ខេត្តស្វាយរៀង ៖ នៅរសៀលថ្ងៃទី១៧ វិច្ឆិកា ២០២៣នេះ រដ្ឋបាលខេត្តស្វាយរៀង បានរៀបចំក្រុងពាលី សុំដល់លោកតាម្ចាស់ស្រុកម្ចាស់ទន្លេ ព្រះម៉ែគង្គារ ដើម្បីសុំសេចក្តីសុខ…
ខេត្តស្វាយរៀង ៖ នៅរសៀលថ្ងៃទី១៧ វិច្ឆិកា ២០២៣នេះ រដ្ឋបាលខេត្តស្វាយរៀង បានរៀបចំក្រុងពាលី សុំដល់លោកតាម្ចាស់ស្រុកម្ចាស់ទន្លេ ព្រះម៉ែគង្គារ ដើម្បីសុំសេចក្តីសុខ ក្នុងពិធីប្រណាំងទូក រយៈពេល២ថ្ងៃគឺថ្ងៃទី១៨ -១៩វិច្ឆិកា២០២៣ នៅទន្លេវ៉ៃគោ អញ្ជើញជាអធិបតីក្នុងពិធីរួមមានលោកជុំ ហាត ប្រធានក្រុមប្រឹក្សាខេត្តលោកប៉េង ពោធិ សា អភិបាលនៃគណៈអភិបាលខេត្តស្វាយរៀង ព្រមទាំងសមាជិកសមាជិការក្រុមប្រឹក្សាខេត្តលោកអភិបាលរងខេត្តលោកលោកស្រីប្រធានអនុប្រធានមន្ទីរនានា ជុំវិញខេត្ត មន្ត្រីរាជ្យការនិងប្រជាពលរដ្ឋចូលរួមជាច្រើនកុះករ។
លោកបណ្ឌិត តូចប៉ូលីវ៉ា អភិបាលរងខេត្តទទួលបន្ទុកបច្ចេកទេសបានមានប្រសាសន៍ថា នេះជាលើកទី១៣ហើយដែលរដ្ឋបាលខេត្តស្វាយរៀងបានរៀបចំប្រណាំងទូកង ខ្នាតអន្តរជាតិនិងទូកក្លាបីសន្លឹក នៅទន្លេវ៉ៃគោក្រុងស្វាយរៀង ដែលការផ្តួចផ្តើម ពីឯកឧត្តមហុក ឡង់ឌី អតីតអគ្គស្នងការនគបាលជាតិនាឆ្នាំ២០០៨ រហូតមកបច្ចប្បន្ន បើគិតមកដល់ឆ្នាំ២០២៣នេះមានរយៈពេល១៥ឆ្នាំហើយ។
ដោយឡែក នៅឆ្នាំ២០២៣នេះ យើងបានរៀបចំពិធីប្រណាំងទូកប្រពៃណីខ្នាតអន្តរជាតិនិងទូកក្តារបីសន្លឹក គឺមានការចូលរួមកើនឡើងច្រើនជាងបណ្តាឆ្នាំមុនៗ គឺ ទូកមកចូលរួមមានចំនួន៦៧ទូក ក្នុងនោះទូកខ្នាតអន្តរជាតិ មានចំនួន៥៧ទូក ទូកក្តារបីសន្លឹក ចំនួន១០ទូក ។ ហើយទូកក្នុងខេត្តមានចំនួន១៦ទូក ទូកមកពីបណ្តាខេត្តនានាមានចំនួន៤១ទូក ដែលបានដាក់ពាក្យសុំចូលប្រកួត។ ក្នុងនោះដែរ ទូកអន្តរជាតិចែកចេញជា២ផែន ទូកខ្នាតវែងនិងទូកខ្នាតខ្លី ចំពោះទូកក្តារបីសន្លឹកកឆ្នាំនេះគឺមានតែផ្នែកនារី ប៉ុណ្ណោះ។
លោកបណ្តិតតូចប៉ូលីវ៉ា បន្តទៀត ថា ការរៀបចំប្រណាំងទូកនេះកឺក្នុងគោលបំណង បង្កើតឲ្យមានទេសចរណ៍ ដោយខេត្តស្វាយរៀងពុំមានរមណីយដ្ឋានទេសចរណ៍ច្រើនដូចរាជធានីខេត្តនានាទេ ដូច្នេះរដ្ឋបាលខេត្តស្វាយរៀងបានរៀបចំឲ្យមានការប្រណាំងទូកនេះឡើងដើម្បីឲ្យប្រជាពលរដ្ឋក្នុងខេត្តបានចូលរួមទស្សនាកំសាន្តផងនិងឲ្យភ្ញៀវជាតិនិងអន្តរជាតិមកកំសាន្តផង ហើយនេះក៏ជាការបន្តស្នាដៃរបស់លោកនាយឧត្តមសេនីយ៍ ហុកឡង់ឌី និងរក្សាបាននូវប្រពីណីជាតិផងដែរ។
លោកក៏បានសំណូមពរដល់ប្រជាពលរដ្ឋដែលមកចូលរួមសហការក្នុងពិធីប្រណាំងទូកទាំងអស់ គឺ៖ ម្នាក់ការពារបរិស្ថានម្នាក់ មិនចោលសម្រាម យើងមានធុងសម្រាម និងមិនបន្ទោបង់ពាសវាលពាសកាល យើងមានបង្គន់អនាម័យចលត្រ័ ។ ម្នាក់ចូលរួមជាសន្តិសុខម្នាក់ បើឃើញជនសង្ស័យធ្វើសកម្មភាពបទល្មើស ត្រូវរាយការណ៍ជូនសមត្ថកិច្ចភ្លាម ។
សូមបញ្ជាក់ថា ការប្រណាំងទូកថ្ងៃទី១៨វិច្ឆិកា គឺចាប់ផ្តើមនៅវេលាម៉ោង២និង០០នាទីរសៀល ថ្ងៃអាទឹត្យទី១៩ វិច្ឆិកា គឺចាប់ផ្តើមប្រណាំងទូកនៅវេលាម៉ោង៨និង០០នាទីព្រឹក ។បន្ទាប់មកពិធីប្រណាំងទូកសាកល្បងដោយមានមហាជនចូលរួមទស្សនារាប់ម៉ឺននាក់៕
ចែករំលែកព័តមាននេះ