រាជធានីភ្នំពេញ ៖ ខណ្ឌដង្កោគឺជាខណ្ឌមួយដែលស្ថិតនៅប៉ែកខាងលិចនៃរាជធានីភ្នំពេញនិងជាខណ្ឌមានវិសាលភាពភូមិសាស្ត្រធំធេងជាងគេក្នុងចំណោមខណ្ឌទាំង៨ របស់រាជធានីភ្នំពេញ ព្រោះកាលពីពេលថ្មីៗកន្លងមកនេះ រាជរដ្ឋាភិបាលបានកាត់សង្កាត់ចំនួន១១ចេញពីខេត្តកណ្តាលដាក់បញ្ចូលមកក្រោមការគ្រប់គ្រងរបស់ខណ្ឌដង្កោ
រាជធានីភ្នំពេញ ៖ ខណ្ឌដង្កោគឺជាខណ្ឌមួយដែលស្ថិតនៅប៉ែកខាងលិចនៃរាជធានីភ្នំពេញនិងជាខណ្ឌមានវិសាលភាពភូមិសាស្ត្រធំធេងជាងគេក្នុងចំណោមខណ្ឌទាំង៨ របស់រាជធានីភ្នំពេញ ព្រោះកាលពីពេលថ្មីៗកន្លងមកនេះ រាជរដ្ឋាភិបាលបានកាត់សង្កាត់ចំនួន១១ចេញពីខេត្តកណ្តាលដាក់បញ្ចូលមកក្រោមការគ្រប់គ្រងរបស់ខណ្ឌដង្កោ ។
ពេលនេះរាជរដ្ឋាភិបាលបានចេញអនុក្រឹត្យសម្រេចបំបែកខណ្ឌដង្កោនេះជាពីរ ដោយបង្កើតខណ្ឌថ្មីមួយទៀត ដាក់ឈ្មោះថា «ខណ្ឌពោធិ៍សែនជ័យ» ហើយខណ្ឌថ្មីនេះគ្រប់គ្រងសង្កាត់ចំនួន១៣ ។ ក្នុងនោះរួមមាន១សង្កាត់ ចោមចៅ ២-កាកកាប ៣-ក្រាំងធ្នង់ ៤-គោករកា ៥-សំរោងក្រោម ៦-ពន្សាំង ៧-ត្រពាំងក្រសាំង ៨-ស្នោរ ៩-ឪឡោក ១០-កំបូល ១១-កន្ទោក ១២-បឹងធំ និង១៣-ភ្លើងឆេះរទេះ ។
ចំពោះទីតាំងសាលាខណ្ឌដង្កោ ដែលស្ថិតនៅក្នុងសង្កាត់កាកាប នឹងផ្ទេរមកជាសាលាខណ្ឌពោធិ៍សែនជ័យ ។ ចំណែកទីតាំងសាលាខណ្ឌដង្កោ ត្រូវស្ថិតក្នុងសង្កាត់ដង្កោ ។ ការរៀបចំរចនាសម្ព័ន្ធ និងប្រព័ន្ធគ្រប់គ្រងរដ្ឋបាល ខណ្ឌពោធិ៍សែនជ័យ ត្រូវអនុលោមទៅតាមច្បាប់ស្តីពី ការគ្រប់គ្រងរដ្ឋបាលរាជធានីខេត្ត ក្រុង ស្រុក ខណ្ឌ ។ គួរបញ្ជាក់ផងដែរថា ខណ្ឌដង្កោ កាលពីអតីតមានសង្កាត់ចំនួន១៥សង្កាត់ គឺចោមចៅ, កាកាប, ដង្កោ, ជើងឯក, សំរោងក្រោម,ត្រពាំងក្រសាំង, គោករកា, ក្រាំងថ្នង់, ព្រៃស,ព្រៃវែង, ក្រាំងពង្រ, ប្រទះឡាង, សាក់អំពៅ,ភ្លើងឆេះរទេះ និងពងទឹក ។ លុះដល់ឆ្នាំ២០១០ រាជរដ្ឋាភិបាលបានកាត់សង្កាត់ចំនួន១១ទៀត ពីស្រុកអង្គស្នួល និងស្រុកកណ្តាលស្ទឹង ខេត្តកណ្តាល មកដាក់បញ្ចូលក្នុងខណ្ឌដង្កោទៀត ធ្វើឱ្យខណ្ឌ មួយនេះមានសង្កាត់កើនឡើងដល់ទៅ២៦សង្កាត់ មានវិសាលភាពធំធេងជាងខណ្ឌដទៃទៀត ។
ពេលនេះរាជរដ្ឋាភិបាលបានចេញអនុក្រឹត្យសម្រេចបង្កើតខណ្ឌថ្មីមួយទៀត ដោយបំបែកសង្កាត់ចេញពីខណ្ឌដង្កោចំនួន១៣សង្កាត់ មកក្រោមការគ្រប់គ្រងរបស់ខណ្ឌថ្មីគឺខណ្ឌពោធិ៍សែនជ័យ។ ឯខណ្ឌដង្កោគ្រប់គ្រងសង្កាត់ចំនួន១៣ដែរ ។ ដោយឡែកការគ្រប់គ្រងរដ្ឋបាលនៅពុំទាន់ដឹងថា មានការសម្រេចបែបណានៅឡើយទេ ព្រោះអនុក្រឹត្យទើបតែចេញ ហើយតាមមន្ត្រី នានានិយាយថា នៅរយៈពេលប្រហែលកន្លះខែទៀតទើបមានការប្រកាសអនុក្រឹត្យនេះជាផ្លូវការ៕
ចែករំលែកព័តមាននេះ