ADផ្ទាំងផ្សព្វផ្សាយពាណិជ្ជកម្ម

Picture

ពួក​ឧទ្ទាម​ភូមា​ដាក់​ផែន​ការ​វា.យ​យក​តំបន់​កៀក​ព្រំ​ដែន​ប្រទេស​ឥណ្ឌា

3 អាទិត្យ មុន

យ៉ាន់ហ្កន៖ ​​ពួក​ឧទ្ទាម​ដែល​ប្រឆាំង​នឹង​របប​យោធា​ភូមា​នៅ​រដ្ឋ​ឈីន (Chin)​ ដាក់​ផែន​ការ​​​វាយ​ផ្ដាច់​ព្រ័ត្រ​​យក​តំបន់​ព្រំ​ដែន​ជាប់​នឹង​ប្រទេស​ឥណ្ឌា​បន្ទាប់​ពី​ពួក​គេ​​​​វាយ​​យក​បាន​​ទី​តាំង​​យោធា​២​កន្លែង​នៅ​​តំបន់​​ភ្នំ​ដាច់​ស្រយាល​​។ ខាងលើ​នេះ​ជា​ការ​អះអាង​របស់​មេ​បញ្ជា​ការ​ពួក​ឧទ្ទាម​។ ​ពួក​គេ​​រាប់​សិប​នាក់​​ចាប់​ផ្ដើម​​​បាញ់​ប្រហារ​​តាំង​ពី​ព្រឹក​ព្រលឹម​​រហូត​ដល់​ថ្ងៃ​អស្ដង្គត​​​ទើប​អាច​វាយ​យក​បាន​ជំរំ​យោធា​ទាំង​២​កន្លែង​ដែល​ស្ថិត​​នៅ​ជាប់​នឹង​រដ្ឋ​មីហ្សូរ៉ាម (Mizoram) របស់​​ប្រទេស​ឥណ្ឌា​តែ​ម្ដង​។ ​​នេះ​ជា​ផ្នែក​១​នៃ​យុទ្ធ​នា​ការ​របស់​ឧទ្ទាម​ដើម្បី​ប្រឆាំង​នឹង​របប​យោធា​។ ​​អ្នក​នាំ​ពាក្យ​ទាហាន​ភូមា​…

យ៉ាន់ហ្កន៖ ​​ពួក​ឧទ្ទាម​ដែល​ប្រឆាំង​នឹង​របប​យោធា​ភូមា​នៅ​រដ្ឋ​ឈីន (Chin)​ ដាក់​ផែន​ការ​​​វាយ​ផ្ដាច់​ព្រ័ត្រ​​យក​តំបន់​ព្រំ​ដែន​ជាប់​នឹង​ប្រទេស​ឥណ្ឌា​បន្ទាប់​ពី​ពួក​គេ​​​​វាយ​​យក​បាន​​ទី​តាំង​​យោធា​២​កន្លែង​នៅ​​តំបន់​​ភ្នំ​ដាច់​ស្រយាល​​។ ខាងលើ​នេះ​ជា​ការ​អះអាង​របស់​មេ​បញ្ជា​ការ​ពួក​ឧទ្ទាម​។ ​ពួក​គេ​​រាប់​សិប​នាក់​​ចាប់​ផ្ដើម​​​បាញ់​ប្រហារ​​តាំង​ពី​ព្រឹក​ព្រលឹម​​រហូត​ដល់​ថ្ងៃ​អស្ដង្គត​​​ទើប​អាច​វាយ​យក​បាន​ជំរំ​យោធា​ទាំង​២​កន្លែង​ដែល​ស្ថិត​​នៅ​ជាប់​នឹង​រដ្ឋ​មីហ្សូរ៉ាម (Mizoram) របស់​​ប្រទេស​ឥណ្ឌា​តែ​ម្ដង​។

​​នេះ​ជា​ផ្នែក​១​នៃ​យុទ្ធ​នា​ការ​របស់​ឧទ្ទាម​ដើម្បី​ប្រឆាំង​នឹង​របប​យោធា​។ ​​អ្នក​នាំ​ពាក្យ​ទាហាន​ភូមា​ និង​អ្នក​នាំ​ពាក្យ​ក្រសួង​ការ​បរទេស​ឥណ្ឌា​មិន​បាន​ធ្វើ​អត្ថា​ធិប្បាយ​អ្វី​ទាំង​អស់​នៅ​ពេល​អ្នក​សារ​ព័ត៌​មាន​ព្យាយាម​ផ្ញើ​សារ​ដើម្បី​ស្នើ​សុំ​ការ​ឆ្លើយ​បំភ្លឺ​។ ប៉ុន្តែ​គេ​ដឹង​ថា​នៅ​ពេល​នេះ​ពួក​ឧត្ដម​សេនីយ៍​យោធា​​កំពូល​ៗ​របស់​លោក​មីន​ឱងឡាញ​ (Min Aung Hlaing)​ ​​កំពុង​ជួប​ប្រទះ​នឹង​វិញ្ញា​សា​​សាក​ល្បង​សមត្ថ​ភាព​ដ៏​ពិ​បាក​បំផុត​ចាប់​តាំង​ពី​លោក​ឡើ​ងកាន់​អំណាច​កាល​ពី​ឆ្នាំ​២០២១​។

មូល​ហេតុ​ដោយ​សារ​ពេល​នេះ របប​របស់​លោក​ត្រូវ​ទប់​ទល់​នឹង​ចលនា​វាយ​លុក​មិន​ត្រឹម​តែ​១​សមរភូមិ​ទេ​ ប៉ុន្តែ​៣​សមរភូមិ​ធំ​ៗ​វាយ​ស្មើ​ដៃ​គ្នា​​នៅ​ក្នុង​ពេល​តែ​មួយ​តាំង​ពី​ចុង​ខែ​តុលា​។ ពួក​គេ (​ក្រុម​ប្រ​ឆាំង​) ​អាច​ធ្វើ​ព្យុះ​ធ្វើ​ភ្លៀង​នៅ​តំបន់​ដាច់​ស្រយាល​ដែល​របប​យោធា​ពិបាក​នឹង​ពង្រឹង​កម្លាំង​ ឬ​ផ្ដល់​ភស្តុ​ភារ​​ទៅ​ឱ្យ​កម្លាំង​ដែល​កំពុង​ឈរ​ជើង​។ ​ក្រុម​ឧទ្ទាម​ឱ្យ​ឈ្មោះ​យុទ្ធ​នា​ការ​នេះ​ថា​ ប្រតិបត្តិ​ការ​​​២៧​តុលា​ (Operation 1027) ដែល​ជា​ពេល​ពួក​គេ​ចាប់​ផ្ដើម​វាយ​ប្រហារ​មុន​ដំបូង​​នៅ​​​​រដ្ឋ​សាន​ (Shan)។​

​នៅ​ទី​នោះ ទាហាន​​នៃ​របប​យោធា​ភូមា​​បាត់​បង់​ទី​ក្រុង​តូច​ធំ​មួយ​​ចំនួន​ រួម​ទាំង​​​ប៉ុស្តិ៍​ជួរ​មុខ​ជាង​១​រយ​កន្លែង​។​ ​​នៅ​សប្ដាហ៍​​នេះ​ក៏​មាន​ការ​​បាញ់​ប្រហារ​គ្នា​​​​​នៅ​ក្នុង​រណសិរ្យ​២​ទៀត​​នៃ​​​រដ្ឋ​រ៉ាក់​ខាញ​ និង​រដ្ឋ​ឈីន (Rakhine & Chin) ​ហើយ​បង្ខំ​ឱ្យ​មនុស្ស​រាប់​ពាន់​នាក់​​​រត់​ភៀស​ខ្លួន​ចូល​រដ្ឋ​​​​មីហ្សូរ៉ាម​។ ពួក​ឧទ្ទាម​៨០​នាក់​វាយ​ប្រហារ​ទៅ​លើ​​​ជំរំ​យោធា​រីខាវដា (Rihkhawdar) និង​ខាវ​ម៉ាវី (Khawmawi) នៃ​រដ្ឋ​ឈីន​តាំង​ពី​ម៉ោង​៤​យប់​។ ​បាញ់​គ្នា​ជា​ច្រើន​ម៉ោង​ទម្រាំ​ពួក​ឧទ្ទាម​វាយ​​យក​​បាន​ទី​តាំង​ទាំង​២​កន្លែង​នោះ​​។​

​​ទាហាន​​នៃ​របប​យោធា​​៤៣​នាក់​ដែល​បាក់​ទ័ព​បាន​​រត់ឆ្លង​​ដែន​ចូល​ទឹក​ដី​​​ឥណ្ឌា និង​សារ​ភាព​នៅ​ចំពោះ​មុខ​នគរ​បាល​ការ​ពារ​ព្រំដែន​ឥណ្ឌា​។​ ​ឥណ្ឌា​​​មិន​ទាន់​សម្រេច​ថា​ត្រូវ​បណ្ដេញ​ទាហាន​ទាំង​នេះ​ត្រឡប់​ទៅ​វិញ​ ឬ​យ៉ាង​ណា​ទេ​។​ មាន​តែ​រង់​ចាំ​សេច​ក្ដី​សម្រេច​ពី​ថ្នាក់​លើ​សិន​។​ ឥឡូវ​នេះ នៅ​សល់​ជំរំ​យោធា​២​កន្លែង​ទៀត​ដែល​ពួក​ឧទ្ទាម​​ដាក់​ផែន​ការ​វាយ​ប្រហារ​យក​ឱ្យ​បាន​ដើម្បី​វ៉ាង​ទី​តំបន់​នោះ​ផ្ដាច់​មុខ​តែ​ម្នាក់​ឯង​​។​ ​

រដ្ឋ​ឈីន​ធ្លាប់​ជា​ទី​កន្លែង​រស់​នៅ​ដោយ​សុខ​ដុម​រមនា​។ ប៉ុន្តែ​ចាប់​តាំង​ពី​ក្រោយ​ព្រឹត្តិ​ការណ៍​ឆ្នាំ​២០២១​ គេ​ឃើញ​ថា​មាន​​ការ​ប្រ​យុទ្ធ​គ្នា​យ៉ាង​ខ្លាំង​ក្លា​ជា​ហូរ​​ហែ​។ ​អ្នក​ខ្លះ​​ជា​ប្រជា​ពល​រដ្ឋ​ធម្មតា​បាន​រត់​ចូល​ព្រៃ​​ដើម្បី​កាន់​​អាវុធ​ត​តាំង​នឹង​​​របប​យោធា​។ ពួក​ឧទ្ទាម​នៅ​រដ្ឋ​ឈីន​ទទួល​បាន​ការ​គាំទ្រ​ពី​សំណាក់​ក្រុម​​​អ្នក​ស្រុក​នៅ​រដ្ឋ​មីហ្សូរ៉ាម​ព្រោះ​ពួក​គេ​ធ្លាប់​មាន​ទំនាក់​ទំនង​ជិត​ស្និទ្ធ​នឹង​គ្នា​​ជា​យូរ​មក​ហើយ​។​ ​មនុស្ស​​រាប់​ម៉ឺន​នាក់​ដែល​រត់​ភៀស​ខ្លួន​ចេញ​ពី​ប្រទេស​ភូមា​ក៏​ទៅជ្រក​កោន​នៅ​ក្នុង​រដ្ឋ​​​ដ៏តូច​១​នេះ​ផង​ដែរ​​​៕​​

ប្រភព៖ Channel News Asia
https://www.channelnewsasia.com/asia/myanmar-anti-junta-rebels-offensive-control-india-border-3919321

អត្ថបទសរសេរ ដោយ

កែសម្រួលដោយ