អ្នករត់ម៉ារ៉ាតុងម្នាក់ រងបម្រាម១២ខែ ក្រោយលួចជិះឡានអំឡុងពេលការប្រកួត
អង់គ្លេស ៖ ស្ថាប័នគ្រប់គ្រងកីឡាអត្តពលកម្មចក្រភពអង់គ្លេស UK Athletics ហៅកាត់ថា UKA
អង់គ្លេស ៖ ស្ថាប័នគ្រប់គ្រងកីឡាអត្តពលកម្មចក្រភពអង់គ្លេស UK Athletics ហៅកាត់ថា UKA បានប្រកាសថា អ្នករត់អ៊ុលត្រាម៉ារ៉ាតុងម្នាក់ (Ultramarathon) ត្រូវបានហាមឃាត់ពីការប្រកួតរយៈពេល១២ខែ បន្ទាប់ពីលួចប្រើប្រាស់រថយន្ត អំឡុងពេលប្រកួតរយៈចម្ងាយ៨០គីឡូម៉ែត្រ។ នេះបើយោងតាមប្រភពពី CNN ចេញផ្សាយកាលពីថ្ងៃទី១៦ ខែវិច្ឆិកា ឆ្នាំ២០២៣ កន្លងទៅ។
លោកស្រី Joasia Zakrzewski គ្រូពេទ្យវេជ្ជសាស្ត្រ ជនជាតិស្កុតឡែន អាយុ៤៧ឆ្នាំ បានចូលរួមការរត់ព្រឹត្តិការណ៍ម៉ារ៉ាតុងចម្ងាយឆ្ងាយ ឬ អ៊ុលត្រាម៉ារ៉ាតុង GB Ultras ដោយរត់ចេញពីទីក្រុងមេនឆេស្ទ័រ (Manchester) ទៅទីក្រុងលីវើភូល (Liverpool) កាលពីថ្ងៃទី៧ ខែមេសា កន្លងទៅ ដោយបានលួចជិះឡានមិត្តភ័ក្តិរបស់នាង និងបានបញ្ចប់ទីនៅចំណាត់ថ្នាក់លេខ៣ថែមទៀតផង។
នៅក្នុងលិខិតមួយដែលបានដាក់ជូនក្រុមប្រឹក្សាវិន័យឯករាជ្យរបស់ UKA អត្តពលិកជនជាតិស្កុតឡែនរូបនេះ បានលើកឡើងថា «ខ្ញុំទទួលយកសកម្មភាពរបស់ខ្ញុំនៅថ្ងៃប្រកួត ដែលខ្ញុំបានធ្វើដំណើរតាមរថយន្ត ហើយបន្ទាប់មកបានបញ្ចប់ការរត់ ដោយឆ្លងកាត់បន្ទាត់បញ្ចប់ទី ហើយទទួលបានមេដាយ និងពានរង្វាន់ដែលមិនសមរម្យ។ ហើយខ្ញុំមិនបានសារភាពភ្លាមៗ ដូចដែលខ្ញុំគួរធ្វើនោះទេ»។
គណៈកម្មាការបានសម្រេចថា Joasia Zakrzewski នឹងត្រូវបានហាមឃាត់មិនឱ្យចូលរួមក្នុងព្រឹត្តិការណ៍ទាំងអស់ដែលស្ថិតក្រោមយុត្តាធិការរបស់ចក្រភពអង់គ្លេស ឬតំណាងចក្រភពអង់គ្លេសរយៈពេល១២ខែ។ Zakrzewski ក៏ត្រូវបានហាមប្រាមពីការបង្វឹក ការងារពាក់ព័ន្ធ និងការគ្រប់គ្រងក្នុងរយៈពេលដូចគ្នាផងដែរ។
គណៈកម្មាការបានលើកឡើងថា «Zakrzewski គឺជាអត្តពលិកមានបទពិសោធន៍ ប្រកួតប្រជែងដោយជោគជ័យនៅកម្រិតខ្ពស់។ នាងក៏បានដើរតួជាអ្នកចាត់ការក្រុមសម្រាប់ក្រុមអន្តរជាតិ។ ដូចនេះ ត្រូវតែមានទំនួលខុសត្រូវលើការគោរពច្បាប់ ហើយនេះធ្វើឱ្យកាន់តែធ្ងន់ធ្ងរដែលនាងបានបំពានច្បាប់ ហើយមិនបានកែតម្រូវភ្លាមៗ នៅពេលបញ្ចប់ការរត់ ឬក្រោយមកទៀត»។
គួររំលឹកថា បន្ទាប់ពីបញ្ចប់ទី ការតាមដានទិន្នន័យបានរកឃើញភាពមិនប្រក្រតីក្នុងថេរវេលារបស់ Zakrzewski។ ក្រោយមកនាងបានសារភាពប្រាប់ BBC ថា នាងបានវង្វេងនៅពាក់កណ្តាលផ្លូវនៃការប្រកួត ហើយជើងនាងបានឈឺ បន្ទាប់ពីនោះនាងក៏សម្រេចចិត្តឡើងជិះឡានមិត្តម្នាក់ នៅក្នុងគោលបំណងទៅកាន់កន្លែងត្រួតពិនិត្យនៃការប្រកួត ខណៈនៅកន្លែងត្រួតពិនិត្យ នាងត្រូវបានគេបញ្ចុះបញ្ចូលឱ្យរត់បន្ត ហើយនាងក៏យល់ព្រមរត់រហូតដល់ទីតែម្តង។ Zakrzewski បានប្រាប់ BBC នៅក្នុងរបាយការណ៍របស់ក្រុមប្រឹក្សាវិន័យថា នាងមិនដែលមានបំណងលេងល្បិច និងបដិសេធការប្រព្រឹត្តដោយគ្មានសុចរិតភាពនោះទេ៕
ចែករំលែកព័តមាននេះ