អ៊ីស្រាអែលថាក្រុមហាម៉ាស់បាត់បង់ការត្រួតត្រាហ្គាហ្សារត់ទៅភាគខាងត្បូង
សង្គ្រាមអីុស្រាអែលនិងហាម៉ាស់ ៖ រដ្ឋមន្ត្រីការពារប្រទេសអីុស្រាអែល លោកYOAV GALLANT
សង្គ្រាមអីុស្រាអែលនិងហាម៉ាស់ ៖ រដ្ឋមន្ត្រីការពារប្រទេសអ៊ីស្រាអែល លោកYOAV GALLANT អះអាងកាលពីថ្ងៃទី១៣វិច្ឆិកាថា ក្រុមហាម៉ាស់បានបាត់បង់ការត្រួតត្រា នៅហ្គាហ្សាហើយយុទ្ធជនរបស់គេបានភៀសខ្លួនទៅកាន់ភាគខាងត្បូង បន្ទាប់ពីជាង៥សប្ដាហ៍នៃសង្គ្រាមជាមួយចលនាអ៊ិស្លាមប៉ាឡេស្ទីននោះ។
រដ្ឋមន្ត្រីរូបនេះក្នុងសារវីដេអូមួយចេញផ្សាយដោយទូរទស្សន៍ជាច្រើន ក៏អះអាងដែរថា បណ្ដាជនស៊ីវិលបានលើកគ្នាទៅប្រមូលយកឥវ៉ាន់ ក្នុងបណ្ដាមូលដ្ឋានរបស់ហាម៉ាស់។ អ៊ីស្រាអែលវាយប្រហារមិនសំចៃដៃលើហ្គាហ្សា ទាំងតាមជើងអាកាស ជើងគោកនិងជើងទឹក ចាប់តាំងពីជាង៥សប្ដាហ៍មកហើយ ជាការតបតចំពោះការវាយប្រហារដ៏សាហាវមិនធ្លាប់មានពីមុនមករបស់ពួកហាម៉ាស់ លើអ៊ីស្រាអែលកាលពីថ្ងៃទី៧តុលាមក។
ចាប់តាំងពីដំណាច់ខែតុលាមកកងទ័ពជើងគោកអីុស្រាអែល បានវាយរុលចូលភាគខាងជើងហ្គាហ្សា ហើយការប្រយុទ្ធគ្នាជាមួយពួកយុទ្ធជនហាម៉ាស ពេលនេះកើតមាននៅកណ្ដាលទីក្រុងហ្គាហ្សា កន្លែងនៅសល់ជនសីុវិលច្រើនសិបពាន់នាក់នៅឡើយ។ កងទ័ពអីុស្រាអែលលើកឡើងរាល់ថ្ងៃពីហេដ្ឋារចនាសម្ព័ន្ធយោធាថ្មីៗរបស់ហាម៉ាស់ រងការកម្ទេចនៅហ្គាហ្សា ពីការរកឃើញបណ្ដាទីតាំងលាក់អាវុធព្រមទាំងបណ្ដារូងក្រោមដីនិងពីបណ្ដាមេបញ្ជាការហាម៉ាស់ច្រើននាក់ត្រូវសម្លាប់។
តាមប្រភពយោធាអ៊ីស្រាអែលដកស្រង់ផ្សាយកាលពីថ្ងៃទី១៣ វិច្ឆិកាដោយសារព័ត៌មានជាច្រើនថា ក្រុមហាម៉ាស់មុនពេលវាយប្រហារថ្ងៃទី៧តុលាលើអ៊ីស្រាអែល មានយុទ្ធជន៣០.០០០នាក់នៅជ្រោយហ្គាហ្សា ចែកចេញជា៥កងពលតូច ២៤កងវរសេនាតូចនិង១៤០កងអនុសេនាតូច។ អ្នកជំនាញការជាច្រើននាក់បានព្រមានពីគ្រោះថ្នាក់ នៃការប្រយុទ្ធស៊ីសាច់ហុតឈា.មគ្នា រវាងកងទ័ពអីុស្រាអែលនិងពួកហាម៉ាស់ ក្នុងក្រុងហ្គាហ្សាដែលរងការបំផ្លាញ៕
ចែករំលែកព័តមាននេះ