រាជធានីភ្នំពេញ ៖ បណ្តាក្រុមហ៊ុននានា បានទទួលពាក្យសុំស្វែងរកការងារធ្វើពីបេក្ខជនជាង ២ ម៉ឺននាក់ ក្នុងចំណោមអ្នកចូលរួមជាង ៣ ម៉ឺននាក់ ក្នុងពិព័រណ៍ការងារ…
រាជធានីភ្នំពេញ ៖ បណ្តាក្រុមហ៊ុននានា បានទទួលពាក្យសុំស្វែងរកការងារធ្វើពីបេក្ខជនជាង ២ ម៉ឺននាក់ ក្នុងចំណោមអ្នកចូលរួមជាង ៣ ម៉ឺននាក់ ក្នុងពិព័រណ៍ការងារ និង ផលិតភាព ជាតិឆ្នាំ ២០២៣ ដែលបានប្រព្រឹត្តិទៅកាលពីថ្ងៃ ១០-១១ ខែវិច្ឆិកា ឆ្នាំ ២០២៣ កន្លងទៅនេះ នៅអគារពាណិជ្ជកម្ម និងពិព័រណ៍កោះពេជ្រ ។ នេះបើយោងតាមរបាយការណ៍របស់ក្រសួង ការងារ និងបណ្តុះបណ្តាលវិជ្ជាជីវៈ ។
របាយការណ៍បានបង្ហាញទៀតថា ក្នុងនោះមានបេក្ខជនជាប់ការងារបឋមចំនួន ៦៣៧ នាក់ ។ ជាមួយគ្នានេះសម្រាប់អ្នកចូលរួមទស្សនាតាមគេហទំព័រ Career Fair សរុបមានចំនួន ជាង ២ ម៉ឺននាក់ផងដែរ ។
ក្នុងឱកាសបើកដំណើរការពិព័រណ៍ការងារ និងផលិតភាពជាតិឆ្នាំ ២០២៣ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានបញ្ជាក់ថា ពិព័រណ៍សម្រាប់ ឆ្នាំ ២០២៣ មានក្រសួង-ស្ថាប័ន ក្រុមហ៊ុន សហគ្រាស គ្រឹះស្ថានអប់រំបណ្តុះបណ្តាល ដៃគូ អភិវឌ្ឍន៍ និងអង្គការជាតិ-អន្តរជាតិចំនួន ១៥០ ដែលស្មើនឹង ១៨៨ បញ្ជរដែលនាំមកនូវ ឱកាសការងារថ្មីៗថែមទៀតចំនួនជាង ២ ម៉ឺនកន្លែងសម្រាប់អ្នកស្វែងរកការងារធ្វើ ។
ជាមួយគ្នានេះ ឯកឧត្តមរដ្ឋមន្ត្រីបានលើកឡើងថា នេះជាលើកទី ១៣ ហើយ ដែលទី ភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ រៀបចំ ឡើងចាប់តាំងពី ២០១១ ដែលមានត្រឹមតែ ៣០ ស្តង់ និងឱកាសការងារត្រឹម ២០០០ កន្លែង ប៉ុណ្ណោះ ហើយប្រៀបធៀបពិព័រណ៍ការងារឆ្នាំ ២០២៣ នេះ ពោលគឺមានចំនួនអ្នកចូលរួម និងឱកាសការងារកើនឡើង ។
ឯកឧត្តមបញ្ជាក់ថា ចំនួនក្រុមហ៊ុន និងឱកាសការងារសម្រាប់ឆ្នាំ ២០២៣ កើនឡើង ១០ ដងបើប្រៀបធៀបទៅនឹងពិព័រណ៍ឆ្នាំ ២០១១ ។ នេះជាការបង្ហាញពីវឌ្ឍនភាពមួយដែល ព្រឹត្តិការណ៍នេះកាន់តែធំ កាន់តែទាក់ទាញ និងមានអ្នកចូលរួមកាន់តែច្រើនស្វែងយល់ និង ស្វែងរកពីឱកាសការងារ ។
ឯកឧត្តមរដ្ឋមន្ត្រីបានគូសបញ្ជាក់បន្ថែមថា ពិព័រណ៍នេះនឹងក្លាយជាទីកន្លែងមួយ សម្រាប់អ្នកស្វែងរកការងារអាចជ្រើសរើសការងារទៅតាមជំនាញតាមក្តីប្រាថ្នារបស់ខ្លួនតាម ស្តង់នីមួយៗដែលខ្លួនពេញចិត្ត និងអាចដាក់ពាក្យភ្លាមសម្ភាសភ្លាម ។ ចំណែកក្រុមហ៊ុន ក៏អាចរកបានបុគ្គលិកដែលមានសមត្ថភាពដែលខ្លួនចង់បានផងដែរ ។
និស្សិត លី ម៉ីនាង កំពុងសិក្សាថ្នាក់បរិញ្ញាបត្រ ដែលបានចូលរួមពិព័រណ៍នេះបាន បង្ហាញចំណាប់អារម្មណ៍ថា ពិព័រណ៍នេះមានសារៈសំខាន់សម្រាប់អ្នកស្វែងរកការងារ និង អ្នកចង់ផ្លាស់ប្តូរការងារ ព្រោះវាជាឱកាសដែលក្រុមហ៊ុនជាច្រើនរួមគ្នាជ្រើសរើសបុគ្គលិក ហើយថែមទាំងបានជួបជាមួយអ្នកជំនាញប្រឹក្សាយោបល់ និងចែករំលែកបទពិសោធន៍នានា ក្នុងការស្វែងរកការងារធ្វើផងដែរ ។
ចំណែកនិស្សិតឈ្មោះ ស៊ុង ជានា បានយល់ឃើញថា ភាគច្រើននិស្សិតមកពីតាម បណ្តាខេត្តឡើងមកសិក្សានៅភ្នំពេញ ពេលខ្លះពួកគេមិនបានដឹងពីព័ត៌មានឱកាសការងារ ទូលំទូលាយទេ ដូចនេះពិព័រណ៍ការងារ គឺជាឱកាសផ្តល់ព័ត៌មាន និងមានជម្រើសការងារ សម្បូរបែបដល់អ្នកស្វែងរកការងារធ្វើ ។ និស្សិតរូបនេះក៏ចង់ឃើញពិព័រណ៍ការងារមានជា រៀងរាល់ឆ្នាំ រឺ ពីរដងក្នុងមួយឆ្នាំ ។
សូមជម្រាបថា ពិព័រណ៍ការងារ និងផលិតភាពជាតិ ឆ្នាំ ២០២៣ នេះ ត្រូវបានសហ ការរៀបចំដោយទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះ បណ្តាលវិជ្ជាជីវៈ សហភាពសហព័ន្ធយុវជនកម្ពុជា (UYFC) សមាគមវាយនភណ្ឌ សម្លៀក បំពាក់ ស្បែកជើង និងផលិតផល ធ្វើដំណើរនៅកម្ពុជា (TAFTAC) អង្គការអន្តរជាតិខាងការ ងារ (ILO), ភីផលអីននិត (People in Need Cambodia) និងស្វីសខនថាក់ ៕ អត្ថបទសហការ
ចែករំលែកព័តមាននេះ