ខេត្តបាត់ដំបង ៖ ការប៉ះប្រយុទ្ធគ្នាដ៏ឃោរឃៅ រវាងពួកក្មេងអន្ធពាលចំនួន០២ក្រុម ប្រដាប់ដោយកាំបិតផ្គា់និងខ្វែវ កាលពីវេលាម៉ោង១០ និង៣០នាទីយប់ថ្ងៃទី១០ វិច្ឆិកា នៅចំណុចស្ថានីយប្រេងមួយកន្លែង ក្នុងភូមិកំប៉ូវ…
ខេត្តបាត់ដំបង ៖ ការប៉ះប្រយុទ្ធគ្នាដ៏ឃោរឃៅ រវាងពួកក្មេងអន្ធពាលចំនួន០២ក្រុម ប្រដាប់ដោយកាំបិតផ្គា់និងខ្វែវ កាលពីវេលាម៉ោង១០ និង៣០នាទីយប់ថ្ងៃទី១០ វិច្ឆិកា នៅចំណុចស្ថានីយប្រេងមួយកន្លែង ក្នុងភូមិកំប៉ូវ ឃុំភ្នំសំពៅ ស្រុកបាណន់ បណ្ដាលឱ្យជនម្នាក់ក្នុងភាគី០៧នាក់ រងរបួសធ្ងន់ម្នាក់ក្នុងសមរភូមិ តែបានស្លាប់ភ្លាមពេលបញ្ជូនដល់មន្ទីរពេទ្យ។
ប្រភពព័ត៌មានពីសាក្សីបានឲ្យដឹងថា ការប៉ះទងកិចគ្នាយ៉ាងសាហាវឃោរឃៅរវាងពួកជនអន្ធពាលទាំង២ក្រុមនេះ គឺភាគីដែលមានគ្នា០៤នាក់ជិះម៉ូតូ០២គ្រឿង ជាក្រុម«ភ្នំសំពៅ» នៅឃុំភ្នំសំពៅ រីឯភាគីដែលមានគ្នា០៧នាក់ ជាក្រុម«តាគ្រាម» ជិះម៉ូតូ០៣គ្រឿង នៅឃុំតាគ្រាម ស្ថិតនៅក្នុងស្រុកបាណន់ជាមួយគ្នា ។
ប្រភពដដែលបានបញ្ជាក់ថា ក្រុមជនទំនើងទាំង០២ក្រុមនេះ បានជិះម៉ូតូដេញតាមកាប់ចាក់គ្នាយ៉ាងឃោរឃៅតាមថ្នល់ជាតិ ហើយក៏ប៉ះប្រយុទ្ធបង្ហូរឈាមគ្នា នៅចំណុចស្ថានីយប្រេង «ផែន ស្រីវី» ក្នុងភូមិកំប៉ូវ ឃុំភ្នំសំពៅ ។ ក្នុងអំពើហិង្សាមួយប្រាវនេះ បានបណ្ដាលឲ្យជនម្នាក់នៅក្នុងភាគី០៧នាក់ រងរបួសធ្ងន់នៅកន្លែងកើតហេតុ តែឮថា បានស្លា.ប់ពេលបញ្ជូនដល់មន្ទីរពេទ្យ។
របាយការណ៍សមត្ថកិច្ច ក៏បាននិយាយប្រហាក់ប្រហែលនឹងប្រភពខាងលើនេះដែរថា ពួកជនអន្ធពាលដែលកាប់សម្លាប់គ្នាយ៉ាងសាហាវព្រៃផ្សៃខាងលើនេះមាន០២ក្រុម ដែលមួយក្រុមមានគ្នា០៤នាក់ និងមួយក្រុមទៀតមានគ្នា០៧នាក់។ ពួកគេបានប្រើប្រាសកាំបិតផ្គាក់ និងកាំបិតខ្វែវ ។
សមត្ថកិច្ចបានបញ្ជាក់នៅក្នុងរបាយការណ៍ដដែលថា ពេលប៉ះទង្កិចគ្នា ភាគីមានគ្នា០៧នាក់ បានរងបួសធ្ងន់ម្នាក់មែន ហើយបានស្លាប់ពេលបញ្ជូនដល់មន្ទីរពេទ្យខេត្ត។ ប៉ុន្តែសមត្ថកិច្ចមិនបានបង្ហាញអត្តសញ្ញាញភាគីទាំង០២ទេ តែបានប្រាប់ឈ្មោះជនរងគ្រោះម្នាក់ដែលស្លាប់ គឺឈ្មោះ លក សាវៀង ប្រុសអាយុ១៧ឆ្នាំ រស់នៅភូមិតាគ្រាម ឃុំតាគ្រាម ស្រុកបាណន់។
ជននេះស្ថិតក្នុងចំណោមភាគី០៧នាក់ និងបានរងរបួសធ្ងន់ធ្ងរ នៅក្នុងសមរភូមិប្រយុទ្ធ ត្រូវនឹងផ្លែកាំបិតផ្កាក់ត្រង់លលាដ៏ក្បាលផ្នែកខាងក្រោយ ហើយបានពលីជីវិត ពេលបញ្ជូនដល់មន្ទីរពេទ្យខេត្ត។
អធិការស្រុកបាណន់ លោក សំ វីរៈ បានថ្លែងប្រាប់កោះសន្តិភាព នៅរសៀលថ្ងៃទី ១១ វិច្ឆិកា នេះថា ពេលនេះ ភាគីទាំង០២ បានព្យាយាមសំងំលាក់ខ្លួន ហើយសមត្ថកិច្ចបាននិងកំពុងធ្វើការស្រាវជ្រាវស្វែងរកក្រុមបង្កហឹង្សាទាំង០២ភាគីនេះ ព្រោះយើងក្កាប់បាននូវអត្តសញ្ញាណពួកគេអស់ហើយ តែពួកគេមិនបង្ហាញខ្លួនទេ។
លោកអធិការរូបនេះបានបញ្ជាក់ថា ពេលនេះ លោកមិនទាន់បង្ហាញពីរបាយការណ៍ជាក់លាក់ទេ ព្រោះកំពុងតាមប្រមាញ់ក្រុមជនបង្កទាំង០២ភាគី។ ប៉ុន្តែលោកអធិការបានសន្យាថា នៅប៉ុន្មានថ្ងៃខាងមុខទៀតនេះ កម្លាំងរបស់លោកនឹងតាមចាប់ខ្លួនពួកគេឲ្យបាន ព្រោះមន្ត្រីជំនាញស្គាល់អត្តសញ្ញាណពួកគេអស់ហើយ៕
ចែករំលែកព័តមាននេះ