រាជធានីភ្នំពេញ ៖ បន្ទាប់ពីមានការបង្ហោះនៅលើបណ្ដាញសង្គមពីប្រតិកម្មពីសំណាក់អាណាព្យាបាលសិស្សពីរនាក់ ជុំវិញ កម្លាំងនគរបាលខណ្ឌព្រែកព្នៅ ឃាត់យុវសិស្សពីរនាក់ ឃុំអស់មួយយប់ អត់បាយទឹក ក្រុមព័ត៌មាន និងប្រតិកម្មរហ័ស…
រាជធានីភ្នំពេញ ៖ បន្ទាប់ពីមានការបង្ហោះនៅលើបណ្ដាញសង្គមពីប្រតិកម្មពីសំណាក់អាណាព្យាបាលសិស្សពីរនាក់ ជុំវិញ កម្លាំងនគរបាលខណ្ឌព្រែកព្នៅ ឃាត់យុវសិស្សពីរនាក់ ឃុំអស់មួយយប់ អត់បាយទឹក ក្រុមព័ត៌មាន និងប្រតិកម្មរហ័ស នៃស្នងការនគរបាលរាជធានីភ្នំពេញ បានធ្វើការបំភ្លឺថា ការបង្ហោះផ្សព្វផ្សាយតាមបណ្តាញសារព័ត៌មាន ដែលមានខ្លឹមសារថា «យុវជន០២នាក់ មិនសប្បាយចិត្ត នឹងចំណាត់ការរបស់សមត្ថកិច្ចខណ្ឌព្រែកព្នៅ ដែលបានចោទប្រកាន់លើពួកគេខុសពីការពិត និងអយុត្តិធម៌» ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ សូមជម្រាបជូនសាធារណជនឲ្យបានជ្រាបថា នៅថ្ងៃទី២០ ខែ តុលា ឆ្នាំ២០២៥ វេលាម៉ោង២១និង៣០នាទី លោកវរសេនីយ៍ទោ ញឹម សារ៉ាត់ អធិការរង នៃអធិការដ្នាននគរបាលខណ្ឌព្រែកព្នៅ បានដឹកនាំកម្លាំងជំនាញ សហការជាមួយប៉ុស្តិ៍នគរបាលរដ្ឋបាលទាំង៥ ចេញល្បាតត្រួតពិនិត្យការពារ សន្តិសុខ រក្សាសណ្ដាប់ធ្នាប់ សុវត្ថិភាពសង្គម ជាពិសេសបង្ការទប់ស្កាត់បទល្មើសផ្សេងៗ នៅក្នុងមូលដ្ឋាន។
លុះសមត្ថកិច្ចបានល្បាតដល់ចំណុចផ្លូវបេតុង វិថីអ្នកឧកញ៉ា ឌី ប៉ុក ស្ថិតនៅភូមិកប់ស្រូវតូច សង្កាត់គោករកា ខណ្ឌព្រែកព្នៅ បានឃើញយុវជនចំនួន០២នាក់ ជិះម៉ូតូ០១គ្រឿងម៉ាកស្កូពី ពណ៌សផ្លាកលេខ ភ្នំពេញ 1GM-2866 បំពាក់បំពង់ស៊ីម៉ាំងកែច្នៃខុសបច្ចេកទេស បំពងសំឡេងខ្លាំងៗ បង្កការរំខានដល់ប្រជាពលរដ្ឋ ខណៈនោះ សមត្ថកិច្ចបាននាំយុវជនទាំង០២នាក់ និងមធ្យោបាយម៉ូតូយកមកកាន់អធិការដ្ឋាននគរបាលខណ្ឌព្រែកព្នៅ ជាគោលការណ៍សមត្ថកិច្ចក៏បានធ្វើតេស្តស្វែងរកសារធាតុញៀនក្នុងទឹកនោមរបស់យុវជនទាំង០២នាក់ នៅចំពោះមុខសាមីខ្លួន ជាលទ្ធផលអវិជ្ជមាន (គ្មានសារធាតុញៀន) ។
បន្ទាប់មក នៅថ្ងៃទី២១ ខែតុលា ឆ្នាំ២០២៥ វេលាម៉ោង១០:៣០នាទីព្រឹក សមត្ថកិច្ចបានធ្វើកិច្ចសន្យាអប់រំណែនាំ និងអញ្ជើញអាណាព្យាបាល មកធានាយុវជនទាំង០២នាក់ ឲ្យត្រឡប់ទៅលំនៅឋានវិញ ។ សមត្ថកិច្ចក៏បានណែនាំ ឲ្យយកបំពង់ស៊ីម៊ាំង មកដោះដូរដាក់បំពង់ស៊ីម៊ាំងដើម តាមលក្ខណៈបច្ចេកវិញ ។
ក្រុមការងារប្រតិកម្មរហ័ស នៃស្នងការនគរបាលរាជធានីភ្នំពេញ ក៏បានបញ្ជាក់ថា ចំពោះវិធានការទប់ស្កាត់ម៉ូតូ បំពាក់បំពង់ស៊ីម៉ាំងខុសលក្ខណៈបច្ចេកទេស បង្ករំខានអារម្មណ៍ប្រជាពលរដ្ឋ ខាងលើ គឺសមត្ថកិច្ចអនុវត្តតាមបទបញ្ជាថ្នាក់ដឹកនាំ តាមជំនាញវិជ្ជាជីវៈត្រឹមត្រូវ ហើយសូមធ្វើការបដិសេធ ចំពោះការចោទប្រកាន់ទាំងឡាយណាគ្មានមូលដ្ឋាន និងគ្មានហេតុផលច្បាស់លាស់មកលើសមត្ថកិច្ចដែលបានខិតខំបំពេញភារកិច្ចការពារសន្តិសុខ រក្សាសណ្តាប់ធ្នាប់ សុវត្ថិភាពជូនប្រជាពលរដ្ឋ ៕
ចែករំលែកព័តមាននេះ