ក្រសួងការងារ ស្នើឱ្យរាជរដ្ឋាភិបាលអារ៉ាប៊ីសាអូឌីត ពង្រីកទីផ្សារការងារបន្ថែមទៀត
- ភ្នំពេញ
រាជធានីភ្នំពេញ ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី ១៦ ខែវិច្ឆិកា…
រាជធានីភ្នំពេញ ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី ១៦ ខែវិច្ឆិកា ឆ្នាំ ២០២៣ មកនេះ បានស្នើឱ្យព្រះរាជាណាចក្រអារាប៊ីសាអូឌីត ពង្រីកវិសាលភាពទីផ្សារការងារជាមួយកម្ពុជា ។ នេះ គឺជាការលើកឡើងក្នុងជំនួបផ្លូវការជា មួយឯកឧត្តម Mohammed Ismaeil A. Dahlwy ឯកអគ្គរាជទូតអារាប៊ីសាអូឌីត នៅទីស្តីការ ក្រសួងការងារ និងបណ្តុះបណ្តាលវិជ្ជាជីវៈ ។
ក្នុងជំនួបប្រកបដោយភាពរីករាយ ឯកឧត្តមរដ្ឋមន្ត្រី បានបញ្ជាក់ថា ការពង្រីកទីផ្សារ ការងារពីវិស័យអតិពលកម្មទៅវិស័យដែលប្រើប្រាស់កម្លាំងជំនាញ នឹងមានភាពទាក់ទាញ សម្រាប់ពលរដ្ឋកម្ពុជាជាង ។
ជាការឆ្លើយតប ឯកអគ្គរាជទូតអារាប៊ីសាអូឌីត បានទទួលយកសំណើររបស់ឯកឧត្តម រដ្ឋមន្ត្រី ហើយថា នឹងបញ្ជូនសំណើរនេះទៅកាន់រដ្ឋាភិបាលរបស់ខ្លួនដើម្បីពិចារណា និងសម្រេច ។
សូមបញ្ជាក់ថា ក្រៅពីបញ្ហាសំខាន់ខាងលើ ភាគីទាំងពីរ ក៏បានពិភាក្សាពីទំនាក់ទំនង រវាងប្រទេសទាំងពីរដែលកាន់តែស្អិតល្មួត និងរីកចម្រើនបន្តទៀត បន្ទាប់ពីព្រះរាជាណាចក្រ ទាំងពីរ បានចុះអនុស្សរណៈយោគយល់គ្នាលើការបញ្ជូនពលករបម្រើការងារតាមផ្ទះកាលពី ឆ្នាំ ២០១៦ ។
ក្នុងជំនួបពិភាក្សាប្រកបដោយភាពរីករាយ ឯកឧត្តមរដ្ឋមន្ត្រី បានថ្លែងអំណរគុណដល់ រាជរដ្ឋាភិបាលអារាប៊ីសាអូឌីត ដែលបានមើលថែរក្សាពលរដ្ឋកម្ពុជាដែលកំពុងបម្រើការងារ នៅទឹកដីអារ៉ាប៊ីសាអូឌីតផងដែរ ។
ទោះជាយ៉ាងណាក៏ដោយ មុននឹងបញ្ចប់ភាគីទាំងពីរបានប្តេជ្ញាជំរុញទំនាក់ទំនងប្រទេសទាំងពីរលើវិស័យការងារឱ្យកាន់តែស្អិតល្មួតបន្ថែមទៀត តាមរយៈទំនាក់ទំនងរវាង ប្រជាជន និងប្រជាជន ៕ អត្ថបទសហការ
ចែករំលែកព័តមាននេះ