រាជធានីភ្នំពេញ ៖ សម័យប្រជុំពេញអង្គគណៈរដ្ឋមន្ត្រីក្រោមអធិបតីភាពសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី បានចាប់ផ្តើមឡើងកាលពីវេលាម៉ោង៨និង៣០នាទីព្រឹក ថ្ងៃទី២០ ឧសភា ២០១១ នៅទីស្តីការគណៈរដ្ឋមន្ត្រីដែលមានរបៀបវារៈដូចខាងក្រោម ៖
រាជធានីភ្នំពេញ ៖ សម័យប្រជុំពេញអង្គគណៈរដ្ឋមន្ត្រីក្រោមអធិបតីភាពសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រី បានចាប់ផ្តើមឡើងកាលពីវេលាម៉ោង៨និង៣០នាទីព្រឹក ថ្ងៃទី២០ ឧសភា ២០១១ នៅទីស្តីការគណៈរដ្ឋមន្ត្រីដែលមានរបៀបវារៈដូចខាងក្រោម ៖
១-សេចក្តីព្រាងគោលនយោបាយជាតិ សុវត្ថិភាពចរាចរណ៍ផ្លូវគោក និងសេចក្តីព្រាងផែនការសកម្មភាពជាតិទសវត្សរ៍ សុវត្ថិភាពចរាចរណ៍ផ្លូវគោកឆ្នាំ២០១១-២០២០។
២-សេចក្តីព្រាងអនុក្រឹត្យស្តីពីយោធិនជាប់កិច្ចសន្យា។
៣-បញ្ហាផ្សេងៗ។
ក្រោយពីបានស្តាប់របាយការណ៍ និងមតិពិភាក្សាផ្លាស់ប្តូរយោបល់រួចមក កិច្ចប្រជុំពេញអង្គគណៈរដ្ឋមន្ត្រីបានសម្រេចឱ្យគណៈកម្មាធិការជាតិសុវត្ថិភាពចរាចរណ៍ផ្លូវគោកលើក សេចក្តីព្រាងគោលនយោបាយជាតិ សុវត្ថិភាពចរាចរណ៍ផ្លូវគោក និងសេចក្តីព្រាងផែនការសកម្មភាពជាតិទសវត្សរ៍ សុវត្ថិភាព ចរាចរណ៍ផ្លូវគោកឆ្នាំ២០១១-២០២០ យកទៅធ្វើការកែសម្រួលឱ្យកាន់តែមានសុក្រឹតភាព សមស្របតាមតម្រូវការ និងសភាពការណ៍ចរាចរណ៍ដែលមានការវិវឌ្ឍន៍ជាក់ស្តែងថ្មីទៀត នៅក្នុងព្រះរាជាណាចក្រកម្ពុជា។
កិច្ចប្រជុំពេញអង្គគណៈរដ្ឋមន្ត្រីបានសម្រេចអនុម័តនូវ ៖
-សេចក្តីព្រាងអនុក្រឹត្យ ស្តីពីយោធិនជាប់កិច្ចសន្យា ៖ យោងតាមច្បាប់ស្តីពីលក្ខន្តិកៈទូទៅចំពោះយោធិននៃកងយោធពលខេមរភូមិន្ទដែលប្រកាសឱ្យប្រើដោយព្រះរាជក្រមលេខ ជស/រកម/១១៩៧/០៥ ចុះថ្ងៃទី៦ វិច្ឆិកា ១៩៩៧ សេចក្តីព្រាងអនុក្រឹត្យ ស្តីពីយោធិនជាប់កិច្ចសន្យាត្រូវបានរៀបចំឡើងដោយក្រសួងការពារជាតិក្នុងគោលបំណងបង្កើត និងពង្រឹងមូលដ្ឋានគ្រឹះនៃប្រភពកម្លាំងនៃកងយោធពលខេមរភូមិន្ទ តាមរយៈនៃការបើកឱកាសប្រជាពលរដ្ឋបានចូលបម្រើការងារដោយស្ម័គ្រចិត្តតាមកិច្ចសន្យានៅក្នុងសេវារដ្ឋបាល ជំនាញឯកទេស ជំនាញបច្ចេកទេស និងប្រតិបត្តិការសឹកក្នុងរយៈពេលមួយមានកំណត់ ។ អនុក្រឹត្យនេះមាន៩ជំពូក និង២៦មាត្រា។
-បញ្ហាផ្សេងៗ
-សម្តេចអគ្គមហាសេនាបតីតេជោហ៊ុន សែន បានថ្លែងអំណរគុណចំពោះមន្ត្រីរាជការគ្រប់ ជាន់ថ្នាក់ និងប្រជាពលរដ្ឋដែលជួយលើកទឹកចិត្តនិងគាំទ្រដល់សមរភូមិមុខ ព្រមទាំងបានលើកសរសើរ និងវាយតម្លៃខ្ពស់ចំពោះវីរយុទ្ធជនកម្ពុជា ក្នុងកាតព្វកិច្ចឈរជើងការពារបូរណភាពទឹកដីក្នុងរយៈពេលកន្លងមក ជាពិសេសតទល់សង្គ្រាមឈ្លានពានដែលបង្កឡើងដោយទាហានថៃនៅសមរភូមិ ភូមិសាស្ត្រខេត្តឧត្តរមានជ័យចាប់ពីថ្ងៃទី២២ មេសា ដល់ថ្ងៃទី៣ ឧសភា ២០១១ កន្លងមកនេះ ។
-សម្តេចតេជោនាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសសាជាថ្មីទៀតគឺដាច់ខាតមិនអនុញ្ញាតឱ្យមានជន ឬអង្គការនយោបាយបរទេសណាមួយប្រើប្រាស់ទឹកដីកម្ពុជា ធ្វើជាមធ្យោបាយ ដើម្បីប្រយុទ្ធតតាំងប្រឆាំងទម្លាក់រដ្ឋាភិបាលប្រទេសណាមួយឡើយ។ អង្គប្រជុំគណៈរដ្ឋមន្ត្រីបានបិទសម័យប្រជុំនៅវេលាម៉ោង១២៕
ចែករំលែកព័តមាននេះ