ជនជាតិចិនប្រុសស្រីចំនួន៥នាក់បានរងរបួសធ្ងន់-ស្រាល បន្ទាប់ពីបើករថយន្តទៅបុ.កក្បាលនាគពុះចែកទ្រូងផ្លូវ នៅចំណុចស្តុបក្តាន់ពីរ បង្កឱ្យមានការភ្ញាក់ផ្អើលដល់ពលរដ្ឋនាំគ្នាហៅរថយន្តសង្គ្រោះបន្ទាន់
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនជាតិចិនប្រុសស្រីចំនួន៥នាក់បានរងរបួសធ្ងន់-ស្រាល បន្ទាប់ពីបើករថយន្តទៅបុ.កក្បាលនាគពុះចែកទ្រូងផ្លូវ នៅចំណុចស្តុបក្តាន់ពីរ បង្កឱ្យមានការភ្ញាក់ផ្អើលដល់ពលរដ្ឋនាំគ្នាហៅរថយន្តសង្គ្រោះបន្ទាន់ កាលពីវេលាម៉ោង១២និង១៥នាទីរំលងអធ្រាត្រឈានចូលថ្ងៃទី១៦ ខែវិច្ឆិកា ឆ្នាំ២០២៣ នៅចំណុចស្តុបក្តាន់២ មហាវិថីសហព័ន្ធរុស្ស៊ី ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
យោងតាមប្រភពព័ត៌មានពីកន្លែងកើតហេតុ បានប្រាប់ឲ្យដឹងថា គេបានឃើញរថយន្តស៊េរីទំនើប១គ្រឿងម៉ាក ហុងឈី ពណ៌ខ្មៅ ពាក់ស្លាកលេខ កម្ពុជាZ.Y-L128 ក្នុងនោះមានមនុស្សប្រុសស្រីចំនួន៥នាក់ ជាជនជាតិចិន បើកបរក្នុងល្បឿនលឿនដូចហោះបោះពួយតាមបណ្តោយមហាវិថីសហព័ន្ធរុស្ស៊ី ទិសដៅពីកើតទៅលិច រួចក៏ជ្រុលទៅបុ.កក្បាលនាគពុះចែកទ្រូងផ្លូវពេញទំហឹង បណ្តាលឲ្យមនុស្សនៅក្នុងរថយន្តរងរបួសធ្ងន់-ស្រាលទាំង៥នាក់តែម្ដង។
ពាក់ព័ន្ធក្នុងករណីគ្រោះថ្នាក់ចរាចរណ៍ខាងលើនេះដែរ គេឃើញក្បាលរថយន្តមួយកំណាត់មុខ បានរងការខូចខាតដោយសារការបុ.កផ្ទប់ និងមានផ្ទុះពោងការពារសុវត្ថិភាព ចំណែកក្បាលនាគពុះចែកទ្រូងផ្លូវវិញ ក៏រងការខូចខាតផងដែរ។ បន្ទាប់ពីបុ.ករួច ជនរងគ្រោះត្រូវបានរថយន្តសង្គ្រោះបន្ទាន់ដឹកទៅមន្ទីរពេទ្យភ្លាមៗដែរ។
ក្រោយពេលកើតហេតុ សមត្ថកិច្ចមូលដ្ឋានបានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង និងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំម្ចាស់រថយន្តចូលខ្លួនទៅដោះស្រាយតាមនីតិវិធីនៅពេលក្រោយ៕
ចែករំលែកព័តមាននេះ