អា​រ៉ា​ប៊ី​សា​អូឌីត ៖ Neymar កាលពី​ថ្ងៃ​ទី​១៣ ខែវិច្ឆិកា ឆ្នាំ​២០២៣ បាន​បង្ហាញ​អំពី​បច្ចុប្បន្នភាព​របស់​ខ្លួន​លើ Instagram Story ដោយ​កីឡាករ​កំពូល​លេង​ម៉ូត​សក់​រូប​នេះ បាន​សម្រេចចិត្ត​កោស​ក់ អំឡុង​ពេល​កំពុង​សម្រាក​ព្យាបាល​របួស​ជង្គង់ (ACL) ស្រប​ពេល​ដំណឹង​នៃ​ការ​លុបឈ្មោះ​ចេញពី​ក្រុម Al-Hilal បាន​ផ្ទុះ​ឡើង​។ នេះ​បើ​យោង​តាម​ប្រភព​ពី​គេហទំព័រ Goal.com ។

ក្រុមបាល់ទាត់ Al-Hilal ត្រូវ​បាន​រាយការណ៍​ថា គ្រោង​នឹង​លុបឈ្មោះ Neymar ចេញ​សម្រាប់​រដូវ​កាល​នេះ បន្ទាប់​ពី​កំពូល​ខ្សែប្រយុទ្ធ​ប្រេ​ស៊ី​ល​រូប​នេះ​មាន​បញ្ហា​របួស​ជង្គង់​ធ្ងន់ធ្ងរ ខណៈ​ក្រុម​នៅ​លី​គ​កំពូល​អា​រ៉ា​ប៊ី​សា​អូឌីត​មួយ​នេះ (Saudi Pro League) កំពុង​សម្លឹង​មើល​ការ​នាំ​ចូល​កីឡាករ​ឆ្នើម​នៅ​អឺរ៉ុប នៅ​ទីផ្សារ​ដោះ​ដូរ​កីឡាករ​ខែមករា​ខាង​មុខ​។

Neymar បាន​រង​របួស​ដាច់​សរសៃ​ចង​ជង្គង់​ផ្នែក​ខាង​មុខ និង​សរសៃពួរ​ជង្គង់​ខាងឆ្វេង​ធ្ងន់ធ្ងរ ដែល​បាន​កើតឡើង​អំឡុង​ពេល​ប្រកួត​វគ្គ​ជម្រុះ​បឋម​ពានរង្វាន់ FIFA World Cup 2026 ដែល​ប្រេ​ស៊ី​ល​បាន​ចាញ់​ម្ចាស់ផ្ទះ​អ៊ុយ​រ៉ូ​ហ្គា​យ កាលពី​ថ្ងៃ​ទី​១៨ ខែតុលា កន្លង​ទៅ​។ អតីត​ខ្សែប្រយុទ្ធ​ក្រុម​អ្នកមាន​បារាំង PSG នឹង​អវត្តមាន​រហូត​ដល់​ចប់​រដូវ​កាល​នេះ ហើយ​បើ​តាម​ប្រភព​ព័ត៌មាន​អា​រ៉ា​ប៊ី​សា​អូឌីត Arriyadiyah បាន​រាយការណ៍​ថា Al-Hilal កំពុង​ពិចារណា​លុបឈ្មោះ​ខ្សែប្រយុទ្ធ​ប្រេ​ស៊ី​លវ័យ​៣១​ឆ្នាំ​រូប​នេះ ចេញពី Saudi Pro League សម្រាប់​រដូវ​កាល​បច្ចុប្បន្ន ដើម្បី​ទុក​កន្លែង​សម្រាប់​កីឡាករ​បរទេស ដែល​នឹង​នាំ​ចូល​នៅ​ខែមករា​ខាង​មុខ​។ ការ​សម្រេចចិត្ត​នេះ គឺ​ស្រប​តាម​ច្បាប់​របស់ Saudi Pro League ដែល​កំណត់​កូតា​កីឡាករ​មិនមែន​អា​រ៉ា​ប៊ី​សា​អូឌីត​ត្រឹម​៨​នាក់​ក្នុង​១​ក្រុម​។

ក្រៅពី Neymar កីឡាករ​បរទេស​៧​នាក់​ផ្សេង​ទៀត​របស់ Al-Hilal អ្នកចាំទី​ម៉ា​រ៉ុ​ក Yassine Bounou ខ្សែការពារ​សេ​ណេ​ហ្គា​ល់ Kalidou Koulibaly ខ្សែបម្រើ​ការពារ​ព័រ​ទុ​យ​ហ្គា​ល់ Ruben Neves ខ្សែបម្រើ​ស៊ែ​ប Sergej Milinkovic-Savic ខ្សែប្រយុទ្ធ​Aleksandar Mitrovic និង​ខ្សែប្រយុទ្ធ​ប្រេ​ស៊ី​ល​ទាំង​ពីរ Malcolm និង Michael ។

ជាង​នេះ​ទៅ​ទៀត អ្នកចាត់ការ​ទូទៅ Al-Hilal គឺ​លោក Jorge Jesus មាន​បំណង​ពង្រឹង​ក្រុម​ជាមួយនឹង​ខ្សែការពារ​ឆ្វេង​បរទេស ហេតុ​ដូច្នេះ​ហើយ​ការ​សម្រេចចិត្ត​លុបឈ្មោះ Neymar នឹង​ត្រូវធ្វើ​ឡើង ប៉ុន្តែ​ទោះបីជា​យ៉ាងណា​ក៏​ដោយ អ្នកចាត់ការ​ទូទៅ​សញ្ជាតិ​ព័រ​ទុ​យ​ហ្គា​ល់វ័យ​៦៩​ឆ្នាំ​រូប​នេះ ក៏​ទន្ទឹងរង់ចាំ​ការ​វិល​ត្រឡប់​របស់ Neymar មុន​រដូវ​កាល ២០២៤-២៥ ចាប់ផ្តើម​។

គូរ​រំលឹក​ជូន​ថា Neymar da Silva Santos Junior បាន​ផ្លាស់​ពី​ក្លិប PSG មក​ចូលរួម​ជាមួយនឹង​ក្លិប Al Hilal កាលពី​ខែសីហា ឆ្នាំ​២០២៣ កន្លង​ទៅ នៅ​ក្នុង​តម្លៃ​៩០​លាន​អឺ​រ៉ូ ជាមួយ​កុងត្រា​រយៈពេល​២​ឆ្នាំ ខណៈ​នៅ​អា​រ៉ា​ប៊ី​សា​អូឌីត ខ្សែប្រយុទ្ធ​កម្ពស់​១,៧៥​ម៉ែត្រ​រូប​នេះ ទទួល​បាន​ថ្លៃ​នឿយហត់​រហូត​ដល់​១៥០​លាន​អឺ​រ៉ូ​ក្នុង​១​ឆ្នាំ​៕