ជនសង្ស័យជាជនបរទេសប្រុសស្រីជាង៣០នាក់ ត្រូវបានសមត្ថកិច្ចចុះឡោមព័ទ្ធធ្វើការឃាត់ខ្លួន ដោយជាប់សង្ស័យពាក់ព័ន្ធករណីបង្ខាំ.ង និងជំរិ.តទារប្រាក់ បង្កឱ្យមានការភ្ញាក់ផ្អើល
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យជាជនបរទេសប្រុសស្រីជាង៣០នាក់ ត្រូវបានសមត្ថកិច្ចចុះឡោមព័ទ្ធធ្វើការឃាត់ខ្លួន ដោយជាប់សង្ស័យពាក់ព័ន្ធករណីបង្ខាំ.ង និងជំរិ.តទារប្រាក់ បង្កឱ្យមានការភ្ញាក់ផ្អើលកាលពីវេលាម៉ោង១០និង៤០នាទីយប់ ថ្ងៃទី១៦ ខែវិច្ឆិកា ឆ្នាំ២០២៣ នៅត្រង់ចំណុចផ្ទះល្វែង ជាប់តារាងបាល់ទាត់ឃីង ស្ព័ត តាមបណ្ដោយផ្លូវបុរីអង្គរភ្នំពេញ ស្ថិតក្នុងសង្កាត់ទួលសង្កែទី២ ខណ្ឌឫស្សីកែវ។
តាមប្រភពពីសមត្ថកិច្ច បានប្រាប់ឲ្យដឹងថា ប្រតិបត្តិការនេះ មានសមត្ថកិច្ចអធិការដ្ឋាននគរបាលខណ្ឌឬស្សីកែវ សហការជាមួយការិយាល័យព្រហ្មទណ្ឌកំរិតធ្ងន់ នៃស្នងការដ្ឋាននរគបាលរាជធានីភ្នំពេញ និងសហការជាមួយការិយាល័យជនអន្តោប្រវេសន៍ នៃស្នងការដ្ឋាននរគបាលរាជធានីភ្នំពេញ បានដឹកនាំកម្លាំងចុះឡោមព័ទ្ធផ្ទះល្វែងកើតហេតុមួយកន្លែង និងធ្វើការបង្ក្រាបចាប់ខ្លួនជនសង្ស័យដែលជាជនបរទេសប្រុសស្រីជាង៣០នាក់។
សមត្ថកិច្ចបន្តទៀតថា នៅក្នុងអំឡុងពេលចុះបង្ក្រាបខាងលើនេះ គឺមានជនសង្ស័យជាង១០នាក់ បាននាំគ្នារត់ឡើងទៅលើដំបូលផ្ទះ រួចនាំគ្នាទៅសង្ងំលាក់ខ្លួននៅតាមដំបូលផ្ទះរបស់ប្រជាពលរដ្ឋដែលនៅជិតៗនោះ តែទោះបីជាយ៉ាងណាក៏ដោយ ក៏ត្រូវបានកម្លាំងសមត្ថកិច្ចធ្វើការឃាត់ខ្លួនបានត្រឡប់មកវិញដដែល។
សមត្ថកិច្ចបានបង្ហើបប្រាប់ឲ្យដឹងថា ប្រតិបត្តិការនោះ គឺជាប់ពាក់ព័ន្ធករណីបង្ខាំ.ង និងជំរិ.តទារប្រាក់ ហើយមុននឹងឈានដល់ការចុះបង្ក្រាបនេះ គឺមានជនរងគ្រោះជាជនជាតិខ្មែរ បានធ្វើការនៅកន្លែងកើតហេតុ ដែលនៅទីនោះគឺជាក្រុមហ៊ុនអនឡាញ។ បន្ទាប់មក ជនរងគ្រោះក៏បានស្នើសុំឈប់ពីក្រុមហ៊ុននោះ ប៉ុន្តែខាងក្រុមហ៊ុននោះមិនអនុញ្ញាតឲ្យឈប់នោះទេ ដោយតម្រូវឲ្យជនរងគ្រោះបង់លុយចំនួន២៥០០ដុល្លារឲ្យទៅក្រុមហ៊ុន ទើបខាងក្រុមហ៊ុនអនុញ្ញាតឲ្យឈប់ និងត្រឡប់ទៅផ្ទះវិញ។
សមត្ថកិច្ចបង្ហើមបន្តទៀតថា ជនរងគ្រោះក៏បានទំនាក់ទំនងទៅក្រុមគ្រួសារនៅឯខេត្តស្វាយរៀង និងបានដាក់ទីតាំង (location) អោយក្រុមគ្រួសារ បន្ទាប់មក ក្រុមគ្រួសារជនរងគ្រោះក៏បានឡើងមកភ្នំពេញ និងប្តឹងសមត្ថកិច្ចមូលដ្ឋាន រហូតឈានដល់ការចុះបង្ក្រាបតែម្តង។
បច្ចុប្បន្ន ជនសង្ស័យប្រុសស្រីទាំងជាង៣០នាក់ ត្រូវបានកម្លាំងសមត្ថកិច្ចបញ្ជូនខ្លួនទៅកាន់ស្នងការដ្ឋាននរគបាលរាជធានីភ្នំពេញ ដើម្បីធ្វើការសាកសួរ និងចាត់ការទៅតាមនីតិវិធីនៃច្បាប់ជាបន្តទៀត៕
ចែករំលែកព័តមាននេះ