ខេត្តបាត់ដំបង ៖ ល្បែងឡូតូរបស់ក្រុមហ៊ុនដែលមានលេខសម្គាល់ «៨៨៨៨» ចំនួន០៥កន្លែង ត្រូវបានកម្លាំងអធិការក្រុងបាត់ដំបង ចុះបិទជាបណ្ដោះអាសន្ន កាលពីប៉ុន្មានកន្លងទៅនេះ ដោយសារតែក្រុមហ៊ុន «ឡូតូ»នេះ…
ខេត្តបាត់ដំបង ៖ ល្បែងឡូតូរបស់ក្រុមហ៊ុនដែលមានលេខសម្គាល់ «៨៨៨៨» ចំនួន០៥កន្លែង ត្រូវបានកម្លាំងអធិការក្រុងបាត់ដំបង ចុះបិទជាបណ្ដោះអាសន្ន កាលពីប៉ុន្មានកន្លងទៅនេះ ដោយសារតែក្រុមហ៊ុន «ឡូតូ»នេះ បានបង្ហាញច្បាប់ ឬអាជ្ញាប័ណ្ណមិនច្បាស់លាស់ តែទុកពេលឲ្យម្ចាស់ឡូតូនេះរៀបចំច្បាប់ឬអាជ្ញាប័ណ្ណឲ្យបានត្រិមត្រូវ។
អធិការក្រុងបាត់ដំបង លោក ពេជ្រ សារ៉ែន បានប្រាប់កោះសន្តិភាពតាមទូរស័ព្ទនៅព្រឹកថ្ងៃទី ១៥ វិច្ឆិកា ថា លោកបានបញ្ជាឲ្យកម្លាំងមូលដ្ឋាន គ្រប់ប៉ុស្ដិ៍រដ្ឋបាលចុះត្រូតពិនិត្យលើក្រុមហ៊ុនឡូតូ ដែលមានសញ្ញាសម្គាល់ «៨៨៨៨» នេះ ពាក់ព័ន្ធនឹងច្បាប់ និងអាជ្ញាប័ណ្ណធ្វើអាជីវកម្ម ។
លោកអធិការបានបន្តថា អ្នកគ្រប់គ្រងបានបង្ហាញច្បាប់ និងអាជ្ញាប័ណ្ណ តែរាល់ឯកសារទាំងនោះហាក់មិនមានភាពច្បាស់លាល់ ទើបលោកបញ្ជាឲ្យក្រុមហ៊ុន «៨៨៨៨» នេះ បិទអាជីវកម្មរបស់ខ្លួនជាបណ្ដោះអាសន្នសិន ដើម្បីឲ្យអ្នកគ្រប់គ្រងរៀបចំបង្ហាញឯកសារ និងអាជ្ញាប័ណ្ណត្រឹមត្រូវ ។
លោក ពេជ្រ សារ៉ែន បានបញ្ជាក់ថា ទីតាំងឡូតូរបស់ក្រុមហ៊ុន «៨៨៨៨» នេះ ប្រមាណ០៥កន្លែង ដែលមាននៅក្នុងក្រុងបាត់ដំបងត្រូវបានបិទ ។ ប៉ុន្តែក្រុមហ៊ុននេះ មិនមានបើកមាន់ជល់តាមអនឡាញទេ មានតែល្បែងឡូតូប៉ុណ្ណោះ ។ ជាមួយនឹងការបិទល្បែងឡូតូ ដែលមានលេខសម្គាល់«៨៨៨៨» នៅក្នុងក្រុងបាត់ដំបងនេះ បើតាមប្រភពព័ត៌មាន ដែលកោះសន្តិភាពទទួលបាននៅព្រឹកថ្ងៃទី១៥ វិច្ឆកា នេះ ដែរ បានបង្ហើបឲ្យដឹងថា ក្រោយកម្លាំងអធិការក្រុងចំបិទទីតាំងនៅក្នុងក្រុង គេឃើញក្រុមហ៊ុនឡូតូ «៨៨៨៨» នេះ បានគេចទៅបើកនៅតាមហាងគុយទាវ ឬហាងកាហ្វេ នៅស្រុកសង្កែយ៉ាងគ្រហឺៗ ។
យ៉ាងណា កោះសន្តិភាព មិនទាន់អាចទំនាក់ទំនង សុំការបំភ្លឺពីអ្នកគ្រប់គ្រងល្បែងឡូតូ ដែលសមត្ថកិច្ចបានបិទដំណើរការខាងលើនេះបានទេ រហូតមកដល់ម៉ោងផ្សាយនេះ ។ ដោយឡែក លោក ពេជ្រ សារ៉ែន អធិការក្រុង ក៏បានបញ្ជាក់ដែរថា ចាប់តាំងពីថ្ងៃកម្លាំងរបស់លោកចុះបិទ រហូតដល់ពេលនេះ មិនទាន់ឃើញតំណាងណាម្នាក់របស់ក្រុមហ៊ុនឡូតូនេះ ចេញមុខដោះស្រាយ ឬ បង្ហាញឯកសារជាថ្មីនោះទេ។
មានព័ត៌មានបន្ថែម កោះសន្តិភាពមានផ្សាយជូនបន្ត ។
ចែករំលែកព័តមាននេះ