រាជធានីភ្នំពេញ ៖ សម្តេចតេជោនាយករដ្ឋមន្ត្រី បានប្រកាសសាជាថ្មីទៀតពីជំហររបស់ប្រទេសកម្ពុជា គឺដាច់ខាតមិនអនុញ្ញាតឱ្យមានជនឬអង្គការនយោបាយបរទេសណាមួយប្រើប្រាស់ទឹកដីកម្ពុជាធ្វើជាមធ្យោបាយ ដើម្បីប្រយុទ្ធតតាំងប្រឆាំងទម្លាក់រដ្ឋាភិបាលប្រទេសណាមួយឡើយ ។ មិនមានការបរិយាយលម្អិតជុំវិញការប្រកាសនេះទេ ។ ជាមួយគ្នានេះសម្តេចក៏បានថ្លែងអំណរគុណចំពោះមន្ត្រីរាជការគ្រប់ជាន់ថ្នាក់ និងប្រជាពលរដ្ឋដែលជួយលើកទឹកចិត្ត និងគាំទ្រដល់សមរភូមិមុខ ព្រមទាំងបានលើកសរសើរ និងវាយតម្លៃខ្ពស់ចំពោះវីរយុទ្ធជនកម្ពុជាក្នុងកាតព្វកិច្ចឈរជើងការពារបូរណភាពទឹកដីក្នុងពេលកន្លងមក ជាពិសេសតទល់សង្គ្រាមឈ្លានពានដែលបង្កឡើងដោយទាហានថៃនៅសមរភូមិភូមិសាស្ត្រខេត្តឧត្តរមានជ័យ ចាប់ពីថ្ងៃទី២២ ខែមេសា ដល់ថ្ងៃទី៣ ខែឧសភា ឆ្នាំ២០១១ កន្លងមកនេះ ។
ការថ្លែងរបស់សម្តេចតេជោនាយករដ្ឋមន្ត្រីដូចខាងលើនេះ គឺស្ថិតក្នុងការអញ្ជើញជាអធិបតីក្នុងសម័យប្រជុំពេញអង្គគណៈរដ្ឋមន្ត្រីនាព្រឹកថ្ងៃទី២០ ឧសភា នៅវិមានសន្តិភាព។
របៀបវារៈក្នុងសម័យប្រជុំមាន ៖ ១-សេចក្តីព្រាងគោលនយោបាយជាតិ សុវត្ថិភាពចរា ចរណ៍ផ្លូវគោក និងសេចក្តីព្រាងផែនការសកម្មភាពជាតិទសវត្ស សុវត្ថិភាព ចរាចរណ៍ផ្លូវគោកឆ្នាំ២០១១-២០២០ ។ ២-សេចក្តីព្រាងអនុក្រឹត្យ ស្តីពីយោធិនជាប់កិច្ចសន្យា និង៣-បញ្ហាផ្សេងៗ ។
ក្រោយពីបានស្តាប់របាយការណ៍ និងមតិពិភាក្សាផ្លាស់ប្តូរយោបល់រួចមក កិច្ចប្រជុំពេញអង្គគណៈរដ្ឋមន្ត្រីបានសម្រេចឱ្យគណៈកម្មាធិការជាតិសុវត្ថិភាពចរាចរណ៍ផ្លូវគោក លើកសេចក្តីព្រាងគោលនយោបាយជាតិ សុវត្ថិភាពចរាចរណ៍ផ្លូវគោក និងសេចក្តីព្រាងផែនការសកម្មភាពជាតិទសវត្សសុវត្ថិភាពចរាចរណ៍ផ្លូវគោកឆ្នាំ២០១១-២០២០ យកទៅធ្វើការកែសម្រួលឱ្យបានកាន់តែមានសុក្រឹតភាព សមស្របតាមតម្រូវការ និងសភាពការណ៍ចរាចរណ៍ដែលមានការវិវឌ្ឍន៍ជាក់ស្តែងថ្មីទៀត នៅក្នុងព្រះរាជាណាចក្រកម្ពុជា ។ កិច្ចប្រជុំពេញអង្គគណៈរដ្ឋមន្ត្រីបានសម្រេចអនុម័តនូវសេចក្តីព្រាងអនុក្រឹត្យ ស្តីពីយោធិនជាប់កិច្ចសន្យា ។
យោងតាមច្បាប់ស្តីពីលក្ខន្តិកៈទូទៅចំពោះយោធិននៃកងយោធពលខេមរភូមិន្ទ ដែលប្រកាសឱ្យប្រើដោយព្រះរាជក្រមលេខ ជស/រកម/១១៩៧/០៥ ចុះថ្ងៃទី៦ ខែវិច្ឆិកា ឆ្នាំ១៩៩៧ សេចក្តីព្រាងអនុក្រឹត្យ ស្តីពីយោធិនជាប់កិច្ចសន្យា ត្រូវបានរៀបចំឡើងដោយក្រសួងការពារជាតិ ក្នុងគោលបំណងបង្កើត និងពង្រឹងមូលដ្ឋានគ្រឹះ នៃប្រភពកម្លាំងនៃកងយោធពលខេមរភូមិន្ទ តាមរយៈនៃការបើកឱកាសប្រជាពលរដ្ឋបានចូលបម្រើការងារដោយស្ម័គ្រចិត្តតាមកិច្ចសន្យានៅក្នុងសេវារដ្ឋបាល ជំនាញ ឯកទេស ជំនាញបច្ចេកទេស និងប្រតិបត្តិការសឹកមួយមានកំណត់ ។ អនុក្រឹត្យនេះមាន៩ជំពូក និង២៦មាត្រា ៕
ចែករំលែកព័តមាននេះ