រធានសមាគម បានជម្រាបជូនសម្តេចតេជោ ពីការរៀបចំប្រឡងស្នាដៃតែងនិពន្ធប្រចាំឆ្នាំ​របស់សមាគម ក្រោមប្រធានបទ «ពានរង្វាន់ ៧មករា សន្តិភាព» ដែលគ្រោងធ្វើនៅ​ពេល​ខាងមុខ។

លោក​ប្រធាន ក៏បានជម្រាបជូនសម្តេចតេជោ ពីគោលបំណងនៃការរៀបចំឲ្យមានការជួបជុំ​នៃអ្នកនិពន្ធរបស់​បណ្តាប្រទេសតាមដងទន្លេមេគង្គ ដើម្បីធ្វើការពិភាក្សាលើការងារ​សិក្សាស្រាវជ្រាវ និងទិសដៅទៅថ្ងៃអនាគត លើស្នាដៃតែងនិពន្ធ។

សម្តេចតេជោ ហ៊ុន សែន បានសម្តែងនូវការគាំទ្រពីគោលបំណង និងទិសដៅរបស់សមាគម​អ្នកនិពន្ធខ្មែរ ដែលបានសម្រេចនូវស្នាដៃមួយចំនួន នាពេលកន្លងមក។

សម្តេចតេជោ បានវាយតម្លៃខ្ពស់ ចំពោះស្នាដៃរបស់អ្នកនិពន្ធខ្មែរ ប៉ុន្តែសម្តេចស្នើឲ្យមាន​ការបណ្តុះបណ្តាល និងធ្វើការស្រាវជ្រាវ ឲ្យបានគ្រប់ជ្រុងជ្រោយ ដើម្បីឲ្យស្នាដៃរបស់អ្នកនិពន្ធ​កាន់តែទទួលបាននូវភាពល្បីល្បាញ និងមានកេរ្តិ៍ឈ្មោះ។

សម្តេចតេជោ ក៏បានស្នើឲ្យសមាគមអ្នកនិពន្ធខ្មែរ ចូលរួមពិនិត្យមើលលើការតែងនិពន្ធ​រឿងអប់រំខ្លីៗ ដែលបានផ្សព្វផ្សាយ ក្នុងបណ្តាញសង្គម រឺក្នុងតីកតុក ដែលមានផ្នែកខ្លះ ខុសពីសច្ចភាពរបស់សង្គម ខុសការពិត ធ្វើឲ្យប៉ះពាល់ដល់សង្គម។

សម្តេចតេជោ មានប្រសាសន៍បន្តថា បើសរសេរពីប្រវត្តិសាស្រ្ត អ្នកនិពន្ធត្រូវយល់ឲ្យច្បាស់ពី​ប្រវត្តិសាស្រ្ត ស្រាវជ្រាវប្រវត្តិសាស្រ្តឲ្យបានច្បាស់លាស់ កុំយកគំនិតផ្ទាល់ខ្លួន ទៅបញ្ចេញ។

ក្នុងជំនួបនេះ សម្តេចតេជោ បានប្រកាស គាំទ្រឲ្យមានការប្រឡងតែងនិពន្ធ «ពានរង្វាន់ ៧មករា សន្តិភាព» និងគាំទ្រ ឲ្យមានការជួបជុំនៃ្នកនិពន្ធបណ្តាប្រទេសទន្លេមេគង្គ ព្រមទាំង​គាំទ្រឲ្យមានទិវានៃអ្នកនិពន្ធ នាពេលខាងមុខ៕