ខេត្តស្ទឹងត្រែង ៖ ប្រជានេសាទក្នុងខេត្តស្ទឹងត្រែង ជារៀងរាលឆ្នាំតែងតែរីករាយនៅក្នុងការនេសាទតាមដងទន្លេមេគង្គក្នុងរដូវត្រីត្រឡប់ទៅក្លែងពងកូន ដែលតាមភាសាប្រជានេសាទថា រដូវត្រីប្រសព្វ គឺពេលដែលត្រីចុះមក តាមដៃទន្លេមកដល់ទន្លេមេគង្គហើយមេឃបានបង្អុរទឹកភ្លៀង ធ្វើឱ្យហ្វូងត្រីទាំងនោះត្រូវវិលត្រឡប់ពីទន្លេមេគង្គទៅរកកន្លែងដើមវិញដើម្បីពងកូន ។ រដូវនេះហើយដែលធ្វើឱ្យប្រជានេសាទទាំងអស់មានការរីករាយដោយមិនបានគិតពីការនឿយហត់សូម្បីបន្តិចឡើយ ។
ប្រជានេសាទម្នាក់បាននិយាយទាំងទឹកមុខរីករាយថា ប្រជានេសាទទំាងអស់តែងតែមកជួបជុំគ្នាត្រង់ចំណុចប្រសព្វទឹកហៅថា ប៉ាចុងហើយចំណុចនេះជាកន្លែងសម្បូរទៅដោយត្រីចម្រុះដែលពួកវាហែលមកពីទន្លេមេគង្គទៅទន្លេសេកុងជាកន្លែងពួកវារស់នៅ និងពង ។ គាត់បានបន្តថា ការនេសាទត្រីនេះគឺសម្បូរតែពីខែឧសភាដល់ខែមិថុនាប៉ុណ្ណោះហើយក្នុងខែនេសាទនេះគឺក្នុងមួយថ្ងៃបានពី៨០ទៅ១០០គីឡូក្រាម តែក៏មានថ្ងៃដែលមិនសូវត្រូវបានតែ៥០ទៅ៦០គីឡូក្រាមដែរ ហើយអ្នកដែលបានមកជួបជុំគ្នាដើម្បីនេសាទឆ្នាំនេះមានដល់ទៅជិត១០០ទូកឯណោះគឺច្រើនជាងឆ្នាំកន្លងទៅ ។
ស្រ្តីម្នាក់ជាអាជីវករលក់ត្រីនៅផ្សារស្ទឹងត្រែងបានឱ្យដឹងថា ក្នុងឆ្នាំនេះប្រជានេសាទរកត្រីបានច្រើនជាងរាល់ឆ្នាំ ហើយត្រីដែលបានទិញពីប្រជានេសាទទាំងនោះ ក្នុងមួយគីឡូក្រាមថ្លៃ៣.០០០រៀល និងលក់ចេញទៅវិញ៣.៥០០រៀលដោយក្នុងមួយថ្ងៃៗអាចលក់បានរាប់រយគីឡូក្រាម ។ អាជីវកររូបនេះបានបន្តថា ឱ្យតែដល់រដូវនេះភាគច្រើនអ្នកមកពីខេត្តក្រោមតែងមកប្រមូលទិញទៅលក់បន្ត ឬទិញទៅធ្វើផ្អក ប្រហុក។
ប្រជាពលរដ្ឋម្នាក់នៅខេត្តស្ទឹងត្រែងនិយាយថា ជារៀងរាល់ឆ្នំាឱ្យតែដល់រដូវត្រីប្រសព្វគ្នាគឺពួកគាត់តែងនាំគ្នាទិញទុកសម្រាប់ធ្វើផ្អក ប្រហុកទុកទទួលទាន និងផ្ញើទៅឱ្យបងប្អូននៅឯខេត្តផ្សេង និងសាច់ញាតិនៅភ្នំពេញ ព្រោះមានតែរដូវនេះទេ ត្រីធូរថ្លៃ ៕
ចែករំលែកព័តមាននេះ