ខេត្តកំពង់ឆ្នាំង ៖ រឿងរ៉ាវចោទដាក់គ្នាទៅវិញទៅមក រវាងបុរសម្នាក់ និងនារីម្នាក់ដែលដណ្តើមយកត្រូវតែរៀងខ្លួននោះធ្វើឱ្យមន្ត្រីប៉ូលិសឈឺក្បាល ប៉ុន្តែទោះបីជាយ៉ាងណា ភាគីបុរសបានរងរបួសត្រូវគេកាប់ចំនួន១២ពូថៅ ហើយត្រូវគេដឹកយកទៅសង្គ្រោះនៅមន្ទីរពេទ្យ និងបានប្តឹងប៉ូលិសពីជនដៃដល់ថែមទៀតផង។
រឿងរ៉ាវនេះត្រូវបានបុរសឈ្មោះប៉ិញ ធីម អាយុ៣៣ឆ្នាំ រស់នៅភូមិត្រពាំងគ ឃុំជ្រៃបាក់ ស្រុករលាប្អៀរ ដែលរងរបួសចំនួន១២ពូថៅរៀបរាប់ប្តឹងប៉ូលិសក្នុងមន្ទីរពេទ្យមួយនៅវេលាម៉ោង១និង៣០នាទីរសៀល ថ្ងៃទី១៩ ឧសភា ថា ខ្លួនបានទៅទារលុយពីស្ត្រីម្នាក់ឈ្មោះញ៉េប ស៊ីម៉ាក់ អាយុ៣៥ឆ្នាំ រស់នៅភូមិត្រពាំងតាសុក ឃុំព្រៃមូល ស្រុករលាប្អៀរ ។ ការទៅទារលុយជំពាក់នោះមានចំនួន៣៥០ដុល្លារ ដែលស្ត្រីនោះបានជំពាក់ ។ ការទារលុយនោះ គឺបន្ទាប់ពីណាត់តាមទូរស័ព្ទថា នឹងប្រគល់ឱ្យនៅចំណុចមុខសាលារៀនតាប៉ាង ។
តាមការរៀបរាប់របស់បុរសខាងលើថា លុះពេលជួបគ្នាស្ត្រីរូបនោះប្រាប់ថា មិនមានលុយឱ្យទេ ចាំថ្ងៃក្រោយ ។ តាមការចោទប្រកាន់ថា មិនត្រឹមតែទារលុយមិនបានទេ ស្ត្រីឈ្មោះញ៉េប ស៊ីម៉ាក់ ថែមទាំងបានដកសោម៉ូតូរបស់ខ្លួនទៀតផង ហើយខ្លួនក៏ដេញដណ្តើមយកសោម៉ូតូវិញ។ ភ្លាមនោះស្ត្រីរូបនោះបានស្រែកហៅឱ្យគេជួយ ក៏ស្រាប់តែលេចមនុស្ស៣នាក់ ដែលមានឈ្មោះសុក សារ៉េន ភេទប្រុស ឈ្មោះញ៉េប ស៊ីណា ភេទប្រុស និងឈ្មោះញ៉េប ស៊ីម៉េន ភេទស្រី ចេញមកដោយមានទាំងពូថៅមកកាប់រូបគេត្រូវក្បាល និងខ្នងចំនួន១២ពូថៅ ធ្វើឱ្យរូបគេដួលសន្លប់។ លុះដឹងខ្លួនឡើងវិញ ក៏ទូរស័ព្ទទៅម្តាយក្មេកឱ្យមកជួយ និងប្តឹងប៉ូលិស ហើយរូបខ្លួនក៏ត្រូវបានដឹកមកសង្គ្រោះនៅមន្ទីរពេទ្យ ។ បុរសរូបនោះបញ្ជាក់ប្រាប់ប៉ូលិសទៀតថា ស្ត្រីឈ្មោះញ៉េប ស៊ីម៉ាក់ បានជំពាក់លុយគាត់ចំនួន៥០០ដុល្លារ ហើយបានសងចំនួន១៥០ដុល្លារ នៅសល់លុយ៣៥០ដុល្លារទៀតដែលស្ត្រីរូបនោះបានទូរស័ព្ទឱ្យទៅយក ប៉ុន្តែបែរជានាំគ្នាមកកាប់គាត់ បណ្តាលឱ្យរងរបួសបែបនេះទៅវិញ។
ផ្ទុយនឹងការបកស្រាយខាងលើ ស្ត្រីឈ្មោះញ៉េប ស៊ីម៉ាក់ បានរៀបរាប់នៅចំពោះមុខប៉ូលិសស្រុករលាប្អៀរថា រឿងពិតមិនអ៊ីចឹងទេ គាត់មិនបានជំពាក់លុយបុរសឈ្មោះប៉ិញ ធីម ឡើយ ។ ស្ត្រីរូបនោះរៀបរាប់ទាំងទឹកភ្នែកថា បុរសឈ្មោះប៉ិញ ធីម បានខ្ចីបន្តោងខ្សែ.ករបស់គាត់ធ្វើព្រះស្រោបមាស៦ហ៊ុនយូរហើយ គឺកាលពីថ្ងៃទី៨ មីនា ឆ្នាំ២០០៨។ ឯដំណើររឿងដែលនាំឱ្យខ្ចីបន្តោងខ្សែ.កនោះ គឺកាលពីថ្ងៃទី៧ មីនា មុនខ្ចីបន្តោងខ្សែ.កមួយថ្ងៃរូបគាត់ និងបុរសឈ្មោះប៉ិញ ធីម ដែលជាមនុស្សស្គាល់គ្នាបានជួបគ្នាដោយចៃដន្យតាមផ្លូវលំមួយនៅចំណុចភូមិថ្មី ឃុំតាំងក្រសាំង។ កាលនោះបុរសឈ្មោះប៉ិញ ធីម បាននិយាយថា ម៉ូតូគាត់អស់សាំង ហើយគាត់បានឱ្យលុយ២.០០០រៀលទៅចាក់សាំងកន្លះលីត្រ។ ប៉ុន្តែឈ្មោះធីម មិនព្រមក៏ចុះពីលើម៉ូតូ ហើយមកចាប់គាត់ចូលព្រៃរំលោភរហូតបានសម្រេច ដោយនិយាយប្រាប់ថា បងនៅតែស្រឡាញ់អូន ។
ក្រោយពីរំលោភបានសម្រេចហើយឈ្មោះធីមបាននិយាយថា អូនកុំភ័យបងជិតលែងប្រពន្ធបងដាច់ហើយ និងចូលស្តីដណ្តឹងអូនក្នុងពេលឆាប់ៗនេះ ។ លុះដល់ថ្ងៃ ទី៨ មីនា ក៏បានជួបគ្នាម្តងទៀត ដោយបុរសឈ្មោះធីម និយាយថា បន្តោងខ្សែ.កគាត់បានលក់យកលុយសូកគេចូលធ្វើការហើយ ហេតុនេះសុំខ្ចីបន្តោងខ្សែ.ករបស់គាត់ (ស្ត្រីញ៉េប ស៊ីម៉ាក់) មកដាក់ជំនួស។ កាលនោះមិនត្រឹមតែខ្ចីតាមសម្រួលទេ បុរសឈ្មោះប៉ិញ ធីម ថែមទាំងគំរាមថា បើមិនឱ្យខ្ចីទេ គេនឹងយករឿងម្សិលមិញ (រឿងដែលគេរំលោភគាត់) ដើរនិយាយប្រាប់គេឯង ។ ដោយគាត់ភ័យខ្លាចបែករឿងខ្មាសគេ ក៏ព្រមឱ្យខ្ចីបន្តោងខ្សែ.កនោះទៅ ។ ក្រោយមកមិនចាំថ្ងៃខែ ប៉ុន្តែប្រហែលក្នុងអំឡុងចុងខែមីនា បុរសឈ្មោះធីម បានទូរស័ព្ទប្រាប់ថា បើចង់បានបន្តោងខ្សែ.កវិញ ត្រូវយកលុយ១០០ដុល្លារមកលោះទើបបាន។ កាលណោះគាត់បានយកលុយ២០ម៉ឺនរៀលទៅប្រគល់ឱ្យឈ្មោះធីម ដើម្បីលោះយក ប៉ុន្តែពេលប្រគល់លុយហើយឈ្មោះធីមប្រាប់ថា ភ្លេចយកបន្តោងខ្សែ.កមកហើយ ។
ស្ត្រីរូបនោះរៀបរាប់បន្តថា ក្រោយមកនៅថ្ងៃទី២៦ មេសា គាត់បានយកលុយ២៥ម៉ឺនរៀល ទៅប្រគល់ឱ្យឈ្មោះធីម ដើម្បីបង្គ្រប់ស្មើ១០០ដុល្លារ ដើម្បីលោះយកបន្តោងខ្សែ.កមកវិញ។ ប៉ុន្តែថ្ងៃនោះក្រោយពេលប្រគល់លុយហើយ ឈ្មោះធីម មិនត្រឹមតែមិនប្រគល់បន្តោងខ្សែ.កឱ្យទេ ថែមទាំងចាប់គាត់រំលោភបានសម្រេចជាលើកទី២ទៀត។ កាលនោះព្រោះតែគាត់ប្រឹងរើ និងបានធាក់ឈ្មោះធីមនោះមួយជើង ក៏ត្រូវឈ្មោះធីម ខាំ គាត់ចំភ្លៅ និងដៃទៀតផង ។ ក្រោយមកនៅថ្ងៃទី៧ ឧសភា ឈ្មោះធីម បានទូរស័ព្ទ ឱ្យទៅយកបន្តោងខ្សែ.កម្តងទៀត ប៉ុន្តែគាត់មិនបានទៅទេ។ លុះនៅថ្ងៃកើតហេតុគឺថ្ងៃទី១៩ ឧសភា ឈ្មោះធីម បានទូរស័ព្ទឱ្យទៅយកបន្តោងខ្សែ.កម្តងទៀតនៅជិតសាលារៀនតាប៉ាង។ កាលណោះមុនពេលចេញទៅយកបន្តោងខ្សែ.ក គាត់បាននិយាយរឿងរ៉ាវប្រាប់ប្អូនស្រីគាត់ឈ្មោះញ៉េប ស៊ីម៉េន ពីរឿងរ៉ាវដែលបានកើតឡើងកន្លងមក រវាងរូបគាត់ និងបុរសឈ្មោះប៉ិញ ធីម នេះ។ ពេលនិយាយប្រាប់នោះ ប្អូនប្រុសបង្កើត និងប្អូនថ្លៃឈ្មោះញ៉េប ស៊ីណា និងឈ្មោះសុក សារ៉េន នៅដេកក្នុងអង្រឹងបានស្តាប់ឮទាំងអស់។ មុនទៅយកបន្តោងខ្សែ.ក គាត់បានផ្តាំផ្ញើប្អូនស្រីគាត់ថា ឆាប់ទៅតាមក្រោយមើលគាត់ផង ក្រែងឈ្មោះធីម នោះសម្លាប់គាត់ ។
ស្ត្រីរូបនោះបញ្ជាក់ថា ពេលទៅដល់ជួបឈ្មោះធីម បាននិយាយថា ចូលមកយកបន្តោងខ្សែ.កទៅ (កន្លែងជួបជាព្រៃស្ងាត់)។ ពេលគាត់ចូលទៅយក ស្រាប់តែឈ្មោះប៉ិញ ធីម ចាប់គាត់រំលោភជាលើកទី៣ទៀត តែគាត់បានស្រែកឱ្យគេជួយ។ ស្រាប់តែភ្លាមនោះ ប្អូនប្រុសគាត់ពីរនាក់ដែលបានស្តាប់ដឹងរឿង ហើយលបមកចាំពេលណាគាត់មិនដឹងនោះទេ បានស្ទុះចេញពីក្នុងព្រៃដោយកាន់ពូថៅម្នាក់មួយមកកាប់ឈ្មោះធីម ជាច្រើនពូថៅរហូតសន្លប់រួចហើយក៏នាំគ្នារត់ចេញអស់ទៅ។ ស្របពេលនោះប្អូនស្រីគាត់ឈ្មោះញ៉េប ស៊ីម៉េន ក៏ទៅដល់ ហើយក៏នាំគ្នាត្រឡប់មកផ្ទះវិញ ។
រឿ់ងរ៉ាវខាងលើនេះ បើស្តាប់ភាគីខាងស្រី គឺបុរសដែលមានប្រពន្ធនោះប្រើល្បិចខ្ចីបន្តោងខ្សែ.កយកធ្វើជានុយ សម្រាប់ធ្វើបាបនាងក្រមុំចាស់ដ៏អភ័ព្វនេះ ។ ប៉ុន្តែបើស្តាប់ខាងបុរសវិញ គឺជារឿងខ្ចីប្រាក់ទៅវិញ។ ទោះជាយ៉ាងណាក៏ដោយចុះមានតែផ្លូវច្បាប់ទេ ដែលជាអ្នកសម្រេចសេចក្តី។ ម្យ៉ាងទៀត បើពិតដូចនារីនោះចោទប្រកាន់បែបនោះមែន ភាគីបុរសពិតជាទ្រមខ្លួនហើយប្រឈមមុខនឹងច្បាប់ទៀត ដែលមើលទៅអាចរត់ចោលស្រុកមិនខាន បើសមត្ថកិច្ចមិនប្រញាប់ចាត់ការ ៕
ចែករំលែកព័តមាននេះ