ក្រុមហ៊ុនបច្ចេកវិទ្យាខ្នាតយក្សអាមេរិក៣ នឹងវិនិយោគជាង៨ពាន់លានដុល្លារនៅថៃ
ថៃ ៖ អ្នកនាំពាក្យរដ្ឋាភិបាលថៃ បានថ្លែងថា ប្រទេសថៃនឹងទទួលបានការវិនិយោគលើទំហំទឹកប្រាក់
ថៃ ៖ អ្នកនាំពាក្យរដ្ឋាភិបាលថៃ បានថ្លែងថា ប្រទេសថៃនឹងទទួលបានការវិនិយោគលើទំហំទឹកប្រាក់ ៣០០ពាន់លានបាត ដែលស្មើនឹង ៨.៥ពាន់លានដុល្លារអាមេរិកពីក្រុមហ៊ុនបច្ចេកវិទ្យាខ្នាតយក្សរបស់សហរដ្ឋអាមេរិក ៣ រួមមាន Amazon Web Services (AWS), Google និង Microsoft ដោយក្នុង១ក្រុមហ៊ុនវិនិយោគលើទឹកប្រាក់១០០ពាន់លានបាត។
យោងតាមប្រភពចេញពីបាងកកប៉ុស្ត៍ ចេញផ្សាយនៅថ្ងៃទី១៦ ខែវិច្ឆិកា បានឱ្យដឹងថា លោក Chai Wacharonke អ្នកនាំពាក្យរដ្ឋាភិបាលថៃ បានបញ្ជាក់ថា នាយករដ្ឋមន្ត្រីថៃ លោក ស្រេតថា ថាវីស៊ីន (Srettha Thavisin) បានជួបជាមួយនាយកប្រតិបត្តិក្រុមហ៊ុនបច្ចេកវិទ្យាខ្នាតយក្សអាមេរិកទាំង ៣ អំឡុងពេលទស្សនកិច្ចរបស់លោកនៅសហរដ្ឋអាមេរិក ហើយទទួលបានជោគជ័យក្នុងការទាក់ទាញសម្រាប់ការវិនិយោគនៅប្រទេសថៃ។
រដ្ឋាភិបាលថៃ បានប្រកាសក្នុងសេចក្តីថ្លែងការណ៍ដាច់ដោយឡែកមួយថា Amazon គ្រោងនឹងសាងសង់មជ្ឈមណ្ឌលទិន្នន័យមួយ ដែលមានថវិកាចំនួន ៥ពាន់លានដុល្លារនៅក្នុងរយៈពេល១៥ឆ្នាំ។
លោក Chai Wacharonke បានថ្លែងថា «លោកនាយករដ្ឋមន្ត្រីថៃមានទំនុកចិត្តថា ការវិនិយោគរបស់ Amazon នឹងលើកកម្ពស់ការប្រកួតប្រជែងរបស់ប្រទេសថៃ ហើយក្រុមហ៊ុន Microsoft និង Google ក៏កំពុងតែសិក្សាលើផែនការវិនិយោគសម្រាប់មជ្ឈមណ្ឌលទិន្នន័យដ៏ធំរបស់ខ្លួន នៅក្នុងប្រទេសថៃផងដែរ»។
ដោយស្រង់សំដីលោកនាយករដ្ឋមន្ត្រីថៃ បានមានប្រសាសន៍ថា ទីតាំងភូមិសាស្ត្រ ការត្រៀមលក្ខណៈហេដ្ឋារចនាសម្ព័ន្ធ និងប្រព័ន្ធសុខាភិបាល និងការអប់រំសាធារណៈរបស់ប្រទេសថៃ បានធ្វើឱ្យប្រទេសនៅតំបន់អាស៊ីអាគ្នេយ៏មួយនេះ ទាក់ទាញបណ្តាអ្នកវិនិយោគអន្តរជាតិ។
នៅដើមសប្តាហ៍នេះ ក្រុមប្រឹក្សាវិនិយោគប្រទេសថៃ (BoI) អះអាងថា ការវិនិយោគរបស់ក្រុមហ៊ុន Amazon នឹងផ្តោតលើការបង្កើតមជ្ឈមណ្ឌលទិន្នន័យចំនួន៣នៅក្នុងដំណាក់កាលដំបូង។ ក្រុមប្រឹក្សាដដែលនេះបន្ថែមថា នាយករដ្ឋមន្ត្រីថៃ ក៏កំពុងសម្លឹងមើលជាមុន ដើម្បីលើកទឹកចិត្តក្រុមហ៊ុន Google និង Microsoft សម្រាប់ការបង្កើតមជ្ឈមណ្ឌលទិន្នន័យ និងមូលដ្ឋានសេវាកម្មនៅក្នុងប្រទេសថៃផងដែរ៕ (ដកស្រង់ចេញពីបាងកកប៉ុស្ត៍ និង Reuters)
ចែករំលែកព័តមាននេះ