ខេត្តសៀមរាប ៖ សមត្ថកិច្ចបានចាប់ផ្ដើមបើកការត្រួតពិនិត្យយ៉ាងតឹងរ៉ឹងទៅលើឱសថស្ថាន និងកន្លែងពិគ្រោះជម្ងឺនានាក្នុងក្រុងសៀមរាប ដែលលួចបន្លំដាក់តាំងលក់់ឱសថហួសកាលកំណត់ និងពុំមានបិទតែមអនុញ្ញាតពីក្រសួងសុខាភិបាលនាំឱ្យប៉ះពាល់យ៉ាងធ្ងន់ធ្ងរដល់សុខភាពអ្នកប្រើប្រាស់។ កាលពីព្រឹកថ្ងៃទី២០ ឧសភា ប៉ូលិសការិយាល័យប្រឆាំងបទល្មើសសេដ្ឋកិច្ចខេត្ដសៀមរាប
ខេត្តសៀមរាប ៖ សមត្ថកិច្ចបានចាប់ផ្ដើមបើកការត្រួតពិនិត្យយ៉ាងតឹងរ៉ឹងទៅលើឱសថស្ថាន និងកន្លែងពិគ្រោះជម្ងឺនានាក្នុងក្រុងសៀមរាប ដែលលួចបន្លំដាក់តាំងលក់់ឱសថហួសកាលកំណត់ និងពុំមានបិទតែមអនុញ្ញាតពីក្រសួងសុខាភិបាលនាំឱ្យប៉ះពាល់យ៉ាងធ្ងន់ធ្ងរដល់សុខភាពអ្នកប្រើប្រាស់។
កាលពីព្រឹកថ្ងៃទី២០ ឧសភា ប៉ូលិសការិយាល័យប្រឆាំងបទល្មើសសេដ្ឋកិច្ចខេត្ដសៀមរាបសហការជាមួយមន្ដ្រីជំនាញមន្ទីរសុខាភិបាលខេត្ដបើកយុទ្ធនាការឆ្មក់ចូលត្រួតពិនិត្យឱសថស្ថានយីហោ «សេរីភាព» របស់លោក សៅ យូគុណ និងកន្លែងពិគ្រោះជំងឺយីហោ «ច្រាំង សេងត្រាយ» របស់លោកវេជ្ជបណ្ឌិតច្រាំង សេងត្រាយ ដែលជាបុគ្គលិកបំរើការនៅមន្ទីរពេទ្យកុមារអង្គរ ។ កន្លែងទាំងពីរនេះស្ថិតនៅក្បែរគ្នាក្នុងភូមិដកពោធិ៍ សង្កាត់ស្លក្រាមកណ្ដាលក្រុងទេសចរណ៍សៀមរាបទល់មុខផ្សារលើធំថ្មី ។
សមត្ថកិច្ចរកឃើញឱសថហួសកំណត់ប្រើប្រាស់ និងឱសថមិនមានបិទតែមអនុញ្ញាតពីក្រសួងសុខាភិបាលប្រមាណ២៥ប្រភេទ ហើយសម្រេចបិទជាបណ្ដោះអាសន្នកន្លែងពិគ្រោះជម្ងឺយីហោច្រាំង សេងត្រាយ ខណៈឱសថស្ថានយីហោសេរីភាពឱ្យធ្វើកិច្ចសន្យាព្រមាន។
ព្រះរាជអាជា្ញរងអមសាលាដំបូងខេត្ដសៀមរាប លោកជួន សុបញ្ញា ដែលបានទៅដល់កន្លែងត្រួតពិនិត្យកាលពីព្រឹកថ្ងៃទី២០ ឧសភាមានប្រសាសន៍ថា «យើងបានសម្រេចបិទជាបណ្ដោះអាសន្នកន្លែងពិគ្រោះជំងឺរបស់លោកវេជ្ជបណ្ឌិតច្រាំង សេងត្រាយ ដោយយោងទៅតាមភស្ដុតាងគ្រប់គ្រាន់ គឺសមត្ថកិច្ចបានរកឃើញមានដាក់តាំងលក់ឱសថរួមគ្នាជាមួយសេវាកម្មពិគ្រោះជម្ងឺ ជាពិសេសនៅក្នុងនោះក៏មានដាក់លក់ឱសថហួសកំណត់ប្រើប្រាស់ និងពុំមានបិទតែមអនុញ្ញាតត្រឹមត្រូវពីក្រសួងសុខាភិបាល នាំឱ្យប៉ះពាល់ដល់សុខភាពប្រជាពលរដ្ឋប្រើប្រាស់ ។ ករណីទាំងហ្នឹងគឺជាបទល្មើសព្រហ្មទណ្ឌ ដូច្នេះវាគ្រប់គ្រាន់ក្នុងការបិទទ្វារកន្លែងនោះ ដើម្បីបើកការស៊ើបអង្កេត» ។
លោកបន្ដថា «ករណីនេះបើនិយាយពីច្បាប់ គឺវេជ្ជបណ្ឌិតច្រាំង សេងត្រាយ ពិបាកគេចផុតពីការចោទប្រកាន់ណាស់ ពីព្រោះមានភាស្ដុតាងដាក់បន្ទុកគ្រប់គ្រាន់ ណាមួយរូបគាត់មានឋានៈដល់ទៅជាវេជ្ជបណ្ឌិតបានរៀនពីក្រមសីលធម៌វិជ្ជាជីវៈគ្រូពេទ្យត្រឹមត្រូវ និងដឹងច្បាប់ហើយប្រព្រឹត្តខុសច្បាប់ដើម្បីប្រយោជន៍លក់ថ្នាំហួសកំណត់ទៅឱ្យអ្នកជំងឺរបស់ខ្លួនដោយមិនខ្វល់ពីការខាតបង់លុយកាក់ និងប៉ះពាល់ដល់សុខភាពប្រជាពលរដ្ឋ»។
លោកវរសេនីយ៍ទោសឿន សេន ប្រធានការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ដដែលបានដឹកនាំកម្លាំងបើកប្រតិបត្ដិការនោះប្រាប់ថា យុទ្ធនាការប្រកបដោយជោគជ័យនេះធ្វើឡើងក្រោមការចង្អុលបង្ហាញពីលោកឧត្ដមសេនីយ៍ត្រីសត ណាឌី ស្នងការនគរបាលខេត្ដសៀមរាបឱ្យបង្ក្រាបរាល់ឱសថស្ថាន និងកន្លែងពិគ្រោះជម្ងឺទាំងឡាយណាដែលមានដាក់លក់ឱសថហួសកំណត់ឱ្យប្រើប្រាស់ និងគ្មានចុះបញ្ជិកាត្រឹមត្រូវ ។ យើងបានបើកយុទ្ធនាការជាក់ស្ដែង ដោយសហការជាមួយមន្ដ្រីជំនាញមន្ទីរសុខាភិបាលខេត្ដចុះឆែកឆេរទៅលើឱសថស្ថាន និងកន្លែងពិគ្រោះជំងឺទាំងពីរនោះ ហើយបានរកឃើញអ្វីដែលបានសង្ស័យមែន ។
លោកបន្ដទៀតថា យើងបានដឹងថា នៅក្នុងខេត្ដសៀមរាបទាំងមូលមានឱសថស្ថាន និងកន្លែងពិគ្រោះជំងឺរាប់សិបកន្លែង ហើយមានការសង្ស័យពាក់ពន្ធ័ទៅនឹងការប្រព្រឹត្តកំហុសឆ្គងដូចគ្នាដែលទាមទារឱ្យកម្លាំងលោកប្ដេជា្ញខ្ពស់ក្នុងការបង្ក្រាបដូចភ្លៀងរលឹម ដើម្បីបញ្ចៀសឱ្យបាននូវការខាតបង់ថវិកា និងប៉ះពាល់ដល់សុខភាពប្រជាពលរដ្ឋស្លូតត្រង់ដែលទិញថ្នាំទាំងអស់នោះយកទៅប្រើប្រាស់ ។
ប្រធានការិយាល័យឱសថនៃមន្ទីរសុខាភិបាលខេត្ដសៀមរាប លោកស្រីលី វណ្ណៈ ដែលបានចូលរួមក្នុងប្រតិបត្ដិការបង្ក្រាបនោះថ្លែងប្រាប់ថា នៅក្នុងយុទ្ធនាការឆែកឆេរទៅលើឱសថស្ថានសេរីភាព និងកន្លែងពិគ្រោះជំងឺច្រាំង សេងត្រាយយើងរឹបអូសបានឱសថមិនប្រក្រតីចំនួន២៥ប្រភេទមានចំនួនរាប់សិបគ្រាប់សម្រាប់យកទៅកំទេចចោល ។ ការឆែកឆេរទៅលើឱសថស្ថានសេរីភាពយើងបានរកឃើញឱសថអត់បិទលតាប័ត្រចំនួន៤មុខ និងឱសថហួសកាលកំណត់ប្រើចំនួន១១មុខ ។ ដោយឡែកនៅកន្លែងពិគ្រោះជំងឺរបស់វេជ្ជបណ្ឌិត ច្រាំង សេងត្រាយ ដែលនៅក្បែរគ្នានោះយើងបានរឹបអូសឱសថហួសកាលកំណត់ឱ្យប្រើប្រាស់ចំនួន១០ មុខ និងឱសថអត់បិទលតាប័ត្រចំនួន១៥មុខ។
លោកស្រីបានបន្ដទៀតថា យើងដឹងថា វានៅមានឱសថមិនប្រក្រតីជាច្រើនប្រភេទទៀតដែលលួចបន្លំដាក់លក់នៅក្នុងឱសថស្ថាន និងកន្លែងពិគ្រោះជំងឺច្រើនសន្ធឹកសន្ធាប់ទៀតនៅក្នុងខេត្ដសៀមរាប ដូច្នេះការបង្ក្រាបជំហានដំបូងនេះសង្ឃឹមថា វានឹងក្លាយជាសារដ៏សំខាន់មួយបង្អើលដល់អ្នកកំពុងប្រព្រឹត្តកំហុសឆ្គងឱ្យបញ្ឈប់ជាបន្ទាន់ចៀសវាងការបង្ក្រាប និងផាកពិន័យធ្ងន់ធ្ងរ ។ ចំណែកលោកសៅ យូគុណ ម្ចាស់ឱសថស្ថានសេរីភាពបានទទួលស្គាល់ថា នេះពិតជាកំហុសឆ្គងរបស់លោកដែលខ្វះការប្រុង
ប្រយត្ន័មិនរើសឱសថមិនប្រក្រតីចេញ មកពីថ្នាំមានចំនួនច្រើនពេក ។ លោកបន្តថា គ្មានអ្នកណាចង់ឱ្យខូចឈ្មោះកន្លែងរកស៊ីទេ ម្យ៉ាងទៀតថ្នាំដែលហួសកាលបរិច្ឆេទប្រើប្រាស់លោកមិនខាតបង់ទេ ព្រោះខាងក្រុមហ៊ុនធំធានាដូរឱ្យវិញ តែនេះជាកំហុសឆ្គងមួយ។
នៅវេលាថ្ងៃត្រង់ថ្ងៃដដែលនោះ លោកវេជ្ជបណ្ឌិតច្រាំង សេងត្រាយ យើងមិនអាចជួប ដើម្បីសុំការពន្យល់ពីករណីដែលសមត្ថកិច្ចបិទកន្លែងរបស់លោកទេ ដោយសាច់ញាតិលោកប្រាប់ថា លោករវល់ទៅបម្រើការនៅមន្ទីរពេទ្យកុមារអង្គរ ។ លោកវរសេនីយ៍ទោសឿន សេន ប្រធានការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ដថ្លែងថា សម្រាប់ឱសថស្ថានសេរីភាព វាជាលើកដំបូងយើងគ្រាន់តែដកហូតថ្នាំមិនប្រក្រតីយកទៅកំទេចចោល និងឱ្យធ្វើកិច្ចសន្យាកុំឱ្យមានថ្ងៃក្រោយប៉ុណ្ណោះ ចំណែកកន្លែងពិគ្រោះជំងឺច្រាំង សេងត្រាយ យើងធ្វើទៅតាមច្បាប់ ព្រោះខាងមន្ទីរជំនាញធ្លាប់បានឱ្យធ្វើកិច្ចសន្យាម្ដងហើយនៅតែបំពាន ៕
ចែករំលែកព័តមាននេះ