ភ្នំពេញ៖ គ.ជ.ប បានប្រកាស នៅថ្ងៃទី២០វិច្ឆិកានេះថា គណបក្ស​ ត្រូវបង់ប្រាក់តម្កល់ ចំនួន ១៥លានរៀល នៅធនាគារជាតិនៃកម្ពុជា​ ដើម្បីចុះឈ្មោះ ដាក់បេក្ខជន​ចូលរួម​ប្រកួតប្រជែង​ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤​។

តាមប្រតិទិនរបស់គ.ជ.ប ការចុះបញ្ជីគណបក្ស​នយោបាយឈរឈ្មោះបោះឆ្នោត និងបេក្ខជន​ឈរឈ្មោះបោះឆ្នោតព្រឹទ្ធសភា នឹងធ្វើឡើង ចាប់ពីថ្ងៃទី២៧ ខែវិច្ឆិកា រហូតដល់ថ្ងៃទី១១ ខែធ្នូ ឆ្នាំ២០២៣​។

ការបោះឆ្នោតជ្រើសតាំងសមាជិក​ព្រឹទ្ធសភា នីតិកាលទី៥ ឆ្នាំ២០២៤ នឹងធ្វើឡើង នៅថ្ងៃអាទិត្យ ទី២៥ ខែកុម្ភៈ ឆ្នាំ២០២៤​។ ការបោះឆ្នោតនេះ ធ្វើឡើងជាអសកល គឺមានតែសមាជិកក្រុមប្រឹក្សាឃុំសង្កាត់ក្នុងតំណែង និងសមាជិករដ្ឋសភា ក្នុងតំណែងប៉ុណ្ណោះ ជាអ្នកបោះឆ្នោត៕