រាជធានីភ្នំពេញ ៖ ក្រសួងបរិស្ថាន បានបំផុតស្មារតីដល់ប្រជាពលរដ្ឋ រួមគ្នាកាត់បន្ថយការប្រើប្រាស់ ថង់ប្លាស្ទិកខណៈមានយុវជនជាង ៣លាននាក់ បានប្តេជ្ញាចិត្ត ចូលរួមកាត់បន្ថយការប្រើប្រាស់ថង់ប្លាស្ទិក ដើម្បីកម្ពុជាស្អាត។…
រាជធានីភ្នំពេញ ៖ ក្រសួងបរិស្ថាន បានបំផុតស្មារតីដល់ប្រជាពលរដ្ឋ រួមគ្នាកាត់បន្ថយការប្រើប្រាស់ ថង់ប្លាស្ទិកខណៈមានយុវជនជាង ៣លាននាក់ បានប្តេជ្ញាចិត្ត ចូលរួមកាត់បន្ថយការប្រើប្រាស់ថង់ប្លាស្ទិក ដើម្បីកម្ពុជាស្អាត។
កាលពីថ្ងៃទី១៩ ខែវិច្ឆិកា ឆ្នាំ២០២៣ នៅទឹកដីខេត្តកំពត ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន មានប្រសាសន៍ថា យុវជនចំនួនជាង០៣លាននាក់ បានប្តេជ្ញាចិត្តចូលរួមក្នុងយុទ្ធនាការកាត់បន្ថយការប្រើប្រាស់ប្លាស្ទិក ក្រោមប្រធានបទ «ថ្ងៃនេះ ខ្ញុំមិន ប្រើ ថង់ ប្លាស្ទិកទេ» ។
ជាមួយនឹងការប្តេជ្ញាចិត្តរបស់យុវជន ដោយផ្តើមពីការមិនប្រើប្រាស់ថង់ប្លាស្ទិក យ៉ាងតិច១ថ្ងៃ ក្នុង១សប្តាហ៍ ដើម្បីរួមចំណែក ក្នុងការកាត់បន្ថយការបង្កើត និងការចោលសំរាមតាមសាលារៀន តាមលំនៅស្ថាន និងនៅក្នុងភូមិ ឃុំរបស់ពួកគេ រហូតដល់បានផ្លាស់ប្តូរទម្លាប់ឈប់ប្រើប្រាស់ថង់ប្លាស្ទិកទាំងស្រុង នាពេលអនាគត ។
ប្រសាសន៍ថ្លែងឡើងរបស់ ឯកឧត្តមរដ្ឋមន្ត្រី ក្រសួងបរិស្ថាននេះ ធ្វើឡើងនៅក្នុងព្រឹត្តិការណ៍ នៃការប្រកាសបើកយុទ្ធនាការ ថ្ងៃនេះ ខ្ញុំមិនប្រើថង់ប្លាស្ទិកទេ! នៅពហុកីឡដ្ឋានក្រុងកំពត ខេត្តកំពត រួមនឹងពិធីចុះអនុស្សារណៈយោគយល់រវាងក្រសួងបរិស្ថាន និងរដ្ឋបាលខេត្តកំពត កែប ព្រះសីហនុ កោះកុង កំពង់ស្ពឺ តាកែវ សមាគមកាយឫទ្ធិនារីកម្ពុជា និងសហភាពសហព័ន្ធយុវជនកម្ពុជា ផងដែរ ។
រាប់ចាប់ពីថ្ងៃទី១ ខែកញ្ញា ដល់ថ្ងៃទី១៩ ខែវិច្ឆិកា ឆ្នាំ២០២៣ យុទ្ធនាការកាត់បន្ថយការប្រើប្រាស់ប្លាស្ទិក ក្រោមប្រធានបទ «ថ្ងៃនេះ ខ្ញុំមិនប្រើថង់ប្លាស្ទិកទេ» មានអ្នកចូលរួមសរុបចំនួន ៣,០០៨,០៧១ អង្គ/នាក់ ក្នុងនោះរួមមាន លោកគ្រូអ្នកគ្រូសរុបចំនួន ១១១,០៥៦ នាក់ សិស្សានុសិស្សសរុបចំនួន ២,៨៣៥,០៨៧ នាក់ កម្មករកម្មការិនី និងប្រជាពលរដ្ឋចូលរួមសរុបចំនួន ៦១,៩២៨ នាក់ ដោយបានចុះផ្សព្វផ្សាយសរុបចំនួន ៨,៦៦០លើក ក្នុងសាលារៀនសរុបចំនួន ៦,៦៥៥សាលា រោងចក្រ/សហគ្រាស/ប្រជាពលរដ្ឋ សរុបចំនួន ១២០កន្លែង សហគមន៍ចំនួន ៦៥ កន្លែង និងវត្ដអារាមចំនួន ២២ វត្ត នៅក្នុងក្រុង/ស្រុកចំនួន ១៩៦ នៅទូទាំងព្រះរាជាណាចក្រកម្ពុជា លើសពីនេះ ខេត្តកំពត មានសាលាចំនួន ៤៣៨សាលា និងលោកគ្រូ អ្នកគ្រូ សរុបចំនួនជិត ៦ពាន់នាក់ និងសិស្សា នុសិស្សសរុប ចំនួនជាង ១៣ម៉ឺននាក់ បន្ថែមទៀត ៕
ចែករំលែកព័តមាននេះ